CYNNWYS GAIR GAN Y BUGAIL CYMDEITHAS Y MERCHED NEWYDDION ER COF DIOLCH AM WASANAETH TEULUOEDD PERTHYN NADOLIG LLAWEN ... GWEDDI ADFENT DYDDIADUR RHAGFYR 2002 SWYDDOGAETHAU RHAGFYR 2002

GAIR GAN Y BUGAIL O'r holl wyliau, Nadolig yw'r w^yl pan y mae bron bawb yn gwneud yr ymdrech fwyaf i baratoi. Nid yw pawb, wrth gwrs, yn paratoi cymaint â'i gilydd, ond mae pawb yn paratoi rhywfaint. Pam tybed? Wrth chwilio am ateb fe allwn gymeryd yn ganiataol mai yng Nghymru 'gw^yl grefyddol' fu'r Nadolig yn ei hanfod a'i bod, mewn enw o leiaf, yn w^yl grefyddol o hyd. O gofio hynny, pam yr holl baratoi ? Un rheswm yw fod pawb o bob oed am gydnabod fod yna werthoedd ac ansawdd bywyd yr ydym am eu harddel: caredigrwydd, gofal, daioni, cariad, llawenydd ac mai i'r mwyafrif (o hyd) y teulu yw'r cyfrwng i fynegi ac i dystio i'r gwerthoedd hyn. Y mae'r Nadolig yn meithrin y daioni sydd ynom. Mae pawb felly sy'n paratoi (hyd yn oed trwy brynu un anrheg yn unig) yn ymwrthod â'r holl elfennau mewn bywyd sy'n creu tristwch a dioddefaint a chasineb. I lawer o bobl hefyd dyna yw'r 'bywyd Cristnogol'. Mae'r Nadolig yn gyfle i bawb fod ar eu gorau. Mae'n dathlu'r daioni gwreiddiol sydd ynom a hynny mewn byd lle rydym yn ddyddiol yn gweld effeithiau'r pechod gwreiddiol sydd ynom. Ond mae eglurhad pellach ar y paratoi. I'r rhai sy'n credu, yn hanner credu, yn methu credu neu yn dyheu am gredu (h.y. bron pawb), mae'r Nadolig yn cyhoeddi Newyddion Da i'r byd ac felly yn ddathliad o lawenydd a gobaith. Mae'n rhywbeth gwerth paratoi ar ei gyfer er mwyn i'r dathlu fod yn deilwng o'r Newyddion Da. Rhaid wrth oleuadau, cerddoriaeth, gwleddoedd, gwinoedd, anrhegion, addurniadau … ac eglwysi a phlant ac angylion a chorau. Fe fydd eglwysi yn llawn ac fe fydd bron pawb arall o fewn dim i gydnabod fod yna Newyddion Da yn cael ei gyhoeddi. I'r eglwys, wedi'r ºyl, y fraint a'r dasg - sydd yn gofyn am yr un ymroddiad a pharatoi - fydd dathlu'r Newyddion Da drwy'r flwyddyn. Yr wyf yn ddiolchgar iawn i bawb am eu gofal yn ystod y mis. Ar hyn o bryd mae'n ymddangos y bydd y rhwystr corfforol yma yn fy nghaethiwo yn hirach nag yr oeddwn wedi ei obeithio. Llawer o ddiolch. Nadolig llawen a bendithiol i bob un ohonoch! Pryderi Golygyddion y rhifyn hwn yw Ann Hawke ac Arwel Jones. Deunydd ar gyfer y rhifyn nesaf (rhifyn Chweefror) i ddwylo'r Bugail erbyn 19 Ionawr os gwelwch yn dda.

CYMDEITHAS Y MERCHED

Ydych chi'n wraig ac yn rhydd ar bnawn Mercher? Beth am ymuno â Chymdeithas y Chwiorydd sy'n cyfarfod bob yn ail bnawn Mercher am 2.30 yn y Festri? Mae rhaglen amrywiol gennym ac 'rydym yn mwynhau cymdeithasu â'n gilydd.

Y tymor hwn yn barod cawsom gwmni trigolion Bodlondeb a'r Deva; ar ôl mwynhau te gyda'n gilydd bu Emrys Jones yn ein diddori'n swynol iawn gyda'i ddewis hyfryd o ganeuon. Yn ein Gwasanaeth Diolchgarwch cymerwyd rhan gan bedair o'n haelodau, Megan Nantlais Williams, Ethel Williams, Valmai Owen a Celia Jones.

Ar 23 Hydref croesawyd Dr Beryl Cynfab Roberts i sôn am y newidiadau a welodd ym myd meddygaeth yn ystod y deugain mlynedd diwethaf. Bu datblygiadau enfawr i gynorthwyo'r meddyg gyda diagnosis a thriniaethau ers iddi gychwyn ar ei gyrfa a synnwyd ni gan gymhlethdod y gwaith o drefnu rhediad rhwydd meddygfa fawr. Ni fyddwn yn cwyno o hyn ymlaen pan fydd angen aros am apwyntiad cyn gweld y meddyg. Mae'n amlwg fod Beryl a William yn bwriadu mwynhau eu hymddeoliad ac maent yn haeddu hynny.

'Ar Eich Cais' oedd thema ein cyfarfod diweddaraf. Y syniad oedd fod yr aelodau'n dewis eu hoff gerddoriaeth neu farddon-iaeth gan roi rheswm am eu dewis. Cawsom bnawn arbennig iawn gyda'r dewisiadau yn amrywiol a diddorol a theimlem yn gyffrous wrth i bawb gyrraedd. Arweinwyd ni mewn defosiwn gan Gwen Job ac ar ôl croesawu dwy aelod newydd Gwennaul Jones ac Eunice Davies i'n plith, cyflwynodd ein Cadeirydd eleni, Eileen Sinnett Jones, y dewisiadau.

Bu'r dewis o gerddoriaeth yn eang, o Gôr Madrigal Aberystwyth, Charles Clements yn chwarae organ Seilo, Hogiau'r Wyddfa, Michael Crawford yn canu darn o 'Jesus Christ Superstar' a llawer, llawer mwy! Darllenwyd rhan o 'Sw^n y Gwynt sy'n Chwythu' (Kitchener Davies), adroddwyd Cwm Pennant (Eifion Wyn) a chlywsom hen benillion a gweddi Nadoligaidd. Hedfannodd yr amser gyda phawb yn mwynhau gymaint a theimlem drueni wrth orfod dod â'r pnawn i ben. O ganlyniad, mwynhawyd y baned a baratowyd gan Rona Jones a Megan Nantlais Williams yn fwy nag erioed.

Mae dau gyfarfod eto cyn y Nadolig - beth am ymuno â ni!

NEWYDDION

Dymuno'n dda …

• I Hywel (Cynwyd Jones) a Julie Sikes a fydd yn priodi ar 21 Rhagfyr am 11 y bore yn Brooklet United Methodist Church yn Brooklet, Georgia, UDA. Dymunwn yn dda iawn iddynt ac i'r ddau deulu ar yr achlysur hapus. Yn y flwyddyn newydd fe gawn gyfle i rannu yn y llawenydd mewn gwasanaeth arbennig o ddiolch ar fore Sul yn Nghapel y Morfa ac yr ydym yn edrych ymlaen yn fawr at hynny.

Llongyfarchiadau …

• a chroeso i Madi Aur, cyntaf anedig Gareth Davies ac Melissa, yng Nghaerdydd a'r wyres gyntaf i Hefina Wright.

• i Mr a Mrs Dai Alun Jones ar enedigaeth w^yr, Aled Hywel, i Nerys a Lly^r ap Hywel.

• i Blodwen Bufton sydd mewn Cartref Preswyl yn Abertawe ar ddathlu ei phenblwydd yn 90 oed a Glyndwr Griffiths ar ei benblwydd yn 80 oed.

Dymunwn yn dda …

• i Mary Howells yn ei chartref newydd yng Nghlos y Drindod ac i ddiolch iddi am ei pharodrwydd mawr i gynorthwyo'r eglwys pan oedd yn byw ym Mhanteg. Mae'n golled fawr i ni ac y mae'n anodd meddwl am Banteg hebddi a heb ei charedig-rwydd.

Cydymdeimlad

• Cydymdeimlwn yn fawr â Margaret Evans, 89 Maesceinion a gollodd ei chwaer yn ddiweddar.

• Ac â Mr a Mrs Eric George, Cambrian Street ar farwolaeth eu merch Delyth a fu farw ym mlodau ei dyddiau yn Amwythig. Ni all geiriau fynegi galar Geraint ei phriod a'r plant bach na dirnad y golled o golli merch mor annwyl.

Cofion …

• Anfonwn ein cofion at nifer o'n haelodau sydd yn yr ysbyty neu wedi bod yn ystod y mis: Dewi Jones, Nanno Davies, Mair Pugh, Evan Jones, Jennie Jones, Gwynfor James, Mrs Jean Jones ac O.R. Jones, Huw Hughes ac o Ebeneser: Glenwen Richards (Bronglais); Megan Evans (Gobowen); Erina Ashton (Bodloneb).

ER COF

Hefina Eileen Jones, Leighton, 4 Dinas Terrace, a fu farw ddydd Sul, 17 Tachwedd, yn 87 mlwydd oed. Yn enedigol o'r Borth, bu Eileen yn gweithio ar staff Cyngor Sir Aberteifi am flynyddoedd cyn priodi. Ar ôl priodi â Thomas Richard Jones (Tommy), a weithiai yn Adran Ariannol y Cyngor, gadawodd ei swydd i ofalu ar ôl y cartref a magu dau o blant, Susan a Gwyn. Aelodau yn Eglwys y Tabernacl oedd y teulu. Wedi marwolaeth annisgwyl ei gw^r yn 1972, ailafaelodd Eileen yn ei gwaith yn Adran Addysg, Swyddfa'r Sir. Wedi cyrraedd oed ymddeol, ni fynnai fod yn segur ac ymunodd â'r gwirfoddolwyr yn Siop Oxfam. Bu yno yn ddiwyd iawn am ugain mlynedd. Ers deg mis bu'n cael gofal yng nghartref Cwmcynfelin, ac hyd at yr wythnosau olaf, edrychai ymlaen at gael mynd gartref. Cofir amdani fel dynes garedig a chyfeillgar, yn gymdoges dda, ac yn barod bob amser a'i chymwynas a'i chonsy`rn. Roedd yn mwynhau croesawu perthnasau a ffrindiau i'w haelwyd. Tyst o'r parch oedd gan bawb iddi, oedd y dyrfa a ddaeth ynghyd i'w hangladd yn yr Amlosgfa ddydd Iau, 21 Tachwedd. Heblaw'r teulu, roedd nifer o'r rhai fu'n cyd-weithio â hi ar hyd yr amser, ynghyd â'i chymdogion o Dinas Terrace. Bydd bwlch ar ei hôl mewn sawl cylch. C.E.V.O.

Mrs Annie Eluned Rhynd, 6 Maesheli, Penparcau, a fu farw yn ysbyty Bronglais, 17 Tachwedd, 2002 yn 86 oed.
Roedd ein chwaer yn enedigol o Dal-y-bont ond symudodd y teulu i Aberystwyth ac ymgartrefu yn y Ffynnon Haearn ac yno y magwyd hi. Wedi dyddiau ysgol aeth i weithio i Pickford, y Ffotograffydd, a derbyn hyfforddiant mewn datblygu a phrosesu lluniau. Cafodd ei galw i ddyletswydd adeg y rhyfel a bu'n gwasanaethu gyda'r W.A.A.F. lle bu'n defnyddio'i sgiliau yn prosesu'r ffilmiau a dynnwyd gan yr awyrennau rhagchwilio. Yr oedd ganddi gof byw o drin y lluniau o'r awyr cyn ac wedi'r cyrch bomio i fylchu argaeau enwog y Ruhr yn 1943. Ar ddiwedd y rhyfel, ailgydiodd yn ei gwaith ac aros yn Aberystwyth tan iddi briodi a symud i fyw i Glasgow, lle treuliodd gyfnod hapus. Wedi byw am beth amser yn Cradley Heath, dychwelodd gyda'i phriod i'w chynefin, gan ymgartrefu yn y diwedd ym Mhenparcau.
Collodd ei phriod John yn 1995 ac yn fuan wedi hynny dirywiodd ei hiechyd, ac ni chawsom ei chwmni yn Ebeneser megis cynt. Roedd yn ffodus iawn o'i theulu a mawr fu eu gofal ohoni yn y cartref ac yn yr ysbyty.
Dynes fach o ran corff ac un yn hoffi'r encilion oedd Mrs Rhynd ond yn fawr yn ei chonsy`rn am eraill ac yn uchel ei pharch yn yr eglwys a'r gymdogaeth. Cydymdeimlwn â'i nithoedd, Susan, Dianne, Ruth a'u teuluoedd.
Bu'r angladd ddydd Iau, 21 Tachwedd: gyda gwasanaeth yn Ebeneser cyn mynd ymlaen i'r Amlosgfa.

Mari Roberts, 1 Maesceinion a fu farw ym Modlondeb ar 19 Tachwedd. Bu blynyddoedd yr Altzheimer yn faith ac yn anodd ond nid aeth a phopeth oddi ar Mari: yr oedd ei sirioldeb a'i gwên yn mynnu parhau; yr oedd ei chariad at Nanmor a'i gwreiddiau yn ennyn ymateb; yr oedd emyn a charol yn bywiogi ei llygaid. Fe gafodd hi a Dennis ddathlu Priodas Aur yn ddiweddar a'r ymrwymiad, y llw, y gofal a'r cariad wedi dyfnhau. Bu gofal a chariad Dennis yn angor iddi. Yr oedd staff Bodlondeb yn meddwl y byd ohoni, fel ei ffrindiau i gyd. Rhoddodd Eluned, ei merch, deyrnged iddi ar ran ei chwaer Megan a'r wyresau Gemma a Milly a diolch am fam oedd yn llawn hwyl, yn llawn cydymdeimlad ac yn llawn ffydd. Bu'n ffyddlon i'w heglwys a thrwy ei gwaith gydag Oxfam, CAB a'r Samariaid gwasanaethodd ei Harglwydd yn ei chymdeithas. Gwyn eu byd y rhai addfwyn oedd y geiriau ar daflen yr angladd yn y capel - cwbl, cwbl addas. Diolch i Dduw amdani.

Diolch am wasanaeth maith

TEULUOEDD PERTHYN John, Siân, Eirug, Geraint, Anest, Rhodri a Nerys Mae wastad yn braf gweld criw da o blant yn yr Ysgol Sul ar fore Sul, ac fel y gwelwch o'r llun uchod, mae teulu Dwylan Rhydyfelin yn cyfrannu'n helaeth at y niferoedd hynny! Mae John a Siân a'u gwreiddiau ill dau yn ardal Aber-ystwyth, y ddau wedi mynychu'r Ysgol Gymraeg yn y dref a chyda'r disgyblion cyntaf oll i fynd i Ysgol Penweddig pan agorodd. Ar ôl cyfnodau'n gweithio i Undeb Cenedlaethol y Ffermwyr, Cwmni Arwerthwyr King Thomas ac Asiantwyr Tai John Emms, John bellach yw Rheolwr Canolfan Fwyd Horeb ger Llandysul, ac ef hefyd fydd ymgeisydd y Democratiaid Rhydd-frydol yn Etholiadau'r Cynulliad fis Mai nesaf. Treuliodd Siân gyfnodau fel athrawes Gymraeg yn Llanharri a Phenweddig, cyn dilyn ôl traed y teulu ac agor siop ddillad Tasha yn Stryd y Ffynnon Haearn. Eirug yw'r hynaf o'u pum plentyn, ac mae ef bellach yn mwynhau ei ail flwyddyn ym Mhenweddig, a'i brif ddiddordebau yw chwarae rygbi, drama - a ffilmiau James Bond. Mae Geraint yn 11 oed, yn gantor ac actor wrth reddf, a'i hoff ddiddordebau ef yw rygbi, gwaith coed a cherddoriaeth o bob math. 10 yw Anest wedyn, ac mae hi wrth ei bodd yn marchogaeth, canu'r clarinet a gwneud crochenwaith. Ac yna, newydd gael eu tair oed, mae Nerys a Rhodri, yr efeilliaid, y ddau wastad, fel y teulu i gyd, yn fwrlwm o wên a sgwrs, ac yn edrych ymlaen i ddechrau yn yr Ysgol Gymraeg ar ôl y Nadolig. Mae cael pawb yn barod i gychwyn am yr Ysgol Sul ar fore Sul yn dipyn o waith mae'n siw^r, heb sôn am gyrraedd Hwyl Hwyr, y Clwb Ieuenctid, gwasanaethau arbennig, pwyllgorau apêl y Morlan, ymarferion côr y mamau, ac yn y blaen. Ac mae'r Morfa heb os yn elwa'n fawr o gyfraniad ac ymroddiad teuluoedd fel hyn. Ond a yw teulu Dwylan yn credu fod yr ymdrech i ymroi i gapel neu eglwys yn werth chweil? "Fel teulu, mae'r capel a'r eglwys wedi chwarae rhan bwysig yn ein bywydau erioed - John yn gyn-aelod o Eglwys Llanilar a Siân yn gyn-aelod o gapel Gosen, Rhydyfelin - profiad a fu'n werthfawr yn ein plentyndod ni. Peth hollol naturiol inni felly oedd dymuno i'r plant ddilyn yr un trywydd, ac rydym yn ystyried ein hunain yn ffodus iawn o fod yn rhan o'r gymdeithas glòs sydd yn y Morfa o dan arweiniad arbennig ein bugail. Mae'r ffaith fod y plant mor barod i ddod i'r Ysgol Sul, heb unrhyw ddadlau a thwyllo, yn brawf pendant o lwyddiant y Morfa yn wyneb cymaint o atyniadau eraill sy'n cystadlu."

NADOLIG LLAWEN ...

Fy hoff Garol

I orwedd mewn preseb … (450)

I orwedd mewn preseb rhoed Crëwr y byd,
nid oedd ar ei gyfer na gwely na chryd;
y sêr oedd yn syllu ar dlws faban Mair
yn cysgu yn dawel ar wely o wair.

A'r gwartheg yn brefu, y baban ddeffroes,
nid ofnodd, cans gwyddai na phrofai un loes.
'Rwyf, Iesu'n, dy garu, O edrych i lawr
a saf wrth fy ngwely nes dyfod y wawr.

Tyrd, Iesu i'm hymyl, ac aros o hyd
i'm caru a'm gwylio tra bwyf yn y byd;
bendithia blant bychain pob gwlad a phob iaith,
a dwg ni i'th gwmni ar ddiwedd y daith.

Fel gêm o bêl droed mae hon yn garol o ddau hanner - ond fod hon yn rhannu braidd yn flêr ar ganol yr ail bennill.

Un o fy hoff bethau i am y Nadolig yw fod 'Mair' a 'gwair' yn odli. Odl gyfarwydd, tôn gyfarwydd: y canllawiau cyfarwydd hynny sy'n arwain rhywun yn gwbwl ddidrafferth bob cam yn ôl i set fawr yr ysgol Sul ac i lwyfan yr Ysgol Gynradd. Rhywbeth y mae modd dibynnu arno i fod yno bob Nadolig. Ond mae rhagor i'r hanner cyntaf yma na hynny hefyd. 'Gwair' yw'r gair sy'n odli gyda Mair. Gwair nid felfed na thinsel na gwlân cotwm ond gwair mewn stabl a'r sêr yn syllu drwy dyllau'n y to, os mynnwn ddychmygu stabl orllewinol o ran pensaernïaeth! Dyma eni'r Brenin Tlawd - un o fy hoff ddisgrifiadau i o Grist - yn faban diniwed yn gwybod na phrofai'r un loes o'i warchod gan fam a Thad, cyfeillion, cydnabod, a chreaduriad y maes

Ond mae tro yn yr ail hanner. Nid y baban sydd yn yr ail hanner ond y brenin. Nid yw'n cael ei warchod ond mae o yno i warchod - a chan ein bod ni'n chwilio am odlau - mae o yno 'o hyd … yn y byd'. Yno wrth erchwyn gwely pob un ohonom yn blant bychain pob gwlad a phob iaith a'r rhai sy'n nesu at ddiwedd y daith.

Gobeithio y bydd y Nadolig hwn yn fodd i fynd yn ôl i gwmnïaeth gwyliau (ac odlau) a fu ac i edrych ymlaen at gwmnïaeth ein gilydd yn y flwyddyn sydd i ddod.

A blwyddyn newydd dda …

Addunedau blwyddyn newydd …

• I drin addunedau fel pethau y medraf eu cadw ac nid fel pethau i'w hanghofio erbyn canol Ionawr!
• I gofio bod colli rhiant neu blentyn yr un mor erchyll yn Irac ag ydi o yng Nghmru.
• I gofio bod tlodion ar strydoedd Aberystwyth yn ogystal â Baghdad.
• I beidio â smocio - a chan nad ydw i'n smocio p'run bynnag fydd o leia un adduned yn weddol hawdd cadw ati - a dyna dorri'r adduned gyntaf cyn cychwyn!

Arwel

GWEDDI

Cyd-weddïwn

O Dduw ein Tad,
cofiwn y Nadolig hwn sut y daeth y Gair Tragwyddol yn gnawd, a phreswylio yn ein plith.
Diolchwn i ti na allwn mwyach feiddio dirmygu neu gam ddefnyddio'r corff gan dy fod wedi ei wneud yn breswylfod i ti dy hun.
Diolchwn i ti fod yr Iesu wedi gwneud diwrnod o waith fel unrhyw lafurwr;
iddo gyd-fyw mewn teulu,
iddo orfod ennill ei fywoliaeth,
iddo wynebu rhwystredigaeth a blinder pob gwaith beu-nyddiol a thrwy hynny ogoneddu pob gorchwyl.
Diolchwn i ti am iddo rannu profiadau cymdeithasol
a mwynhau priodasau a gwyliau a chiniawa.
Gwna i ni gofio ei fod yn westai anweledig ym mhob cartref.
Diolchwn i ti iddo yntau brofi cyfeillgarwch a gelyniaeth, llawenydd a phoen yn ei berthynas ag eraill.
Diolchwn i ti ei fod ef wedi profi popeth bynnag a all ddigwydd i ni, a thrwy hynny ei fod yn gallu ein cynorthwyo ni ym mhob sefyllfa.
Na âd i ni anghofio ei fod yn deall pob agwedd o'n bywyd, a'i fod Ef wedi addo bod gyda ni i'n helpu bob amser.
Er mwyn ei gariad
Amen.

(Cyfieithiad o weddi gan William Barclay)

ADFENT

Adfent yng Nghapel y Morfa

1 Rhagfyr: Sul cyntaf yr Adfent
Bore: Y Duw sy'n geni
Golau'r gannwyll a darllen y Gair: Dafydd Pugh Jones a'r plant
Gair wrth y plant: Eirian Evans
Myfyrdod: Duw fel mam (Bugail)
Hwyr: Noson dawel yr Adfent
Gwasanaeth o gerddoriaeth, gweddi a myfyrdod tawel ar gyfer
Sul cyntaf yr adfent dan arweiniad Rhidian a Catherine Griffiths a'r Bugail

8 Rhagfyr: Ail Sul yr Adfent, Sul y Beibl
Bore: Gair disglair Duw
Golau'r gannwyll a darllen y Gair: Luned Rowbotham a'r plant
Gair wrth y plant: Rhys Huws
Myfyrdod: Er mor danbaid yw dy ddisgleirdeb ... (Bugail)
Hwyr: Gw^yl o gân ac o garolau
Gwasanaeth diwedd tymor y myfyrwyr yng nghwmni Côr Pantycelyn
Arweinydd: Euryn Jones.
Organyddes: Mary Jones Morris
Neges Nadolig gan Ffred Ffransis
Casgliad tuag at y Samariaid

15 Rhagfyr: Trydydd Sul yr Adfent
Bore: Gwasanaeth Bedydd Tomos Huw, mab Sharon a Chris Wilson
Golau'r gannwyll a darllen y Gair: Sara Llewelyn a Dafydd
Myfyrdod: Dim lle (Bugail)
Hwyr: Yr harddwch sy'n parhau ... ...
Myfyrdod ar y geni drwy lygaid yr arlunydd
dan arweiniad Phil Garratt a'r Bugail

22 Rhagfyr: Pedwerydd Sul yr Adfent
Bore: Llith a charol a neges Nadolig y Bugail
Golau'r gannwyll a darllen y Gair: Mattie, Enid ac Eleri Jones
Ebeneser am 2.15: Gwasanaeth Nadolig y Plant
Hwyr yn y Morfa am 5.00
O llawenhawn, cyd-lawenhawn: Gwasanaeth dan arweiniad plant a phobl ifanc
yr Ysgol Sul a chyfraniad gan Gôr Merched rhieni'r Ysgol Sul

Bore'r Nadolig, 10.30
Wele'n gwawrio, ddydd i'w gofio
Bydd casgliadau Sul y Nadolig a bore'r Nadolig yn gyfle
i gwblhau Apêl Bangladesh

Dydd Calan: Mercher, 1 Ionawr
10.30-11.00: Gwasanaeth croesawu 2003 a mynd am dro ar y prom

Dydd Gwener, 20 Rhagfyr am 5.30

Parti Nadolig yr Ysgol Sul

Bydd plant yr Ysgol Sul yn rhannu anrhegion Nadolig i aelodau hynaf yr eglwys ac yn derbyn yr enwau ar ddiwedd Parti'r Ysgol Sul

Parti Nadolig y Clwb Ieuenctid

A chanu carolau ym Modlondeb

Nos Wener, 13 Rhagfyr am 7.00 ym Modlondeb

SWYDDOGAETHAU RHAGFYR Blaeor y Mis Dr W J Cynfab Roberts Porthorion Ms Gwenan Creunant a Mr D Alun Jones Mr John G Evans a Mr Hywel Jones Blodau'r Cysegr 1 Mrs Janet Kyffin 8 Mrs Edna Jones 15 Mrs Enid Roberts 22 Yr Ysgol Sul 29 Yr Ysgol Sul Cynorthwywyr Llestri Cymun 1 Mrs Myfanwy Appleton, Mrs Eluned Morris, Mrs Dilys Stephens, Mrs Blodwen Williams Cynorthwywyr Ariannol 1 Mr D Meirion Jones a Mrs Beti Roberts 8 Mr a Mrs Emrys Jones 15 Mr a Mrs T L Thomas 22 Mr J G L Evans a Mr Gwynfor Jones 29 Mr Hywel Lloyd a Mrs Glenys James Tregerddan 29 Dan ofal y Bugail.