Mae twrw'r Etholiad Cyffredinol wedi hen fynd heibio. Cawsom ein llethu bron â datganiadau ac addewidion, a phawb yn barod i gynnig pob math o bethau. Dyna yw etholiad, wedi'r cyfan. Does neb yn mynd i gael ei ddenu at wleidydd sy'n dweud, 'Wel, efallai gwna i hyn os bydd amgylchiadau'n iawn, ond wrth gwrs gall fod yn anodd ... ', er taw dyna realiti bywyd wedi etholiad yn aml iawn. Na, rhinweddau pendantrwydd, sicrwydd a hyder yw rhinweddau'r gwleidydd sy am gael ei ethol. Er na ddarllenais i'n fanwl bob taflen a ddaeth trwy'r drws, dwi ddim yn cofio sylwi ar neb o'r ymgeiswyr yn pledio'i ostyngeiddrwydd. Byddai'n beth anghyffredin iawn, a byddai'r rhan fwyaf yn dweud mai hunanladdiad etholiadol fyddai gwneud y fath beth. Ond mae i ostyngeiddrwydd ran ganolog yn neges yr efengyl. Yn y carchar yr oedd Paul pan sgrifennodd ei lythyr at yr eglwys yn Philipi, ond doedd cyfyngdra'r amgylchiadau ddim yn mennu dim ar ei weledigaeth. Nid fel gwleidydd ond fel Cristion mae'n annog y Philipiaid i fyw mewn heddwch â'i gilydd, gan ofalu nid yn unig am eu buddiannau eu hunain ond am fuddiannau pobl eraill hefyd. Ac ar ganol y darn arbennig yma yn ail bennod y llythyr daw'r cymal anhygoel hwn: 'mewn gostyngeiddrwydd bydded i bob un ohonoch gyfrif y llall yn deilyngach nag ef ei hun'. Prin y gall neb ohonom hawlio ein bod yn gwneud hynny. Ac eto, os dilynwn, meddai Paul, agwedd meddwl Iesu, dyna ble byddwn ni. Fe wacaodd ef ei hun o'i ogoniant dwyfol i gymryd ffurf caethwas a dod ar wedd ddynol, a bod yn ufudd hyd angau ar groes. Ond oherwydd hynny, dyrchafodd Duw ef, 'a rhoi iddo'r enw sydd goruwch pob enw'. Hynny yw, gostyngeiddrwydd Crist yw cyfrinach ei ogoniant. Oes lle i ostyngeiddrwydd mewn byd cystadleuol sy'n rhoi cymaint o bwys ar rym a meddiannau? Oes, os yw gostyngeiddrwydd, fel mae Paul yn awgrymu, yn ein harwain i barchu teilyngdod pobl eraill a pheidio â'u dirmygu a'u hanwybyddu er mwyn bodloni'n huchelgais ni. Oes, os gallwn ddysgu gwrando a pharchu safbwynt eraill o flaen darlledu'n safbwynt ein hunain yn ddiddiwedd. Oes, os oes 'unrhyw apêl o du cariad, unrhyw gymdeithas trwy'r Ysbryd, … unrhyw gynhesrwydd a thosturi'. Dyna fyddai gwleidyddiaeth newydd yn wir.