Rhyfel yw rhyfel ...

Mae tapestri o ddarlun enwog Picasso Guernica yn hongian yn y cyntedd o flaen Ystafell Cyngor Diogelwch y Cenehdloedd Unedig. Dair wythnos yn ôl, tra roedd Colin Powell yn cynnal Cyfarfod i'r Wasg, yr oedd y tapestri wedi cael ei orchuddio gan faner y Cenhedloedd Unedig gyda baneri holl wledydd y C.U. ar y faner. Mae darlun Picasso yn cofio cyflafan y dref yng Ngwlad y Basg a fomiwyd yn 1937: corff milwr, ceffyl clwyfedig, mam yn sgrechian a'i phlentyn yn gorff yn ei breichiau, tarw gwyllt, gwraig ar dân, anhrefn, dioddefiant. Tybed a oedd gorchuddio'r llun yn symbol o'r ymdrech i wneud i'r rhyfel yma ymddangos y byddai yn 'wahanol' i frwydro a fu? Yn gyfoes yn ei dechnoleg, yn fanwl iawn wrth dargedu adeiladau'r llywodraeth a'r mannau militaraidd yn unig? Osgoi lladd pobl?!

Maddau i ni, Arglwydd fod ein gwybodaeth a'n technoleg wedi datblygu arfau mor rymus a manwl fel y gallwn ymhyfrydu mewn rhyfela o bell ac ar deledu; agor ein llygaid, ein cydwybod a'n calon i weld dyfnder y tywyllwch sydd mewn dyn - ei fod yn medru dinistrio, llygru a gwenwyno, ei fod yn medru lladd plant a rhieni a henoed a gwneud hynny yn enw 'cyfiawnder' a 'rhyddid' a 'heddwch'; Arglwydd maddau y fath falchder hunan-gyfiawn a phlyg ni mewn edifeirwch yn hytrach nag ymfrost yn ein byddinoedd a'n 'milwyr gorau yn y byd' Amen.

Yng ngyntedd Canolfan y Cenhedloedd Unedig hefyd y mae gweddi a gobaith y proffwyd Eseia wedi ei hysgrifennu ar y mur: 'barna Ef rhwng cenhedloedd, a thorri'r ddadl i bobloedd lawer; curant eu cleddyfau'n geibiau a'u gwawyffyn yn grymanau; ni chyfyd cenedl gleddyf yn erbyn cenedl ac ni ddysgant ryfel mwyach (Eseia 2.4)

Gweddïwn, Arglwydd, ar i weledigaeth dy broffwyd feddiannu meddyliau a pholisïau arweinwyr a llywodraethwyr byd: i baratoi, i hyfforddi, i wario, i gynllunio ar gyfer byd o heddwch, fel na fydd angen anfon milwyr i ladd ei gilydd, fel na fydd angen troi pobloedd yn elynion, fel na fydd angen gwneud pobl gyffredin yn ysglyfaeth i rym ac awdurdod eraill. Gweddïwn dros y rhai sydd â chyfrifoldebau arswydus ar eu hysgwyddau a gweddïwn dros y teuluoedd sydd yn cael eu rhwygo yn y rhyfel hwn. Amen.

Pryderi

I weld ysgrifau blaenorol, cliciwch ar y cysylltiadau isod:

Mari Owen a Gwenan Creunant, Gweddi ar ddechrau'r Grawys, Mawrth  2003 Mari Owen, Gweddi: 'Diolch', Chwefror  2002 Rhidian Griffiths, 'Boed fy nghalon iti'n deml', gan William Williams, Pantycelyn, Rhagfyr 2002 Rhidian Griffiths, 'Un o emynau Pantycelyn', Tachwedd 2002 Rocet Arwel Jones, 'Yng nghwmni Maya Angelou', Awst 2002 Brynley Roberts, 'Rhyfeddod y We', Mehefin 2002