CYNNWYS

GAIR GAN Y BUGAIL
LLWYBRAU LLYWYDD (2) gan Rhiannon a Bryn
SÔN AM APÊL BANGLADESH… gan ddosbarth Arwyn
Gw^yl Bangladesh
NEWYDDION/PYTIAU/MANION
ER COF
GWEDDI'R EGLWYS
BWRLWM YR YSGOL SUL gan Jên
Fy Hoff Emyn… gan Eluned Morris
capelymorfa.org
Gemau'r Gymanwlad
DYDDIADUR MEHEFIN 2002
SWYDDOGAETHAU MEHEFIN 2002

GAIR GAN Y BUGAIL Mae Capel y Morfa ar y we-fyd-eang! www.CapelyMorfa.org -dyna'r cyfeiriad. Diolch i Ann - mam Owain, Sioned ac Ifan yr ydym bellach yn rhan o'r rhwydwaith ryfeddol hon. Trwy gwmni Almeinig (1&1) mae gennym sawl tudalen, a lle i ymestyn. Yn bwysicach na hynny y mae'r cyfle i greu cysylltiadau â phob math o safleoedd eraill mewn unrhyw ran o'r byd - trwy bwyso botwm. Hyd yma, mae rhai tudalennau yn wag a fe fydd angen gwaith a dychymyg i wneud y safle yn un fywiog: mae Ann yn barod i greu'r safle ar ein rhan. Fe fydd modd cysylltu yn ogystal ag ehangu bywyd Capel y Morfa: CWM., Perthyn, Morlan, Gweithgareddau, pobl, Eglwys Bresbyteraidd Cymru, Cytûn a.y.b. Mae hyn yn golygu y byddwn fel eglwys yn lawer mwy agored; ac i unigolion a theuluoedd sydd yn dibynnu fwy-fwy ar y we, fe fyddwn yn rhan gwbl naturiol o'r cyfrwng cyfathrebu mwyaf a welodd y byd erioed. I lawer iawn o aelodau Capel y Morfa, fydd hyn yn golygu dim. "Rhowch i mi stamp a ffôn" fydd yr ymateb. Er fy mod i yn bersonol yn gwneud defnydd o'r We, yr wyf am gydymdeimlo yn fawr a'r ymateb ac am ychwanegu: rhowch i mi stamp a ffôn - a sgwrs. Yn fwy na dim, rhowch i mi sgwrs. Nid yw bod ar y We yn disodli yr angen nac yn newid y ffaith mai cymdeithas yw'r eglwys. Fe fydd rhai yn awyddus i ddadlau fod yna gymdeithas ar y we erbyn hyn (mae rhai wedi priodi ar y we!!) ond fe fydd yna fwy yn barod i ddadlau mai cymdeithas gynnes, bersonol a byw yw hanfod eglwys. Dyna pam fod yr eglwys yn tyfu a ffynnu yn y mannau hynny ple mae pobl yn dathlu neges ganolog y Pentecost, sef mai fel 'cymdeithas yr Ysbryd Glan' y mae'r eglwys i'w hadnabod bellach. Y gymdeithas yna a'r Ysbryd hwnnw/honno fydd yn rhoi bywyd a lliw yn www.CapelyMorfa.org. Pryderi@btinternet.com

LLWYBRAU LLYWYDD (2)
gan Rhiannon a Bryn

Tri anhepgor Llywydd y Gymanfa Gyffredinol - trwydded yrru lân, passport (a visa yn ôl yr angen), gwraig (neu w^r) sy'n fodlon mentro. Ni fuaswn wedi cynnig defnyddio'r cyntaf yn yr India ond yr oedd y ddau arall yn hollol angenrheidiol.. Yr oedd y daith yn faith (heb sôn am y daith o Aber i Heathrow) - tua 9 awr a hanner i fynd ac 11 awr i ddychwelyd (ar hyd ffordd arall). Cychwynasom o Heathrow tua 2.30 ar Iau, 17 Ebrill, ac oherwydd y newid yn yr amser (rhyw 6 awr a hanner), drannoeth yn y bore bach yr oeddem yn cyrraedd Calcutta. Aros tan 10 cyn hedfan i Guwahati lle'r oedd cynrychiolwyr PCI yn ein disgwyl â char swyddogol y swyddfa i fynd â ni i Shillong. Cymerodd y daith honno o 80 milltir 4 awr a hanner, rhwng oedi i fwynhau'r golygfeydd, tynnu lluniau a chael pryd (?). Yr oedd felly yn 4.30 o'r gloch (amser lleol) arnom yn cyrraedd. Rhaid oedd ymweld â rhai o gyfeillion ein tywysydd ac anfon e-bost adref cyn dychwelyd i'r gwesty, wedi bod ar y ffordd ac ar ddi-hun ryw 30 awr. Ni fu erioed wely esmwythach.

Mae'n anodd cofio cymaint a wasgwyd i mewn i'r 8 niwrnod a oedd ar ôl. Mae'r enwau lleoedd yn rhan o ramant ein cenhadaeth yng ngogledd-ddwyrain yr India, y parthau a elwid gynt Assam a Bengal - Bryniau Khasia, Shillong, Jowai, Cherrapunji (y cyfan yn Meghalaya bellach); yn anffodus nid oedd amser i deithio i Mizoram (Lushai gynt) ond aethom i Silchar a Karimaganj ar y gwastadeddau poeth (ond nid i Sylhet gan mai yn Bangladesh y mae'r dref honno yn awr). Yr oedd rhaglen lawn o gyfarfodydd ac ymweliadau wedi'i threfnu inni: Cymanfa Gyffredinol PCI (19 a 20 Ebrill), ysbyty shillong lle y bu Dr Arthur Hughes y fath ddylanwad, ysbyty Jowai lle'r oedd gwerthfawrogiad didwyll o gyfraniad aelodau ein Heglwys tuag at waith adfer yr ysbyty ar ôl y tân yn ddiweddar, cartref plant amddifad yn Shillong lle bu Mrs Janice Jones (Aberaeron) yn cynorthwyo am gyfnod, a'r plant yn dal i gofio'n annwyl am Auntie Janice. Ein lletywr yn Silchar oedd Parch. Vanlalchunga a'i wraig sy'n gyfrifol am yr orsaf genhadol yno, yntau, fel y cofiwn, yn ymwelydd mor hoffus â'r Morfa llynedd ac yn anfon ei gofion atom oll. Buom mewn tair ysgol a dau goleg, un ohonynt yn Shillong lle mae'r Parch Edwyn Kharkongor yn brifathro ond yn ymwelydd mor gyson ag Aberystwyth a Chapel Seion nes dod yn Gymro anrhydeddus, a'n tywysydd gofalus a charedig trwy'r amser oedd Kit Kharkongor sy'n dymuno cael ei gofio at Alun a Celia (a'r 'plant') gan iddo fwynhau eu lletygarwch rai blynyddoedd yn ôl. At hyn oll cefais i drafodaethau gyda swyddogion yr Eglwys a thri synod a chawsom ni'n dau fynychu sawl oedfa a - gwae ni - gorfod annerch a, choeliwch byth! ganu. Pan fydd yr holl atgofion yn fwy trefnus a'r lluniau wedi'u datblygu, bydd cyfle i grynhodi ein hargraffiadau ond mae rhai na fyddant byth yn newid:-

* croeso, caredigrwydd a haelioni anhygoel pobl Bryniau Khasia, Jaintia, Ri-Bhoi a Mixoram.

* y derbyniad cariadus a thwymgalon a estynnwyd inni yn syml am ein bod yn cynrychioli PCW.

* y pwys diffuant a chynnes a roddir yn swyddogol ac yn bersonol ar y cyswllt rhwng ein dwy Eglwys, y diolchgarwch dwfn a'r llawenydd a fynegwyd am mai 'ni' a ddaeth â'r Efengyl iddynt. 'Chwi yw ein mam a'n tad' ni yw eich plant'.

* ansawdd bywyd yr Eglwys yn ganolog a'r eglwysi yn lleol. Rhoddant bwys ar fod yn Eglwys genhadol, yn gweddïo, yn rhoi, yn anfon; yn pregethu ac yn ymgymryd â phrosiectau 'social action'. Prin y gwneir dim ganddynt, yn eglwysig nac yn bersonol heb weddi.

* Cymanfa Gyffredinol i 800 o gynrychiolwyr mewn pentref o faint Capel Seion ond tyrfa o ryw 25,000 yn mynychu'r oedfaon ar y Sul ar y caeau chwarae.

Ond os oes un darlun yn aros yn y cof, ysbyty Jowai oedd hwnnw, a bydd rhaid sôn am hynny rywdro arall.

Un gair pellach; peidiwn â sôn am 'faes cenhadol'. Mae yma Eglwys gref y gallwn ddysgu llawer ganddi, ond sydd, er hynny, yn haeddu ein cefnogaeth. Yr oedd y cyfan yn brofiad bythgofiadwy na allwn ddiolch digon amdano.

(Yn iaith y byd eglwysig PC yw 'Presbyterian Church'; dim gwobr am ddyfalu beth yw'r 'W' a'r 'I').

SÔN AM APÊL BANGLADESH…
gan ddosbarth Arwyn

Mae Neges Ewyllys Da yn cyrraedd pedwar ban y byd. Beth fydd ei gwerth eleni i rai o wledydd tlotaf y byd? Hyd yma mae 22 apêl o wahanol wledydd yn cael eu cydlynu gan y Groes Goch. Mae ugain ohonynt yn rhai blynyddol. Dyma rai gwledydd y gwneir apêl drostynt eleni:

• Papua Gini Newydd
• Pacistan
• Afganistan
• China
• Dwyrain Timor
• Cambodia
• Sri Lanka
• Vietnam
• De Ddwyrain Asia
• Nepal
• Myanmar
• Lao
• Mongolia

Faint ydych chi'n wybod am Fangladesh? Dyma ychydig o ffeithiau:

• Bangladesh yw un o wledydd tlotaf y byd.
• Mae 130 o filiynau o bobl yn byw yno.
• Cyfartaledd cyflog yw £200 y flwyddyn.
• Mae hanner y bobl (cymaint â phoblogaeth Prydain) yn byw mewn tlodi.
• Mae 60% o blant yn newynu.
• Mae dros hanner plant dan 5 oed o dan eu pwysau arferol.
• Mae dros un plentyn ymhob 10 yn marw cyn eu bod yn 5 oed
• Nid yw 2 berson mewn tri yn gallu darllen nac ysgrifennu
• Ni ddisgwylir i bobl fyw yn hn na 60 oed.
• Ar gyfartaledd fe fydd 44 mil o bobl y flwyddyn yn marw mewn argyfwng, y ffigwr uchaf yn y byd.

Cyfeirir at Fangladesh yn aml fel y wlad fwyaf argyfyngus o bob gwlad yn y byd. Pam? Wel y prif reswm am hyn yw'r tywydd. Rydym ni'n trafod y tywydd ar ddechrau pob sgwrs bron ond ym Mangladesh mae'n destun gofid. Bydd llifogydd cryfion, corwyntoedd, cyfnodau oer a sychder yn eu taro yn eu tro.Effeithir miliwn o bobl yn flynyddol. O'r rhain fe fydd hanner miliwn yn cael eu gwneud yn ddigartref ac ni fydd hanner ohonynt yn cael cysgod a tho dros eu pennau eto.

Eleni rydym â nod cenedlaethol o gasglu £175,000 tuag at Apêl Bangladesh. Nod Capel y Morfa yw £2500. A'i dyma'r apêl gyntaf i'r wlad arbennig yma? Yr ateb amlwg yw na. Ers 1996 mae 12 apêl - ie 12 apêl wedi bod a nifer fawr o'r rhai hynny yn apêl o argyfwng. Felly beth amdani Gapel y Morfa? £2500 yw'r targed. £5.50 yr aelod. Pris darn bach o gig ar gyfer cinio dydd Sul, pris papurau dyddiol am wythnos, cinio ysgol am 4 diwrnod, potel o win. Ydy hyn yn ormod i ofyn?

Gw^yl Bangladesh

Mehefin 14-16

Apêl Bangladesh 2002

Nos Wener Mehefin 14

Swper Bangladesh

7.30 yn y Festri

(Tocyn £4.00 oedolion, £2.00 plant)

Bore Sul Mehefin 16

Addoli gyda Eglwys Bangladesh

a chyfraniad gan Garmon ap Garth (w^yr Mair Wynne Griffith)

sydd wedi treulio blwyddyn yn Bangladesh.....

a derbyn ein rhoddion tuag at yr apêl

(yn yr amlen sydd gyda'r rhifyn hwn o Perthyn)

˜

Prynhawn Sul Mehefin 16

Dawns, caneuon ac arferion Bangladesh

yng nghwmni criw o blant ac oedolion Bangladeshi

am 3.30 yng Nghanolfan y Waun

SYLWER: y mae'r gweithgarwch i'r plant bellach yn rhan o'r gweithgarwch hwn ar brynhawn Sul ac nid ar fore Sadwrn fel y bwriad gwreiddiol

˜

Nos Sul am 6.00

Gwasanaeth o ddiolch

˜

Y penwythnos yma, Mehefin 14-16, fydd ein hymdrech fwyaf tuag at yr apêl: ein nôd yw codi £2,500.

Fe fydd cyfle, wrth gwrs, i grwpiau eraill yn yr eglwys godi arian yn ychwanegol i waith y penwythnos.

NEWYDDION/PYTIAU/MANION

Mae hi wedi bod yn fis o wyrion ac wyresau - Nancy a George Lovatt (w^yr); Mary Williams (wyres); William a Beryl Cynfab Roberts (w^yr); Eirwen a Pryderi Llwyd Jones (w^yr). Llongyfarchiadau iddynt i gyd.

Yn yr ysbyty: Janet Kyffin; D R Thomas; Ceiriog Evans; Tom Davies. Rhai wythnosau yn ôl buodd Morfudd Strange yn yr ysbyty yn Tenerife. Yn yr ysbyty am gyfnod byr hefyd bu Emily Stephens. Rydym newydd glywed am farwolaeth Ceiriog Evans. Estynnwn ein cydymdeimlad i'r teulu.

I'r Bala. Fe fydd Clwb Hwyl Hwyr yn ymweld â'r Bala o Fehefin 21-23. Yr ydym yn dymuno'n dda iawn iddynt ac i Eirwen, Mary a Pryderi fydd yn gofalu amdanynt.

Dymuno'n dda i Nia Lowri a Phil fydd yn priodi yng Nghapel y Morfa ddydd Sadwrn Mehefin 15fed.

Llongyfarchiadau i Owen Williams ar ennill y Victor Ludorum yn mabolgampau'r ysgol. Enillodd Owen y ras 1500 medr, y naid uchel a'r naid hir.

Diolch. Cawsom wasanaeth Pentecost a neges Ewyllys Da i'w gofio dan arweiniad rhai o'r Myfyrwyr a Dosbarth Ysgol Sul Arwyn Thomas. Diolch i'r bobl ifanc am eu cyfraniad. Aeth y criw i gynnal gwasanaeth yn Soar Llanbadarn yn y prynhawn.

Te Pentecost yng Nghanolfan y Waun, 19.5.02.

ER COF

W R Edwards, fu farw ar 1 Mai yn 94 oed. Er nad oedd wedi bod yn y capel ers dros ddwy flynedd, y mae gwacter mawr iawn ar ôl W.R. Yr oedd ei ffyddlondeb a'i gysondeb yn ryfeddol: yr hanner can mlynedd fel Ysgrifennydd Ariannol a chyfrif yr arian pob Sul; y Cyhoeddwr am dros 40 mlynedd a byth yn colli Sul, dim gwyliau, dim penwythnos. Yr oedd yr un cysondeb ynddo fel athro am flynyddoedd yn Ysgol Dinas, yn bennaeth Adran y Gymraeg ac am gyfnod yn ddirprwy Brifathro. Er iddo fyw yn y dref am yr holl flynyddoedd, dyn y wlad ydoedd a'i gynefin yn Ysbyty Ystwyth yn sylfaen ei ddiwylliant a'i gariad at Gymru a'r Gymraeg. Er i'r blynyddoedd olaf fod yn anodd, ni chwerwodd ac fe gadwodd ei ddiddordeb yn fyw ym mhob peth. Collodd ei briod Cassie ddechrau'r flwyddyn hon (ar ôl 60 mlynedd o fywyd priodasol) a dwy flynedd cyn hynny fe gollodd ei fab David yn w^r ifanc. Yr oedd yn ddwy ergyd fawr iddo. Cafodd yntau ei gaethiwo i'r gadair olwyn a bu rhaid setlo ym Mlaenpennal. Ef oedd yr hynaf o'r blaenoriaid ac yr ydym yn diolch i Dduw am ei wasanaeth ac am ei fywyd. Yr ydym yn cydymdeimlo yn fawr â Mair ei ferch (sydd wedi cael cymaint o golledion) a'i phriod Philip Rowland yn Aylesbury ac y mae hithau yn diolch i bawb a fu'n gysur ac yn gefn i'w thad yn ystod y blynyddoedd olaf.

Iwan Rees-Griffiths fu farw ar 14 Mai yn 53 oed. Yn wahanol i W R Edwards, tristwch y marw cynnar sydd yn ein llorio wrth feddwl am Iwan. Er iddo fod yn wael am dros flwyddyn yr oedd y nodyn gobeithiol a chadarnhaol yn Iwan ei hun yn gwneud i ni gyd gredu ei fod yn gwella, os yn araf. Cafodd fywyd llawn, os byr: llawn iawn yn ei deulu a'r fendith a'r hwyl o fagu pedwar o blant; llawn yn ei ffrindiau a'i fywyd cymdeithasol a'i ddiddordeb byw yn ein bywyd a'n diwylliant fel Cymry Cymraeg; llawn yn ei waith a'i wasanaeth i'w gymuned ac fe fu yn gweithio yng Ngholeg y Llyfrgellwyr am dros ddeng mlynedd ar hugain. Y mae'r geiriau yma yn cael eu hysgrifennu ddiwrnod wedi ei farwolaeth a chyn yr angladd, ond mae'n anodd meddwl am newyddion yn lledu mor gyflym, oherwydd mae ardal eang yn rhannu'r galar o golli rhywun sydd yn gadael bwlch mawr ar ei ôl. Yr ydym yn cydymdeimlo'n fawr â Morfudd, sydd wedi bod yn gadarn ac yn dyner ei gofal, ac â'r plant, Sharon, Emyr, Meleri a Bethan, sydd wedi chwerthin a chellwair llawer gyda Iwan ac wrth wneud hynny wedi rhannu cariad a gwerthfawrogiad mawr o dad caredig a phriod tyner. Y mae'r teulu yn diolch am bob cydymdeimlad maent yn ei dderbyn ac yn arbennig y gofal yn Ward Meurig.

GWEDDI'R EGLWYS

O Dduw ein Tad,
Dyro i ni y fath gariad tuag atat
fel y bydd ufudd-dod yn hyfrydwch, nid yn faich;
fel y bydd teyrngarwch yn fraint, nid yn boendod;
fel y bydd Dy gyfraith yn adenydd i'n codi, nid yn gadwyni i'n rhwymo.

Dyro i ni y fath gariad at ein cyd-ddyn
fel y bydd gwasanaethu yn llawenydd yn hytrach nac yn fwrn;
fel y bydd rhoi yn bleser yn hytrach nac yn dreth;
fel y bydd rhannu yn fwyniant yn hytrach nac yn ddyletswydd.

Dyro i ni y fath gariad at Dy eglwys
fel na fydd ei haddoliad yn arferiad llethol ond yn wefr fywiol;
fel na fydd dyletswyddau aelodau yn ddiflas ond yn foddhâd;
fel na fydd gwaith dros Dy deyrnas yn orfodaeth ond yn gyfle.

Bydded i gariad felysu pob ufudd-dod ac ysgafnhau pob tasg,
fel y bydd byw er Dy fwyn Di, a'n cyd-ddyn, a'th eglwys
yn llawenydd pur; trwy Iesu Grist, ein Harglwydd. Amen

(William Barclay, Prayers for the Christian Year t. 100)

BWRLWM YR YSGOL SUL
gan Jên

Rwyf wedi penderfynu y byddaf, yn ystod y misoedd nesaf, yn dod â hanes yr Ysgol Sul i chi gan roi cyfle i chi i ddod i adnabod y criw sy'n gyfrifol am y fenter. Y mis hwn, fe wnaf ddechrau drwy sôn am yr Ysgol Sul ei hun. Mae'r rhai sy'n ei mynychu yn dod o bob rhan o'r ardal - o dref Aberystwyth a'r cyffiniau, o Langeitho i Dre'r Ddôl, a da yw medru dweud fod y nifer sy'n dod yn cynyddu bob blwyddyn.

Mae tua cant o aelodau ar y gofrestr, llawer ohonynt yn Ffrindiau'r Ysgol Sul sy'n dod i'n gweld yn rheolaidd. Mae eraill â'u rhieni yn ddi-Gymraeg, a rhai hefyd heb fod yn aelodau o unrhyw gapel. Ymfalchïwn yn y ffaith fod pawb, yn ddiwahân, yn medru dod atom i fwynhau'r cwmni, pob un wrth eu bodd yn dysgu am Iesu Grist.

Mae tua 60 o blant yn mynychu'r Ysgol Sul yn rheolaidd, o oedran babanod i ieuenctid, a braf yw eu gweld a'u clywed. Mae gennym bump athrawes a dau athro sef Gwenan a'i thîm, (dosbarth babanod), Jean, Eleri, Jên, Mrs Nantlais Williams, Jeremy, ac Arwyn. Daw Marlene a Mary i'n cynorthwyo yn aml, a mawr yw ein diolch iddynt, heb anghofio Wyn, ein Trysorydd ac Eirlys, ein Hysgrifenyddes.

Mae gwaith y dosbarthiadau yn amrywio o ddarllen y Beibl, dilyn hanes Iesu a'i ddisgyblion, tynnu lluniau, fel y gwelwch ar furiau'r Festri, dysgu caneuon, dysgu adnodau, ac wrth gwrs, trafod timau pêl-droed, rygbi, pêl-rwyd a gwyliau! Ac wrth gwrs, ar ddiwedd pob gwers, fe fwynheir bisgedi a melysion, anghenion sydd ym mag llaw pob athro da!

Un TEULU MAWR, hapus yw'r Ysgol Sul ac rydym fel athrawon yn falch o gael perthyn i'r TEULU yma. Estynnaf groeso mawr i chi i ddod i'n gweld ar unrhyw amser i'r Festri i fwynhau'r bwrlwm hapus sy'n llenwi'r lle. Cewch fwy o hanes yr Ysgol Sul yn y rhifyn nesaf o Perthyn.

Fy Hoff Emyn…
gan Eluned Morris

Rai wythnosau'n ôl awgrymwyd y byddai'n syniad i rywun son am ei hoff emyn a'r rheswm dros y dewis hwnnw, fel testun myfyrdod yn y Cylch Gweddi a Choffi. Rwy'n hoff o lawer o emynau ac roedd yn anodd dewis un hoff emyn. Ond mae dau emyn yn yr hen lyfr emynau, a dau gapel yn gysylltiedig â hwy wedi chwarae rhan bwysig ar ddau gyfnod yn fy mywyd. Ar ôl i ni fel teulu symud i fyw i Llanilar pan oeddwn yn bedair a hanner oed dechreuais fynd i'r Ysgol Sul yn Cilcwm, cangen fach o gapel Carmel Llanilar, oedd yn agos i'n t ni. Eglwyswr oedd fy nhadcu a byddwn yn mynd ambell waith i eglwys Rhostie, eto'n agos, ac yn gangen o eglwys Llanilar. Yna ar ôl dechrau yn yr ysgol bob dydd dechrau mynd i gapel Carmel. Ar ôl bod yn y capel bach yn Cilcwm roedd Carmel yn enfawr gyda gallery o gwmpas a'n côr ni ar y gallery. Fel plant Ysgol Plascrug ar ôl eu hymweliad â Morfa, i mi roedd capel Carmel hefyd yn 'amazing'. Gobeithio bydd y rhyfeddod yn aros gyda hwy am eu hoes. Un emyn a ganwyd y tro cyntaf i mi fynd i Carmel oedd Y Nefoedd -

Ar ôl gofidiau dyrys daith,
A gorthrymderau filoedd,
Hyfrydol falm o nefol ryw
I'r wan flinedig fynwes yw -
Cawn orffwys yn y nefoedd.

Dydw i ddim yn cofio un o'r emynau eraill ond o glywed yr emyn yma roeddwn i'n credu mai capel Llanilar oedd y nefoedd. Daeth yr emyn i'r cof eto ddeuddeg mlynedd ar hugain yn ôl. ar drothwy'r Pentecost, pan gladdwyd fy nhad ym mynwent Llanilar, a chôr o ddynion lleol yn ei chanu tu allan i'r t cyn gadael. Yna yng nghyfarfod olaf yr Aelwyd eleni roedd Côr Meibion Caron yn ein difyrru, ac yn gorffen y cyngerdd gyda'r emyn. A minnau'n ôl yn bump oed ar y gallery yng nghapel Carmel.

Mae'r ail emyn yn mynd â mi i ddechrau 1943 a minnau yn yr A.T.S. a newydd symud i Mablethorpe yn swydd Lincoln. Doedd dim capel Cymraeg yno wrth gwrs, ac yn ystod fy mlwyddyn gyntaf doeddwn i ddim wedi cyfarfod ag unrhyw Gymry. Yna cael gwahoddiad gan un o'r merched oedd yn yr un swyddfa â mi i fynd gyda hi i gapel Wesleaidd Saesneg ac i ymuno yng nghôr y capel. Capel bach croesawgar tu hwnt yn enwedig i aelodau'r lluoedd, a chaem wahoddiad hefyd i gartrefi'r gweinidog a'i wraig a rhai o'r aelodau. Yn y capel dod i adnabod swyddog ifanc o dde Cymru ac er nad oedd yn rhugl ei Gymraeg roedd yn braf clywed ei acen Gymreig. Doedd swyddogion y fyddin ddim i gymdeithasau ag aelodau cyffredin y fyddin mewn unrhyw le cyhoeddus, ond tu fewn i furiau'r capel ac yn y cartrefi pobl oeddem ni a fedrai dim un rheol dorri ar y cyfeillgarwch. Emyn a ganwyd yn aml yno oedd Lead Kindly Light - Oleuni Mwyn - a'r llinellau pell oddi cartref wyf, a'r nos yn ddu yn codi tipyn o hiraeth. Ond trwy brofi'r cynhesrwydd a'r cyfeillgarwch yn y capel roedd y goleuni yn arwain a'r nos ddim cweit mor ddu. Dyma'r unig fan lle ces gyfle i fynychu capel lleol, a doedd dim o'r un cynhesrwydd mewn gwasanaeth mewn gwersyll. Mae Salm 84 Mor brydferth yw dy breswylfod, O Arglwydd y Lluoedd yn clodfori teml yr Arglwydd, ac yn ôl Llawlyfr y Beibl Cân Pererin yw'r Salm. Rhyw dipyn o bererin fues innau yn y ddau gyfnod yma a chael cyfle i addoli gyda'r Methodistiaid Calfinaidd, yr Eglwys yng Nghymru, a'r Wesleaid Saesneg. Yna yn rhyfedd iawn, pan yn y cyntedd fel porthor y nos Sul o'r blaen gweld Y Parch T J Davies yn cerdded mewn, a dyna emyn a phererindod arall yn dod nôl i mi. Ar ôl y rhyfel bu T.J. yn mynd a phartïon o bobl ifainc i gynhadleddau yn yr Almaen, ac yn 1952 cefais gyfle gyda 3 arall o Seilo i ymuno â'r parti. Thema'r gynhadledd oedd emyn Martin Luther - Ein Feste Burg - sydd yn Caneuon Ffydd: Ein nerth a'n cadarn dwr yw Duw, ein tarian a'n harfogaeth.

Dim ond pum mlynedd yn Llanilar, wyth mis yn Mablethorpe a rhyw ddeg diwrnod yn yr Almaen ond oherwydd eu cysylltiadau a'r profiadau yn ddigon i wneud i mi sylweddoli gwerth addoli ac na fedraf byth droi cefn ar gapel.

capelymorfa.org Mae Capel y Morfa bellach ar y We! A chyn bo hir bydd modd ymweld â'r safle er mwyn cael gwybodaeth am weithgareddau'r Capel ac i ddarllen Perthyn (gan gynnwys ôl-rifynnau). Gobeithiwn ddatblygu'r safle i fod yn gyfrwng gwybodaeth i aelodau'r Morfa, ond hefyd yn gyfrwng i gyflwyno'n hunain ac i gysylltu â'r gymdeithas yn ehangach. Wrth gynllunio a datblygu'r safle, byddem wir yn falch iawn o unrhyw awgrymiadau a'ch barn am y math o wybodaeth yr hoffech weld yn cael ei chynnwys arni. ANN (ayp@aber.ac.uk) ARWEL (rej@llgc.org.uk)

Gemau'r Gymanwlad Fe wyddoch fod y XVII Gemau'r Gymanwlad ym Manceinion eleni. Cyn y gemau fe fydd unigolion dethol yn cario ffagl y gemau (y 'torch') ar hyd y wlad gan ddechrau yn Iwerddon a gorffen yn y Stadiwm yn Manceinion i gychwyn y Gemau. Mae tri sy'n admabyddus i ni wedi eu anrhydeddu i gynrychioli'r athletwyr Aberystwyth; Ffion Morgan - Ebeneser, Penparcau Dafydd Dylan - Seion, Stryd y Popty Mari Fenton - Capel y Morfa Fe fydd y tri yn rhedeg gyda'r ffagl ar ran o'r daith yng Ngheredigion ar y 14eg a'r 15ed o Fehefin. AURIEL

DYDDIADUR MEHEFIN 2002

GWASANAETHAU'R SUL 10.00 a 6.00

2 Bugail (Cymun yn y nos)
9 Parch Hari O Jones, Llanfairpwll
16 Bugail
23 Parch Gareth Edwards, Caerdydd
30 Bugail

YSGOLION SUL

Plant: Bore am 10.00
Oedolion: ar ôl gwasanaeth y bore

Gw^yl yr Ysgol Sul yn Ysgol Llanilar prynhawn Sul Mehefin 30ain 3.00-5.00 gyda gweithgareddau o bob math.

CYLCH GWEDDI A CHOFFI bore Mawrth am 10.30

CYFARFODYDD WYTHNOSOL - nos Iau am 7.00

6 Cyfarfod Gweddi Cenhadol (yn y Morfa)
13 Fy hoff Ysgrythur
20 Fy hoff Ysgrythur
27 Fy hoff Ysgrythur

CYMORTH CRISTNOGOL

10 Cinio Bara a Chaws yn Eglwys Llanbadarn

GW^YL BANGLADESH (14-16, gweler tudalen 7)

SASIWN GENHADOL CHWIORYDD Y DE 6 Mehefin

Yn ôl y drefn newydd, mae amlen las ar gyfer y Coleg wedi ei chynnwys yn y pecyn amlenni a ddosbarthwyd i bob aelod ddechrau'r flwyddyn. Diolch yn fawr.

Y Trysorydd

SWYDDOGAETHAU MEHEFIN 2002

Blaenor y mis Mr T L Thomas

Porthorion

Mr Merfyn Davies a Dr Alun O Morris
Mr Douglas Jones a Mr David Harries

Blodau'r Cysegr

2 Mrs Glenys James
9 Mrs Auriel Fenton
16 Mrs Valmai Davies
23 Mrs Nellie Griffiths a Mrs Megan Lewis
30 Mrs Margaret Edwards

Cynorthwywyr Llestri Cymun

2 Mrs Miriam Evans, Mrs Eirwen Lewis, Mrs Elsbeth Lewis, Mrs Dilys Thomas (Glyndyl)

Cynorthwywyr Ariannol

2 Mr Alun Morris a Mrs Glenys James
9 Mr a Mrs Merfyn Davies
16 Mr D Meirion Jones a Mrs Beti Roberts
23 Mr a Mrs Emrys Jones
30 Mr a Mrs T L Thomas

Tregerddan

Dan ofal Mr L John Roberts

Deunydd ar gyfer y rhifyn nesaf (rhifyn Gorffennaf) i ddwylo'r Bugail erbyn 23 Mehefin os gwelwch yn dda. Golygyddion y mis: Hywel Lloyd a Laurie Wright.