CYNNWYS GAIR GAN Y BUGAIL TAIR OEDFA HANESYDDOL NEWYDDION ER COF TRIP I'W GOFIO - CYMRU v YR EIDAL TEULUOEDD PERTHYN GWOBR HEDDWCH YN WOBR DROS HEDDWCH ... GWASANAETH DIOLCHGARWCH DIOLCH BETH YW GWEDDI? DYDDIADAU I’W COFIO DYDDIADUR TACHWEDD 2002 SWYDDOGAETHAU TACHWEDD 2002

GAIR GAN Y BUGAIL Fe fu'n fis Hydref i'w gofio. Mae adroddiad mewn man arall yn Perthyn sy'n manylu ar Sul yr uno. (Os hoffai rhywun a oedd yn methu bod yn bresennol gael copi o wasanaeth yr hwyr neu'r bore, yna gofynnwch i unrhyw flaenor neu'r Bugail.) Proses adeiladol, creadigol a chyffrous yw uno: mae gennym gymaint i'w roi ac i'w dderbyn gan ein gilydd. Yr oedd y Sul yn fendithiol, yn galonogol â chynulleidfaoedd da. Diolch i bawb a gyfrannodd tuag at yr addoliad yng Nghapel y Morfa ac yn Ebeneser. Ni allwn bwysleisio gormod ar yr angen am weddïo cyson ac am gyfrifoldeb unigol pob un ohonom. Mae'r eglwys yn bod - neu yn methu bod - ym mhob un ohonom. Mae'n wir (ac yn drist) i ddweud mai rhesymau personol yn ymwneud ag unigolion (boed yn aelod, blaenor neu weinidog) yw'r rheswm pennaf fod rhai yn pellhau oddi wrth yr eglwys. Fe fydd eglwys yn gynnes, yn groesawus ac yn un teulu ar sail ei haelodau unigol. Cyfnod braf a bendithiol iawn fydd y cyfnod o barhau'r broses a'r fraint o ddod i adnabod ein gilydd. Nid oes raid ychwanegu y bydd ffyddlondeb a chysondeb i addoli'r eglwys yn gwbwl hanfodol i'r broses honno. Ac fe fu'n fis Gw^yl Diolchgarwch. Unwaith eto, cawsom oedfa llawn asbri a llawenydd dan arweinaid y plant ac yr ydym yn ddiolchgar iawn i Arolyges ac athrawon yr Ysgol Sul am eu gwaith gyda'r plant. (Yr oedd Ebeneser wedi cael eu Gwasanaeth Diolch yn gynharach-ar nos Fercher 11 Medi - ac yn y gwasanaeth hwnnw wedi cael cyfle i ddiolch i Megan Creunant Davies am ei gwasanaeth maith a llongyfarch Bob Davies am ennill Medal Ffyddlondeb yr Ysgol Sul.) Ond fe hoffwn dynnu eich sylw at gyfoeth a bendith y Cyfarfodydd Gweddi dan arweiniad llawer iawn o'n haelodau. Cadarnhad, os bu un erioed, o dri pheth: ein bod yn weinidogion i'n gilydd; fod gennym gyfoeth o adnoddau i'w rhannu â'n gilydd er clod i Dduw; fod dod at ein gilydd mewn grwpiau llai na'r gynulleidfa Sul i fyfyrio, gweddïo, sgwrsio, rhannu a dysgu yn gwbwl allweddol i fywyd eglwys fyw. Pryderi Deunydd ar gyfer y rhifyn nesaf (rhifyn Rhagfyr/Ionawr) i ddwylo'r Bugail, Ann Hawke neu Arwel Jones erbyn 24 Tachwedd os gwelwch yn dda.

TAIR OEDFA HANESYDDOL

Cyhoeddwyd adroddiadau yn ddiweddar yn Yr Angor, y Cambrian News a'r Goleuad yn cyfeirio at ddigwyddiadau cyffrous yn hanes aelodau Eglwys Bresbyteraidd Cymru yn Aberystwyth.

Yn dilyn cyfres o bleidleisiau gan aelodau eglwysi'r Tabernacl a'r Morfa i uno'r ddwy eglwys, cynhaliwyd y cyfarfod olaf yng nghapel y Tabernacl ar 29 Medi dan arweiniad y Parchg Richard Williams, Woodstock, Sir Benfro. Fe'i maged yn yr eglwys, a bu'n pregethu yn gyson yn y Tabernacl dros y blynyddoedd. Bu Côr Meibion Aberystwyth yn ymarfer yn Festri'r Tabernacl ers blynyddoedd, ac roedd yn briodol felly iddynt ganu'r emynau Sanctus a Deus Salutis yn yr oedfa. Cyflwynwyd negeseuon pwrpasol gan Eddie Jenkins, Llywydd Henaduriaeth Gogledd Aberteifi; Eleri Davies ar ran Eglwys y Morfa; ac R. Trefor Evans, Ysgrifennydd Eglwys y Tabernacl. Cymerwyd rhan gan flaenoriaid eraill y Tabernacl: Terry Adams, Elsie Hughes, Huw Owen ac Enid Phillips, a'r organyddes oedd Mary Olwen Owen. Ar yr un noson, yng Nghapel y Morfa, tynnodd y gweinidog sylw at arwyddocâd hanes eglwys y Tabernacl.

Ar y Sul canlynol, 6 Hydref, cynhaliwyd tair oedfa gofiadwy yn yr eglwys unedig newydd, eto dan arweiniad y Bugail. Yng Nghapel y Morfa, yn y bore a'r hwyr, cyflwynwyd gweddïau a datganiadau gan y gynulleidfa gyfan, cydadroddwyd y Gyffes Fer o'n Ffydd, ac roedd yr emynau a ganwyd yn cynnwys addasiad y gweinidog o bedwerydd pennill y gerdd Cymru gan Gwenallt, un o gyn-aelodau enwocaf y Tabernacl; ac emyn gan y Parchg Thomas Levi, gweinidog cyntaf eglwys y Tabernacl. Yn ystod gwasanaeth y bore, cymerwyd rhan gan Noel G. Lloyd ac R. Trefor Evans, ysgrifenyddion Capel y Morfa a'r Tabernacl; plant Ysgolion Sul y Morfa ac Ebeneser; Geraint Jones (yn darllen o'r Beibl oedd ym mhulpud y Tabernacl); Cynyr Rhys; a Rhiannon Hughes a Jen Ebeneser, arolygwyr ysgolion Sul Ebeneser a'r Morfa.

Yn oedfa'r prynhawn, yn Ebeneser, rhoddwyd pwyslais ar weddi, gyda Denise a Catrin Morgan, Alun Creunant Davies, Megan Nantlais Williams a Huw Owen yn cymryd rhan. Yna darparwyd te gan aelodau'r `capel bach' a rhannwyd y gacen ddathlu a baratowyd gan Gwladys Adams.

Cyn ordinhad Swper yr Arglwydd yn oedfa'r hwyr, rhoddwyd ar y Bwrdd hen Gwpan Cymun y Tabernacl. Darllenwyd o'r Ysgrythur gan Enid Phillips a Menai Lloyd Williams, a chyflwynwyd cyfrolau ar hanes yr addoldai sydd bellach yn ffurfio eglwys Capel y Morfa gan bedair aelod sydd â chysylltiadau agos â'r addoldai hyn, sef Mary Olwen Owen (Tabernacl), Lilian Jenkins (Ebeneser), Eira Williams (Seilo) ac Iona Jones (Salem).

Yr organyddion yn ystod y dydd oedd Rhidian Griffiths (bore a hwyr) a Rhiannon Hughes (prynhawn).

Er i ddrysau Capel y Tabernacl gau am y tro olaf fel addoldy ar ddiwedd Medi, agorwyd ar ddechrau Hydref bennod newydd yn ein hanes, gyda chroesawu cyn-aelodau'r Tabernacl i Gapel y Morfa, a Phresbyteriaid Cymraeg tref Aberystwyth bellach yn addoli o dan yr un to.

D. Huw Owen

NEWYDDION

Yn yr ysbyty …

Yr ydym yn anfon ein cofion at nifer o'n haelodau sydd wedi bod, neu sydd yn dal i fod yn yr ysbyty. Y mae llawer y dyddiau hyn i mewn am gyfnodau byr iawn ac mae'n hawdd iawn i Olygyddion Perthyn beidio â gwybod amdanynt. Anogwn unrhyw un (blaenoriaid ac ymwelesau yn arbennig) i roi gwybod i ni os ydych am i ni anfon cofion at unrhyw rai yn arbennig.

• Yn ystod mis Hydref yr ydym yn cofio am Janet Kyffin, sydd yn parhau yn Ysbyty Tregaron (yn effro iawn ei hysbryd ac yn edrych ymlaen am ddod gartref) ac yn anfon ein cofion at Dilys (MG) Thomas, Michael Jones, Eunice Davies a Mary Jones Morris a Huw Jones, i gyd wedi cael ymweliad byr â'r ysbyty; ac Elsie Hughes (Portland Street), Lisi Jones a Huw Hughes (Sw^n y Don, gynt) sydd yn yr ysbyty wrth i Perthyn fynd i'r wasg .

Bedydd

• Dydd Sul 29 Medi bedyddiwyd Owain Cynfab, mab Marc a Non a brawd Beca o Gwm y Glo, Arfon. Bedyddiwyd gan Taid ym mhresenodeb dwy nain, Eirwen a Beryl, a thaid arall, William! Er eu bod yn aelodau yng Nghapel y Rhos, Llanrug, yr oedd yr eglwys yno yn fodlon i Owain gael ei fedyddio yng Nghapel y Morfa. Ac yr oedd Owain yn ddigon bodlon!

Llongyfarchiadau …

• ... i Pryderi sydd wedi ei ethol yn Llywydd y Sasiwn am y flwyddyn 2003 - 2004.

Croesawu

• Ar y Sul, 20 Hydref, croesawyd Gwenlais Jones, 1 Llys Hen Ysgol atom yn gyflawn aelod. Y mae Gwenlais wedi bod yn addoli yn ffyddlon yn Nghapel y Morfa ers amser maith ac yr ydym yn ei hystyried yn un o'r teulu eisioes. Yn wreiddiol o'r Tymbl yr oedd hi a'i diweddar briod yn aelod ym Mheniel, Caerfyrddin cyn dod i fyw i Aberystwyth. Croeso cynnes, Gwenlais.

Gwasanaeth o fendith

• Ar brynhawn Sul cyntaf o Hydref yn y capel cynhaliwyd Gwasanaeth o Fendith a Diolch gyda Meic a Raj Lovatt am Sior Mohan Micaal Sharma-Lovatt - w^yr i George a Nansi Lovatt. Wedi aros un mlynedd ar bymtheg am blentyn ac wedi misoedd pryderus wedi'r geni cynnar, braf oedd cael gwasanaeth o ddiolch oedd hefyd yn cyfannu dau ddiwylliant.

ER COF

R.D. Roberts, Trefin, Ffordd Penglais a fu farw 12 Hydref yn 85 oed. Wrth golli RD yr ydym wedi colli darn mawr o'n hetifeddiaeth Gristnogol Gymraeg: gw^r y pethe yn wir (ac o Lanuwchllyn!); Cymraeg coeth, naturiol; ei gariad at bobl, cymeriadau a chymdeithas yn fawr; blaenor ers 1956; pregethwr cynorthwyol ers dros hanner can mlynedd. Fe gafodd RD flas ar fyw ac yr oedd hynny i'w weld yn arbennig yn ei berthynas â phlant ac yn ei falchder yn ei deulu ei hun: Bethan a Hugh a'u plant Alun, Sioned, Rhys a Sara. Yr oedd yn ymhyfrydu yn eu doniau, eu llwyddiant a'u Cymreictod hwythau. Yr oedd yn gweithio i'r Adran Nawdd Cymdeithasol ac yn ystod blynyddoedd dyrys y tri a'r pedwar degau fe fu'n gwneud y gwaith anodd o geiso helpu teuluoedd mewn amgylchiadau o dlodi mawr: dyma pam yr oedd ganddo gymaint o gydymdeimlad â phobl mewn argyfwng. Collodd ei briod Mair yn 1982 ar ôl gwaeledd anodd ond gofalodd RD amdani heb rwgnach dim. Daeth cynulleidfa fawr i'w angladd ddydd Sadwrn, 19 Hydref: pobl o fro Penllyn a Machynlleth (lle yr oedd yn byw cyn dod i Aber) a sawl ardal ac eglwys arall lle bu'n gwasanaethu yn ffyddlon. Yr oedd yno hefyd gynrychiolaeth dda o'r Aelwyd ac o'r eglwys. Yr ydym yn diolch i Dduw am ei gynhesrwydd, ei urddas, ei ffyddlondeb a'i deyrngarwch, ac yr ydym yn cydymdeimlo â Bethan a'i theulu yn eu profedigaeth. Er i'r blynyddoedd olaf fod yn anodd ac nad oedd wedi bod yn y capel ers tua dwy flynedd, y mae bwlch mawr iawn ar ôl RD.

TRIP I'W GOFIO: CYMRU v YR EIDAL

TEULUOEDD PERTHYN Jim a Helen O'Rourke, Cari ac Alaw Un a gafodd ei fagu yn ardal Hwlffordd yw Jim O'Rourke, ond fel yr awgryma'r enw mae ei wreiddiau ar ochr ei dad draw yn yr Ynys Werdd. Mae'n adnabyddus bellach fel Prif Weithredwr Urdd Gobaith Cymru, ond dechreuodd ei gysylltiad â'r mudiad nôl yn y saithdegau pan gafodd ei benodi'n Drefnydd yr Urdd yn Sir Benfro, ac yntau ag ychydig iawn o frawddegau Cymraeg i'w helpu ar y daith. Ers hynny, treuliodd gyfnod da yn gweithio i'r mudiad fel Pennaeth y Gwersyll yn Llangrannog - ac yn teithio Cymru benbaladr yn canu gyda'r grw^p Rocyn - cyn symud i'w swydd bresennol yn y pencadlys yn Aberystwyth yn 1996. Merch fferm o Gapel Seion yw Helen ar y llaw arall, un o'r flwyddyn gyntaf i fynychu Ysgol Penweddig pan agorodd honno yn 1973. Wedi cwblhau ei chyfnod yno, aeth Helen i Lundain i hyfforddi fel nyrs yn Ysbyty Guy's, cyn dychwelyd i Aberystwyth, a hi bellach yw ymwelydd iechyd Meddygfa Llanilar. Yn ystod y flwyddyn ddiwethaf, mae ei mam hefyd wedi symud o Gapel Seion i fyw drws nesaf i'r teulu bach yn Felin y Môr. 'Anodd tynnu dyn oddi ar ei dylwyth' meddai'r hen air, ac mae'n amlwg fod Cari Elin ac Alaw Haf wedi etifeddu cyrls golau eu mam! Mae Cari newydd gael ei phedair oed, yn mynychu'r Ysgol Gymraeg bob bore, ac yn edrych ymlaen yn fawr i gael mynd drwy'r dydd ar ôl gwyliau'r Nadolig. Dwy oed yw Alaw Haf, ond mae hithau, fel Cari, yn ffyddlon iawn yn yr oedfa fore a'r Ysgol Sul, ac wrth ei bodd yn cael gwrando stori a thynnu llun fel ei chwaer fawr. Maent hefyd wrth eu bodd yn cael mynd lawr i Sir Benfro bob cyfle posibl, i weld Mam-gu a Thad-cu Hwlffordd, ac i dreulio amser yn y garafán sydd ganddynt fel teulu yn un o lecynnau harddaf Cymru ym Mhorthseli. Cafodd Jim a Helen, fel ei gilydd, eu magu mewn teuluoedd Cristnogol, lle'r oedd mynychu lle o addoliad yn bwysig ac yn naturiol, ac mae'n amlwg fod y ddau'n awyddus i roi'r un fagwraeth i Cari ac Alaw. Teimlant "yn freintiedig i fod yn ran o deulu y Morfa lle mae pawb yn ofalus o'i gilydd, yn frwdfrydig ac addfwyn eu ffydd".

GWOBR HEDDWCH YN WOBR DROS HEDDWCH ...

Un sy'n dal y record anrhydeddus o fod yr unig arlywydd ar yr Unol Daleithiau ers 1945 i beidio â gyrru dyn i ryfel a enillodd Wobr Heddwch Nobel eleni. Mae Jimmy Carter yn dilyn yn ôl troed Mandela a Gorbachev wrth ennill y wobr hon sy'n werth $1m. Cyhuddwyd y pwyllgor Nobel o wneud penderfyniad gwleidyddol, o ddefnyddio eu anrhydeddau i feirniadu tactegau diweddar Bush. Fe fyddech yn disgwyl i sefydliadau parchus yn yr oes sydd ohoni redeg milltir yn wyneb y fath gyhuddiadau - ond beth am bwyllgor Nobel? 'Euog!', meddent yn falch.

'Dylid gweld y penderfyniad fel beirniadaeth o'r cyfeiriad a ddewisiwyd gan y weinyddiaeth bresennol,' meddai Gunnar Berge, Cadeirydd y Pwyllgor, 'Mae'n gic yng nghoes pob un sy'n dewis mynd i'r un cyfeiriad â'r Unol Daleithiau.'

Nid dyma'r tro cyntaf iddynt wneud penderfyniadau tebyg. Anrhydeddwyd Andrei Sakarov yn nannedd yr Undeb Sofietaidd yn 1975 a'r Dalai Lama ym 1989, blwyddyn Sgwâr Taianamen. Mae'n chwa o awyr iach gweld sefydliad yn gwneud penderfyniad o'r fath pan fo heddwch yn y fantol ac nid o bellter hanes pan fo heddwch yn foethusrwydd hawdd ei ganmol.

Etholwyd Carter ar gefn y gwrthwynebiad i Viet Nam a gwnaeth hawliau dynol yn un o brif amcanion ei arlywyddiaeth; hefyd rhoddodd baid ar gynhyrchu'r bom neutron ac awyren fomio B1. Defnyddiodd ei arlywyddiaeth i gyflawni ei uchelgais, sef creu cymod rhwng cenhedloedd a sicrhau hawliau dynol.

'Pan adewais i'r Ty^ Gwyn roeddwn i'n ddyn ifanc', meddai, `penderfynais ddefnyddio fy nylanwad i lenwi ambell wagle.'

GWASANAETH DIOLCHGARWCH

Rhai o blant lleiaf yr Ysgol Sul yn cymryd rhan yn y Gwasanaeth Diolchgarwch, 20 Hydref. Cewch weld rhagor o luniau o'r gwasanaeth yn yr Oriel.

Helyntion yr Ysgol Sul ...

• Gofynnodd yr athrawes Ysgol Sul i'w dosbarth wrth iddynt ddychwelyd i'r Capel ar ddiwedd y gwasanaeth, `Pam mae'n rhaid i ni fod yn dawel yn y Capel?' Atebodd un o'r plant lleiaf, `Am fod pobl yn cysgu.'
• Dro arall roedd yr athrawes yn trafod y Deg Gorchymyn gyda'r plant bach. Ar ôl esbonio'r gorchymyn `Anrhydedda dy dad a'th fam', gofynnodd, `Oes 'na orchymyn sy'n dysgu ni sut i drin ein brodyr a'n chwiorydd?' Heb oedi dim, atebodd un o'r bechgyn bach, `Oes, "na ladd"!'

DIOLCH

Ein Tad, criw breintiedig ydyn ni sy'n diolch i Ti heno: yn llonyddwch yr ystafell hon, yn nhawelwch y cyfnos, wedi teithio ar hyd strydoedd heddychlon ein tref o gartrefi clyd a'u cypyrddau'n llawn bwyd. Yma cawn fwynhau'r rhyddid i d'addoli.
Diolch iti am ein breintiau.
Paid â gadael inni'u cymryd yn ganiataol.
Mae llawer wedi aberthu i sicrhau bywyd da i ni, a miliynau yn dyheu am brofi breintiau tebyg.
Diolch i Ti heno fod ein plant mewn gwelyau diogel a'u boliau'n llawn maeth, eu meddyliau bach yn byrlymu breuddwydion wedi gwersi'r dydd.
Cofia'r plant sydd heno'n wynebu perygl, rhyfel, tlodi a newyn.
Mae rhai yn bell, mae rhai yn syndod o agos.
Paid â gadael inni'u hanwybyddu na'u hanghofio.

Diolch i Ti am ein pobl ifainc - eu hasbri, eu hegni a'u brwdfrydedd i brofi bywyd yn ei gyflawnder.
Rho i ni'r doethineb i'w harwain trwy esiampl dda a gweithredoedd egwyddorol.
Mae arnyn nhw ein hangen ni i wrando arnyn nhw, i siarad â nhw, i drafod â nhw ac i gadw drws agored iddyn nhw yn ein cymdeithas.
Paid â gadael i ni eu siomi. A gwared ni rhag anwybyddu eu syniadau a'u cynlluniau at y dyfodol.
Boed i'w cyffro nhw a'u hanghenion fod yn her i ni.

Diolch i Ti am brofiad y bobl hyn yn ein cymdeithas.
Rwyt ti'n gwybod beth maen nhw wedi'i aberthu, ei ddioddef a'i fwynhau yn ystod eu bywydau i fagu teuluoedd, i gynnal cymdeithas wâr ac i sicrhau'r bywyd rydym ni'n ei fwynhau heddiw.
Gweddïwn heno am iechyd, cyfeillgarwch a dedwyddwch dy gariad yn eu plith.
Diolch i Ti am bob unigolyn, o'r ifancaf i'r hynaf yn ein byd. Am y talentau a roddaist i bob un ohonom: mor unigryw, mor amrywiol. Gad inni gynnal yr amrywiaeth ddiddorol, i ddatblygu a chryfhau ein gallu. Helpa ni i ddefnyddio dy roddion i'w llawn botensial i greu byd o heddwch a chymod, a chariad rhwng cenhedloedd a chenedlaethau.

Gwrando'n gweddi, a derbyn ein diolch mwyaf am esiampl hynod dy fab Iesu Grist. Er mwyn ei enw, Amen.

(Cafwyd cyfres o weddïau ystyrlon a bendithiol mewn tri chyfarfod gweddi diolchgarwch - dyma'r weddi olaf o'r gyfres gan Mari Turner. Diolch i bawb a'n harweiniodd.)

BETH YW GWEDDI?

Bu tair ohonom o'r Morfa yn Nhrefeca ar 15 Hydref ynghyd ag eraill o wahanol rannau o Gymru yn ystyried `Beth yw Gweddi?' Clywsom dri siaradwr - Carl Evans, ficer yn Llanfairfechan, yn rhoi cipolwg inni o draddodiad gweddi Sant Ignatius a wnaeth inni fyw stori'r Iesu yn iacháu'r dyn wrth lyn Bethesda, trwy weddi.

Anna Jane Evans wedyn yn sôn am weddi cymuned fel Sgubor Goch yng Nghaernarfon, cymuned sydd ar yr ymylon, gyda llawer o broblemau cymdeithasol. Pwyslais Anna Jane oedd ar i ni weddïo dros bawb: Ein Tad yw agoriad y weddi, nid Fy Nhad; Deled dy deyrnas i bawb, gan gofio'n arbennig am drueiniaid - mewn gwledydd yn y trydydd byd. Soniodd am dri chymhelliad Cymorth Cristnogol - gweddïo, gweithredu a rhoi.

Aled Jones o Borthmadog oedd ein trydydd siaradwr ac arweiniodd ef ni trwy batrymau gweddi cyfoes gyda sleidiau trawiadol iawn. Hyn yn ein tywys i weddi bersonol, ar lafar trwy eiriau neu heb eiriau ac mewn distawrwydd, ac i weddi at yfory yng nghanol byd trafferthus a thymhestlog.

Da oedd i ni fod yno, cawsom fendith fawr.

Gwen Job

DYDDIADAU I'W COFIO

8 Tachwedd  1.00, yn Lolfa Fach Pantycelyn: Orin Langelle o Nicaragua. Trefnwyd ar y cyd rhwng Ymgyrch Cefnogi Nicaragua a'r Morlan.

17 Tachwedd: Yn ystod gwasanaeth yr hwyr, byddwn yn anfon cardiau Nadolig at garcharorion cydwybod. Dewch â'ch cardiau. Byddwn yn falch o gyfraniad tuag at gostau postio.

SWYDDOGAETHAU TACHWEDD 2002 Blaenor y mis Mr John L Roberts Porthorion Mr Ieuan M James a Mrs M Nantlais Williams Mrs Glenys James a Mr Eifion Lewis Blodau'r Cysegr 3 Mrs Marlene Gealy a Mrs Jean L Davies 10 Mrs Mary C Howells 17 Mrs Iona Jones a Mrs Mary Jones Morris 24 Mrs Carrie Harries Cynorthwywyr Llestri Cymun 3 Mrs Valmai Davies, Mrs Gwyneth Clwyd Haydon-Jones, Mrs Gwen Job, Mrs Rhiannon Roberts Cynorthwywyr Ariannol 3 Mr E Meirion Morgan a Mr David Harries 10 Mr D Brian Thomas a Mr David M Evans 17 Mr Alun Morris a Mrs Glenys James 24 Mr a Mrs Merfyn Davies Tregerddan 24 Dan ofal Dr Brynley Roberts a'i ddosbarth