CYNNWYS GAIR GAN Y BUGAIL JYST FEL JOB CYMANFA GYFFREDINOL 2002 GWEDDÏWN NEWYDDION/PYTIAU/MANION DYDDIADUR AWST A MEDI 2002 SWYDDOGAETHAU AWST A MEDI 2002 MORLAN CYFARCHION O GAER-GRAWNT, MASSACHUSSETTS!

GAIR GAN Y BUGAIL O safbwynt amseriad, nid yw pethau yn mynd o'n plaid y dyddiau yma, ac y mae hynny yn achosi rhwystredigaeth pan yr ydym yn awyddus i bawb wybod beth sy'n digwydd ym mywyd yr eglwys. (Mae cyfathrebu yn parhau yn broblem fawr oherwydd mae rhywun yn gyson yn gwneud y sylw Doeddwn i ddim yn gwybod. Mewn achosion o newyddion am gyd-aelodau mae cyfrifoldeb ar bawb ohonom i rannu gwybodaeth. Cyn belled ag y mae newyddion am ddatblygiadau yn yr eglwysi ei hun yn y cwestiwn, ar wahân i gynnal 'Cyfarfod eglwysig', cyhoeddi yn y capel, gwybodaeth trwy Perthyn a bellach ar y we - mae'n anodd iawn gwybod beth fwy allwn ni ei wneud. O gymryd sylw, darllen a chofio - does dim rheswm nac esgus i neb ddweud Doeddwn i ddim yn gwybod. Pan mae newyddion i'w roi, pan fo materion pwysig i'w trafod, fe allwn eich sicrhau fod y Bugail a'r Blaenoriaid yn ymwybodol iawn mai ein cyfrifoldeb cyntaf yw cyflwyno hynny i'r eglwys gyfan.) A dyna fi - mewn cromfachau - wedi dychwelyd at hen bwnc oesol. I ddod yn ôl at y cwestiwn o amseru. Yn anffodus mae'n rhaid paratoi Perthyn cyn fod gennym yr wybodaeth angenrheidiol ar ddau fater pwysig iawn ac ni fydd Perthyn arall tan ddiwedd Medi. Nid yw mis Awst chwaith yn gyfnod da i rannu gwybodaeth. Un mater yw'r uno â'r Tabernacl a chanlyniad y bleidlais ar 21 Gorffennaf. Y bwriad yw cyhoeddi'r canlyniad ar y Sul canlynol. Mae'n rhaid paratoi Perthyn rai dyddiau cyn y Sul olaf a'n gobaith yw y funud olaf. Y mae hyn yn golygu na fydd yn bosib i ni roi mwy o wybodaeth am yr hyn fydd yn digwydd ddiwedd mis Medi a dechrau Hydref. Ond fe allwn ofyn am ein gweddïau cyson. Y mater arall yw'r Morlan. Ddydd Mawrth 23 Gorffennaf bydd prisiau'r adeiladwyr ar gyfer y datblygiad yn cael eu derbyn. Fe fydd angen wythnos arall i'w hystyried cyn ein bod yn dod i benderfyniad. Ein gobaith yw na fydd y penderfyniad hwnnw yn un anodd ac y byddwn yn medru dweud fod y cyllid gennym a'n bod yn barod i symud ymlaen. Os bydd pethau yn fwy cymhleth yna efallai y byddwn angen rhannu mwy o wybodaeth gyda'r eglwys cyn symud ymlaen. Dyna pam fod yr amseriad yn anffodus ac na allwn gynnwys unrhyw wybodaeth yn y rhifyn hwn o Perthyn. Dan yr amgylchiadau, gobeithio y bydd yr eglwys yn barod i ymddiried yn noethineb, gwybodaeth a chyfrifoldebau Bwrdd Rheoli'r Morlan a'r Blaenoriaid. Pob bendith i bawb yn ystod mis Awst. Pryderi Pryderi@btinternet.com

Deunydd ar gyfer y rhifyn nesaf (rhifyn Hydref) i ddwylo'r Bugail erbyn 22 Medi os gwelwch yn dda.

Yn eisiau - awr o egni! I godi arian i Apêl Bangladesh Dydd Iau, 1 Awst. Ar y prom 11.00-5.00 Reid Rickshaw (o Bangladesh) Angen timoedd o 4 am 2 awr i gynnig reid yn y Rickshaw er mwyn codi arian i'r Apêl. Mae reidio - gan dynnu dau o bobl - yn waith caled! Enwau, ar unwaith os gwelwch yn dda i'r Bugail.

JYST FEL JOB

Fy Nuw, fy Nuw,
Bûm yn galw'n hir amdanat Ti
Yng ngwres yr haul
A ias y lloer,
Chwiliodd fy sgrechfeydd y ffurfafen amdanat Ti.

Fy Nuw,
Pan oedd fy ngharthen yn ddim ond gwlith,
Sachliain ac esgyrn
Y cyfan a feddwn,
Gwaeddais Dy enw Di
Jyst fel Job.

O Dad, O Dad
Rhoddaf fy mywyd yn gyfan i Ti,
Afonydd dyfnion o'm blaen,
Mynyddoedd uchel uwch fy mhen,
Fy enaid a newyna am dy gariad
Ond mae ofnau'n cynnull fel bleiddiaid yn y nos.
Wyt Ti wedi anghofio f'enw?
O Dduw, tyrd at dy blentyn.
O Dduw, paid â'm hanghofio i.

Dywedaist y cawn bwyso ar dy fraich -
Rwy'n pwyso;
Dywedaist y cawn ymddiried yn dy gariad -
Rwy'n ymddiried;
Dywedaist y cawn alw ar dy enw -
Rwy'n galw;
Rwy'n mentro mas ar dy air Di.

Dywedaist mai ti fyddai fy amddiffyniad
Fy unig waredwr gogoneddus
Fy Rhosyn Saron prydferth,
Ac rwy'n mentro mas ar dy air Di.

Gorfoledd, gorfoledd
Dy air Di:
Gorfoledd, gorfoledd
Gair rhyfeddol Mab y Dyn.

Dywedaist y byddet Ti'n fy hebrwng i Ogoniant
Yn gosod lle i mi wrth fwrdd y croeso,
Gorfoledda gyda fy mam yn y Nefoedd
Ac rwy'n mentro mas ar Dy air Di.

I'r llethrau
I'r llwybrau
I'r strydoedd
A'r ffyrdd
A'r traffyrdd
Heibio'n felin glep
A'r pregethwyr canol nos
Heibio'r celwyddgwn, a'r twyllwyr a'r gamblwyr
Ar Dy air Di
Ar Dy air Di.
Ar air rhyfeddol mab y dyn.
Rwy'n mentro mas ar dy air di.

(Cyfieithiad Arwel o un o gerddi Maya Angelou a ddarllenwyd ganddo mewn gwasanaeth cofiadwy iawn Nos Sul, 7 Gorffennaf.)

CYMANFA GYFFREDINOL 2002

Crynodeb o araith ymadawol y Llywydd, Dr Brynley Roberts

Cyfle yw araith ymadawol y Llywydd iddo ddiolch i bawb a fu'n gefn iddo ac yn estyn cymorth iddo dros flwyddyn ei lywyddiaeth. Gan fod y swydd yn hawlio llawer o bwyllgora ac o deithio y mae'n dda cael man i ddychwelyd ato yn gyson er mwyn cofio beth yw diben y gweithgarwch. Efallai na wnaeth aelodau'r Morfa, na Phryderi, fy nghaplan mewn ffaith er nad o ran teitl, lawn sylweddoli mor bwysig fu eich cyfraniad yn y cyfeiriad hwn, ond mae'r flwyddyn wedi atgyfnerthu fy argyhoeddiad mai ein cymdeithas yn ein heglwysi lleol sy'n diogelu ein bywyd ysbrydol fel unigolion, ac fel pawb ohonom bûm i'n ffodus iawn i dderbyn yn helaeth o'r gymdeithas honno yma.

Yn ei araith bydd y Llywydd yn rhoi cyfrif o'i oruchwyliaeth - lle y bu, beth a wnaeth - ond yn bennaf mae'r araith yn crynhoi fel y mae'n gweld pethau yn y Cyfundeb a chaiff fynegi'r hyn a ddysgodd yn ystod y flwyddyn. Clywed rhywun mewn pwyllgor yn ein hannog i gysylltu â chanolfannau hamdden trwy Gymru a gofyn iddynt beidio agor tan ganol dydd ar y Sul er mwyn osgoi'r gwrthdaro â'r Ysgolion Sul oedd hedyn yr araith eleni, wrth i mi ddechrau ystyried a oes gennym hawl fel eglwysi i ddisgwyl triniaeth arbennig gan gymdeithas, a oes gennym safle freintiedig heddiw fel y bu gan yr eglwysi gynt. Gwyddom yr ateb. Ni allwn orfodi cymdeithas i dderbyn ein safonau, ein hagwedd, ein syniadau, ein credoau; a rhaid derbyn ein bod mewn lleiafrif. Maes cenhadol yw Cymru, yn syml am ein bod ni fel Cristnogion ac fel eglwysi yn byw mewn cymdeithas sy'n wahanol inni a heb lawer o ddiddordeb ynom.

Ond mae pob eglwys genhadol erioed wedi bod yn lleiafrif - heddiw megis ddoe - ac ni ddylai hynny godi braw arnom. Gall eglwys Llyfr II Actau fod yn batrwm ac esiampl inni oherwydd ei sicrwydd fod y Crist atgyfodedig yn eu plith oedd yr angor wrth iddynt orfod wynebu sefyllfaoedd a chwestiynau dyrys byw ynghanol cymdeithas â chonfensiynau ac arferion gwahanol i'w rhai hwy. Rhaid i ninnau dderbyn bod yn lleiafrif fel rhywbeth hollol gadarnhaol a normal, ond rhaid inni ddeall hefyd y gwendid sy'n briodol inni; nid y gwendid sy'n codi wrth i ddigalondid ein harwain i anghredu addewidion o nerth Duw, ond gwendid corff briwedig Iesu ar y groes. Y mae'r cymun bendigaid ynghanol ein haddoliad a rhaid inni ddeall mai galwad i gymryd agwedd gwas, fel un islaw sylw a heb freintiau na hawliau, yw ei alwad i'w eglwys. Lefain yn y blawd ydym.

Cofiwn, er hynny, mai eglwys anghysurus yw eglwys genhadol. Mae bod yn eglwys genhadol yn berygl i drefn, i gysondeb a thaclusrwydd oherwydd bydd amrywiol sefyllfaoedd yn creu amrywiol batrymau. A chas gan bob sefydliad amrywiaeth batrymau. Ond dyna sut y down i adnabyddiaeth ddyfnach ohonom ein hunain fel eglwysi, o'r nerth sydd yn ein gwendid ac o gomisiwn Iesu inni wneud disgyblion iddo. Bod yn ddisgybl yw derbyn a bod yn gyfrwng y bywyd newydd a helaeth sydd ynddo ef, y bywyd newydd hwnnw sy'n ein galluogi i fod yn feibion Duw, i rannu yn natur a chymeriad Duw a chael ein dwyn i gyflawnder yn yr Arglwydd Iesu. Methu credu yn yr Iesu byw presennol sy'n gwneud eglwys leiafrifol yn eglwys wan. Dal gafael yn yr argyhoeddiad a'r profiad hwnnw sy'n sicrhau nad pobl yn cilio'n ôl i ddistryw ydym ond pobl y ffydd yn meddiannu bywyd, yn eglwys genhadol sydd yn lefeinio cymdeithas er gogoniant Duw Dad.

GWEDDÏWN

Arglwydd, diolchwn i Ti am y cyfeillion a roddaist i ni
ac am bob perthynas o gariad ac ymddiriedaeth sydd rhyngom.
Diolchwn am y rhai sy'n gwybod y gorau a'r gwaethaf ohonom
ac yn ein caru trwy'r cyfan.
Diolchwn am y rhai sydd bob amser yn barod
i rannu â ni eu cydymdeimlad a'u cefnogaeth.
Diolchwn am y rhai y medrwn chwerthin ac wylo
yn eu cwmni
Diolchwn am y rhai sydd i ni yn gyfryngau
Dy gyfeillgarwch dwyfol Dy hun.

Arglwydd, clyw ein hymbiliau
ar ran Dy eglwys fyd-eang,
cymdeithas Dy gyfeillion Di, o bob cenedl, hil ac iaith;
ar ran y rhai sy'n dioddef gwawd a gwrthwynebiad
oherwydd eu ffyddlondeb i Ti;
ar ran y rhai fu unwaith yn gyfeillion i Ti,
ond sydd bellach wedi Dy anghofio;
ar ran y rhai na chawsant erioed gyfle i'th adnabod;
ar ran y rhai sy'n unig, yn amddifad,
ac yn ddigyfaill.

Arglwydd, gwna ni'n gyfryngau Dy gariad,
fel y cânt wybod llawenydd Dy gyfeillgarwch.

(allan o Y Duw Byw)

NEWYDDION/PYTIAU/MANION

Llongyfarchiadau

i Dr Brynley Roberts ar ei anerchiad ar ddiwedd ei dymor fel Llywydd y Gymanfa Gyffredinol;

i Dr William Cynfab Roberts ar ei ymddeoliad fel meddyg teulu;

i Gwydion Cai, Aled Evans a Joseff Evans ar ennill gradd Prifysgol Cymru;

i Arwel Jones ar gyhoeddi ei gyfrol Diolch i fy nhrwyn;

i Emma Rose a Ben ar eu rhan yn 'The Sound of Music';

i Miriam Evans, 5 Maes Hendre ar ddod yn fam-gu ddwywaith mewn ychydig ddyddiau!

i Merfyn a Jean yn nain a thaid unwaith eto.

Croeso

i Llinos Bonsell a'r plant Steffan ac Owain, 1 Cefn Esgair, er ei bod wedi hen setlo i lawr yn ein plith.

A dymuno'n dda

i Shirley Jones yn ei chartref newydd yn 16 Spring Gardens, a Deian Creunant a Siân Eleri yn eu cartref newydd yn Felin y Môr.

I'r rhai'n sy'n yr ysbyty

Ann Williams, 45 Rhos Hendre, Janet Kyffin a D R Thomas ac wedi dychwelyd o'r ysbyty erbyn hyn y mae Mair Wynne Griffiths ac Elan Closs Stephens. Y mae mam Ann Davies bellach wedi symud o'r ysbyty i Blas Cwm Cynfelin. Anfonwn ein cofion atynt i gyd.

Cydymdeimlo

Yr ydym yn cydymdeimlo yn fawr â Mrs Sheila Jones, 2 Coedlan y Plas, sydd wedi colli ei mam yn ddiweddar.

I'w cofio a'u gwerthfawrogi

Amos Gvirtz

Profiad i'w gofio oedd cael croesawu yr heddychwr o Israel sydd wedi bod yn weithgar ers 40 mlynedd yng nghangen Iddewig-Palesteinaidd o Gymdeithas y Cymod Rhyngwladol. Agorwyd ein llygaid i ddysgu ac i sylweddoli rhai pethau na ddaw i'r golwg drwy'r wasg a'r cyfryngau. Daeth cynulleidfa dda iawn (llawer yn ddi-Gymraeg) i wrando arno ar y nos Sul olaf o Fehefin.

Maya Angelou

Ar y nos Sul cyntaf o Orffennaf cawsom wasanaeth arbennig i rannu ffydd a cherddi Maya Angelou - diolch i frwdfrydedd Arwel o'i chyfarfod ac o fod yn gyfarwydd a'i gwaith. Y mae un o'i cherddi yn y rhifyn hwn o Perthyn.

Barbiciw a Sbalsh!

Daeth yr haul i wenu wrth i deuluoedd yr Ysgol Sul ymgynnull ar draeth y Borth am ginio-barbiciw fore Sul cyntaf o Orffennaf. (Ewch i'r Oriel i weld y lluniau.) Digon o fwyd, digon o gwmni a digon o hwyl. Diolch i'r trefnwyr a weithiodd yn galed.

Gw^yl yr Ysgol Sul yw Sblash (ac nid chwaraeon!) a gynhaliwyd eto eleni yn Ysgol Llanilar. Mae'r plant yn treulio amser mewn gwahanol grwpiau gan ddilyn thema arbennig (grwpiau cerdd, crefft, drama a gemau). Oherwydd bod eleni yn Flwyddyn Bangladesh gwahoddwyd Anna Jane atom (sydd bellach yn gweithio i Cymorth Cristnogol). Y mae'r w^yl yn cloi gydag addoliad a chyflwyno tystysgrifau yr Ysgol Sul.

Henry Richard a Gorfoledd

O fewn deuddydd i'w gilydd cafodd llawer o aelodau'r capel y cyfle i weld dau gyflwyniad i'w cofio. Gwelsom ddiwylliant a doniau bro ar eu gorau yn Theatr Felin Fach yn y pasiant am fywyd a thystiolaeth Henry Richard, Apostol Heddwch. Cawsom yr un fendith yng nghyflwyniad Corws Gorfoledd (y mwyafrif o Benrhyn-coch) ym Methel ar nos Sul, 21 Gorffennaf. Yr oedd awyrgylch arbennig iawn yno ac yr ydym yn ddiolchgar i Nia Lewis, Peter Thomas a'r côr.

Yr Ysgol Sul

Yr ydym yn ddiolchgar unwaith eto i griw gweithgar yr Ysgol Sul yn arbennig am y gwasanaeth 'diwedd tymor' a gafwyd fore Sul, 21 Gorffennaf. Y mae'n amlwg iawn fod y plant yn cael blas, hwyl a bendith yn yr Ysgol Sul.

Cafodd y plant a'u rhieni eu hatgoffa, er na fydd Ysgol Sul, nid yw'r capel yn 'cau' yn ystod y gwyliau. Fe fydd darpariaeth ar gyfer y plant yn ystod yr haf ac yr ydym yn gobeithio'n fawr na fydd yr 'exit llwyr' arferol yn digwydd eleni.

Nos Sul, 15 Medi, 6.00 'Dyna fan na sigla byth' Gwasanaeth arbennig ar achlysur 200 mlwyddiant geni Eben Fardd yn Awst 1802.

Nos Sul Medi 22ain am 6.00 'Sw^n y gwynt sy'n chwythu' Gwasanaeth ar achlysur can mlwyddiant geni a hanner can mlwyddiant marw (Awst 25, 1952) James Kitchener Davies.

DYDDIADUR AWST A MEDI 2002 GWASANAETHAU'R SUL 10.00 a 6.00 Awst 4 Parch D Ben Rees, Lerpwl (cymun yn yr Hwyr) 11 Parch William Davies, Pwllheli 18 Parch Brian M Griffiths, Conwy 25 Unedig Bore ym Methel Parch Ieuan S Jones Aberystwyth Nos yn Seion Parch Gwyn Ieuan Morgan, Llanrhystud Medi 1 Bugail (Cymun yn y bore) 8 Parch Hugh Pritchard, Dinbych 15 Bugail 22 Bugail 29 Bugail YSGOLION SUL Bydd yr Ysgol Sul lawn yn ailgychwyn ym mis Medi Plant: Bore am 10.00 Oedolion: ar ôl gwasanaeth y bore Hwyl Hwyr - Prynhawn Llun 3.45 - 5.00 (o 16 Medi) Clwb Ieuenctid - Nos Wener 7.00 - 9.00 (mis Medi) CYLCH GWEDDI A CHOFFI Bob bore Mawrth am 10.30 CYFARFODYDD WYTHNOSOL Bob nos Iau am 7.00 (ym mis Medi) 5 Cyfarfod Gweddi Cenhadol: Capel y Morfa 12 Myfyrdod a Gweddi 19 Myfyrdod a Gweddi 26 Myfyrdod a Gweddi CYMORTH CRISTNOGOL 2 Cinio Bara a Chaws yn Neuadd Gymunedol y Waun

SWYDDOGAETHAU AWST A MEDI 2002

AWST

Blaenor y mis

Mr Ifan G Moelwyn Hughes

Porthorion

Dr Rhidian Griffiths a Mr L John Roberts
Mrs Eileen Jones a Mrs Beti Roberts

Blodau'r Cysegr

4 Mrs May Roderick a Mrs Eluned Morris
11 Mrs Eileen Jones
18 Mrs Gwen Jones

Cynorthwywyr Llestri Cymun

4 Mrs Carrie Harries, Mrs Glenys James
   Mrs Enid Roberts, Mrs Ethel Williams

Cynorthwywyr Ariannol

4 Mrs Carrie Harries, Mrs Glenys James
   Mrs Enid Roberts, Mrs Ethel Williams

Tregerddan

25 Dan ofal Miss Eleri Davies

MEDI

Blaenor y mis

Dr Alun Morris

Porthorion

Mr W I Griffiths a Dr W J Cynfab Roberts
Mrs Mair Griffiths a Mrs Eira Williams

Blodau'r Cysegr

1 Mrs Beti Richards
8 Mrs Elsbeth M Lewis
15 Mrs Iola Jones
22 Mrs Megan Nantlais Williams
29 Mrs Margaret Morgan

Cynorthwywyr Llestri Cymun

1 Mrs Marlene Gealy, Mrs Valmai Owen
   Mrs Mair Turner, Mrs Margaret Thomas

Cynorthwywyr Ariannol

1 Mr a Mrs Merfyn Davies
8 Mr D Meirion Jones a Mrs Beti Roberts
15 Mr a Mrs Emrys Jones
22 Mr a Mrs T L Thomas
29 Mr J G L Evans a Mr Gwynfor Jones

Tregerddan

29 Dan ofal Mr Geraint Lewis Jones

MORLAN

Llawenydd mawr yw cael cyhoeddi i'r bleidlais ar 21 Gorffennaf fod yn un gref a chadarn (93%) o blaid i Gapel y Morfa a'r Tabernacl (gan gynnwys Ebeneser) fod yn un eglwys o ddechrau Hydref ymlaen. Ein gweddi daer yw y byddwn fel un cangen o eglwys Dduw yma yn Aberystwyth (a ninnau yn un teulu unwaith eto) yn derbyn bendith ac arweiniad yr Ysbryd wrth inni wynebu'r dyfodol yn llawen, yn ffyddlon ac yn llawn ffydd yr Arglwydd.

CYFARCHION O GAER-GRAWNT, MASSACHUSSETTS!

Rydw i'n ffodus iawn o gael gweithio yn y Massachusetts Institute of Technology (MIT i bobl sy'n gwybod be 'di be!) dros yr haf. Mae 'na gynllun arbennig ar y cyd rhwng Prifysgol Caer-grawnt ac MIT sy'n caniatáu i fyfyrwyr groesi Môr yr Iwerydd i weithio ar brosiectau ymchwil yn y naill sefydliad neu'r llall.

Er mai ffisegwraig ydw i, rwyf yn gweithio yn yr adran Peirianneg Môr (Ocean Engineering), yn eu Impact and Crashworthiness Laboratory! Fel yr awgryma enw'r labordy, ffocws yr ymchwil yw arbrofi ac arsylwi adwaith defnyddiau, megis metal, mewn ergyd. Drwy ddeall sut mae metal yn ymddwyn o dan ryw amod arbennig, gall meddalwedd cyfrifiadur fodelu a rhagddweud adwaith yr un metal mewn sefyllfa wahanol. Er mor astrys mae hyn yn swnio, mae'n werth cofio fod diogelwch ceir, awyrenau a threnau yn dibynnu'n fawr ar allu defnyddiau i ymdopi â'r straen a'r rhyddhad enfawr o egni mewn damweiniau grymus. Mae'n amlwg, felly, fod y gallu i ddeall beth fydd adwaith gwahanol ddefnyddiau mewn damwain yn arwain at safonau diogelwch uwch.

Mae'r defnyddiau rwy'n astudio - aluminium honeycomb ac aluminium foam - yn drawiadol iawn. Mae i'r honeycomb, fel yr awgryma'r enw, strwythur o hecsagonau gwag fel a geir mewn cwch gwenyn, ac mae i'r foam stwythur tebyg i sbwng. Mae'r ddau yn arbennig o ysgafn, a gan fod eu dwysedd mor isel, gallant amsugno llawer o egni os tarant yn erbyn gwrthrych mewn ergyd. Yn ogystal â hyn, ni allant ddargludo gwres, sw^n na phelydredd electromagnetig yn dda. Dyma briodweddau atyniadol iawn - gellir deall pam felly y defnyddir y mathau yma o aluminium mewn ceir. Yn wir, mae'r defnyddiau hyn yn high tech dros ben; defnyddiwyd aluminium honeycomb i orchuddio traed y capsiwl Apollo 11 a gludodd gofodwyr i'r lleuad, ac mae'r foam yn cael ei ddefnyddio yng Ngwennol Ofod NASA.

Yn ogystal â gweithio, caf gyfle i fwynhau bywyd yn Boston! Mae'r ddinas yn brydferth iawn; mae gen i olygfa hyfryd o'm stafell yn y neuadd breswyl yn edrych allan ar yr afon Charles gan weld skyline drawiadol Boston yr ochr draw i'r afon. Hyd yn hyn, cefais gyfle i weld y brifysgol yn Havard, gwrando ar gyngerdd gan gerddforfa'r Boston Philharmonic, gweld sioe tân gwyllt ryfeddol fel rhan o ddathliadau '4^th of July', siopa yn siop enwog Macy's a chael llawer o hwyl, wrth gwrs, yn cymdeithasu â'm ffrindiau newydd! Mae'r tywydd wedi bod yn odidog ers i mi fod yma; heulwen bob dydd - nid yw'n anarferol i'r dymheredd fod yn y 80au uchel.

Ydw, rydw i'n ffodus iawn o gael bod yma yn Boston tan ganol Awst. Wedyn caf gyfle i'ch gweld yng Nghapel y Morfa cyn dychwelyd i Gaer-grawnt ym mis Medi. Mae'n braf gallu cadw mewn cysylltiad a darllen 'Perthyn' ar y rhyngrwyd!

Carys Lloyd,
Caer-grawnt, Massachusetts, Unol Daleithiau America