Cymeriad canolog drama Cynan, 'Lili'r Grog', sy'n drosiad o 'Good Friday' gan John Masefield, yw'r Ynfytyn Dall. Dim ond yng ngolwg y byd y mae'n ynfytyn, ac os yw'n ddall o ran ei lygaid, mae'n gweld mwy na neb. Yng nghyfnod y Groglith a'r Pasg gofynnir inni edrych heibio i'r amlwg, i'r hyn sy'n ffolineb ym meddwl y byd, a gweld neges cariad Duw. Methiant yng ngolwg y dyrfa, a thorcalon o'r gwaetha i'w ddisgyblion, oedd gweld croeshoelio Iesu, a'i weld yn dioddef y gosb fwyaf erchyll roedd y Rhufeiniaid yn gallu ei rhoi i'r dihiryn gwaethaf. Onid oedd y diwedd trist yn brawf na all neb lwyddo ond trwy fod yn wleidydd da a chyfaddawdu a derbyn y drefn? Onid bod yn bragmataidd sydd orau yn ein byd ni? Y tu hwnt i wleidyddiaeth a chyfaddawd mae cwestiynau dyfnaf bywyd a'i ystyr. Mae'r groes yn dweud wrthym fod cariad Duw yn drech na gallu gwaethaf dyn, a bod yr hyn sy'n ymddangos yn fethiant terfynol yn symbol grymus o fuddugoliaeth cariad. Beth bynnag y dadleuon diwinyddol am arwyddocâd marwolaeth Iesu, allwn ni ddim osgoi'r gwirionedd mai arwydd o gariad hunanaberthol yw'r groes - "nid oes gan neb gariad mwy na hyn, sef bod rhywun yn rhoi ei einioes dros ei gyfeillion" (Ioan 15:13). Ac yng ngoleuni'r groes fe'n gelwir ninnau i garu ac i wasanaethu Duw a chyd-ddyn. Os yw'n anodd deall y groes, mae gwyrth y Pasg yn ein siglo fwy fyth. Ond yr hyn sy'n drawiadol ym mhrofiad y disgyblion yw eu bod wedi eu tanio â bywyd newydd trwy eu profiad o'r Crist atgyfodedig. Fyddai ddim Eglwys Fore nac Actau na dim hanes wedyn heb brofiad y disgyblion o'r atgyfodiad, a dyw'r eglwys ddim yn symud o gwbl heb brofiad o'r Crist byw. Mae llawer ohonom yn holi ac yn cwestiynu ac yn teimlo'n ansicr o bryd i'w gilydd; ond rhai felly oedd yr apostolion weithiau, ac roedd yr Eglwys Fore ymhell o fod yn berffaith. Roedd ganddi ei chynnen a'i phroblemau fel pob eglwys ddaearol arall. Yr hyn sy'n bwysig yw bod y bobl sy'n gwneud eglwys yn rhannu eu profiad yn onest ac yn ddidwyll, ac yn ceisio byw bywyd ffydd mewn gostyngeiddrwydd a chariad. Dyna lwyddiant y groes. Dyna weledigaeth yr Ynfytyn Dall: O Degwch uwch na'r ddaear hon, Seren nas diffydd gwynt na thon, Pelydra mwyach ar fy mron.