CYNNWYS GAIR GAN Y BUGAIL NEWYDDION ADOLYGIAD ER COF Y TIR SANCTAIDD FFAGL GOBAITH TE'R PENTECOST BALA, GWASANAETH A BARBECIW Y MORLAN AILBEINTIO'R CAPEL Y DARGANFYDDIAD DYDDIADUR MEHEFIN 2003 SWYDDOGAETHAU MEHEFIN 2003

GAIR GAN Y BUGAIL Pan ofynodd yr arbenigwr i Eifion Powell yn Ysbyty'r Waun, Caerdydd, a hoffai gael triniaeth by-pass, atebodd Eifion, They've had one in Carmarthen and Dolgellau, so I might as well have one. Cefais innau driniaeth yn Ysbyty Stoke ar 10 Ebrill, ac yr wyf yn diolch i Dduw am pob arbenigedd a gofal a dderbyniais ac am bob caredigrwydd a dymuniadau da ar ôl hynny. Yr wyf bellach yn teimlo fy hun yn gwella pob dydd a chyda'r gobaith o gael sêl bendith y meddyg yr wyf yn bwriadu ailgydio yn y gwaith ar Sul y Pentecost. Dyna pam fod y golofn hon y mis yma ar ffurf gwahoddiad. GWAHODDIAD I be? i ddathlu'r Pentecost: gw^yl yr Ysbryd Glân a phen blwydd yr eglwys. Pa bryd? Sul y Pentecost 8 Mehefin am 10.00 y bore I bwy? i BAWB plant …pobl ifanc … (fe gewch weddill y dydd i boeni am arholiadau!) … ffyddloniaid … yr addolwyr achlysurol … rhai sydd wedi anghofio addoli … Dewch i gyd i ddathlu bod yn deulu'r eglwys. Côr y Plant, cyfraniad gan ieuenctid, Parti Dynion. Ar ddiwedd y gwasanaeth fe fyddwn yn gollwng yn rhydd golomennod y Pentecost. Coffi neu ddiod oer yn y festri ar ôl y gwasanaeth. Edrychaf ymlaen yn fawr i gael eich cwmni! Pryderi

NEWYDDION

Bedydd

• Dydd Sul 11 Mai bedyddiwyd Siôn Erwan, mab i Huw a Catrine Chambers a brawd i Mari ac Iwan.

Cofiwn am ...

• Mrs Eiriana Ashton, sydd dan ofal arbennig yng Ngolygfa, Cartref Bodlondeb, ers peth amser, ar ôl cael mynd i Ysbyty Glangwili yn ddiweddar am driniaeth sydyn. Mae bellach wedi dychwelyd i Bodlondeb lle mae'n derbyn cymorth yng nghanol ei sefyllfa anodd a thrist.

Diolch

• Dymuna Miss Lili Charles, 33 Maes Gogerddan, ddiolch i Pryderi ac Eirwen ac aelodau Capel y Morfa am eu gofal a'u hymweliadau cyson â hi yn ei chartref ac yn yr ysbyty lle mae'n treulio cyfnod ar hyn o bryd.

Dymuniadau gorau i

• i ddwy fydd yn priodi cyn diwedd Mai (Gwn ei ddyfod, mis y mêl…): Luned Rowbotham a Jonathan Lee Williams, Llangeitho a Margaret Evans, Buarth Lodge a David Jenkins;
• i'n pobl ifanc sydd eisioes wedi dechrau ar lafur arholiadau TGAU, lefel A, arholiadau gradd, ac ati;
• i nifer o'n haelodau sydd yn yr ysbyty neu wedi bod yno yn ystod y mis: John Evans, May Roderick, Mair Wynne Griffith, Dora Protheroe, Lilly Charles, Morfydd Hughes ac anfonwn ein cofion hefyd at Tom Roderick sydd yn uned Golygfan ym Modlondeb. Ymddiherwn os oes rhywun arall nad ydym wedi eu henwi.

Cydymdeimlwn â ...

• Sera Llewelyn, 1 Llwyn Afallon, Aberystwyth, a gollodd ei mam yn ddiweddar.
• Valmai Davies, Coed-y-pry, Heol Llanbadarn, a gollodd ei mam hithau yr wythnos hon.

Rhai o ddosbarth Ysgol Sul Gwenan
(Alaw, Cari, Mari, Ryan ac Ifan)

ADOLYGIAD

• Pregethwr: Dr Rhidian Griffiths

• Dyddiad: Nos Sul, 18 Mai

• Emynau: 3

• Hyd y gwasanaeth: 50 munud

Digwyddiadau'r daith i Emaus oedd gan Rhidian dan sylw yn y gwasanaeth gyda'r nos. Arwyddocâd y daith a'i neges hi i ni; hynny ac emyn cyfarwydd rownd derfynol Cwpan yr FA - Abide with me. Roedd y teithwyr yn troi o Jerwsalem gan drafod arwyddocâd y digwyddiadau y buont yn dystion iddynt. Edrych yn ôl a thrafod yr hyn a fu.

Maent yn cael cwmni dieithryn ac yn ei wahodd i mewn i rannu eu llety gan fod y dydd yn tynnu ato a'i bod hi'n mynd yn rhy hwyr i deithio. 'Aros gyda ni', medden nhw, 'abide with us'. Ymhen dim maent yn dystion i'r digwyddiad mwyaf oll: maent yn cael cwmni gogoneddus y Crist atgyfodedig. Presennol delfrydol y gellid oedi ynddo.

Ar ôl ymddangos iddynt mae'r Crist yn diflannu o'u golwg ac maent hwythau'n troi yn ôl tuag at Jerwsalem i gyhoeddi'r newyddion da. Yn wynebu bygythiadau dyfodol ansicr.

Ni allent oedi yn y presennol delfrydol, nid ydynt yn dewis edrych yn ôl yn barhaus a thrafod yr hyn a fu ond yn hytrach maent yn troi tua'r dyfodol - dyfodol anodd, peryglus a'r eglwys, y lleiaf fu hi erioed, yn wynebu dyfodol ansicr iawn. Ond troi tua'r dyfodol wnaethon nhw yn y sicrwydd fod y Crist, y tu hwnt i derfynau amser, yno gyda hwy. A'u gweithred yn un obeithiol, yr un mor obeithiol â'r emyn sydd mor aml yn cael ei chysylltu ag angladdau a rownd derfnyol Cwpan yr FA.

Ydi'r neges yn glir?

Beth am sgwennu adolygiad o bregeth a glywsoch chi yn ddiweddar? Does dim rhaid iddi fod yn y Morfa, does dim rhaid iddi fod yn un dda. Beth am ddweud eich barn ar dudalennau PERTHYN?

Y gwasanaeth yn yr ardd ar Sul y Pasg

ER COF

Gwynfor James, 26 Ffordd Min y Bryn, a fu farw'n dawel yn ysbyty Machynlleth. Yn yr angladd preifat i'r teulu ar 12 Mai soniodd y Parchedig Elwyn Jenkins amdano fel gw^r teulu a chartref a gafodd fywyd llawn er iddo farw yn gymharol ifanc. Gwerthfawrogodd ei deulu yn fwy efallai oherwydd iddo ef ei hun golli ei dad a'i fam pan oedd yn blentyn ifanc yn Nhregaron. Bu'n gweithio am flynyddoedd ar y rheilffordd ac yna yn y Llyfrgell Genedlaethol. Wedi ymddeol teithiodd ef a'i briod Beryl yn helaeth gan werthfawrogi 46 mlynedd o fywyd priodasol a chyfoeth magu tri o fechgyn, Elfed, Aneurin a Gareth. Yr oedd wrth ei fodd gyda chwaraeon yn enwedig bowlio a chefnogi tîm pêl-droed Aberystwyth. Aelod yn y Tabernacl oedd Gwynfor ac yr oedd perthyn i'r eglwys yn bwysig iawn iddo. Yr ydym yn cydymdeimlo yn fawr â'r teulu: teulu a roddodd gymaint o lawenydd iddo ac yn ystod y misoedd olaf anodd, cymaint o gysur hefyd. Y mae'r myfyrdod/gweddi yn y rhifyn hwn yn sôn am y rhai sydd â'u calon yn drwm gan alar ac y mae'r Pentecost yn sôn am yr Ysbryd sy'n Ddiddanydd. Bendith arnoch fel teulu.

Y TIR SANCTAIDD Yn droednoeth, rhodiaf y ddaear yn ysgafn oherwydd mae popeth yn llefain - tyn dy esgidiau, mae'r tir dan dy draed yn sanctaidd. Pan mae'r gwynt yn canu drwy'r pinwydd fel anadl y Duw byw - tyn dy esgidiau, mae'r tir dan dy draed yn sanctaidd. Yn droednoeth, rhodiaf y ddaear yn ysgafn oherwydd mae popeth yn llefain - tyn dy esgidiau, mae'r tir dan dy draed yn sanctaidd. Pan mae'r gwynt yn canu drwy'r pinwydd fel anadl y Duw byw - tyn dy esgidiau, mae'r tir dan dy draed yn sanctaidd. Pan mae'r haul yn codi uwchlaw'r bryniau a lliwio'r byd â gwawr - tyn dy esgidiau, mae'r tir dan dy draed yn sanctaidd. Pan fo galar yn pwyso ar dy galon a'th blygu i ymddiried yn Nuw yn unig - tyn dy esgidiau, mae'r tir dan dy draed yn sanctaidd. Pan ddaw rhywun newydd i'th fyd, pan enir plentyn a thithau yn rhyfeddu at ysblander brau bywyd - tyn dy esgidiau, mae'r tir dan dy draed yn sanctaidd. Tyn esgidiau ymyrraeth, tyn esgidiau dallineb ac anwybodaeth, tyn esgidiau prysurdeb a gofid, tyn bopeth sy'n dy atal rhag bod yn blentyn rhyfeddod. Tyn dy esgidiau, mae'r tir dan dy draed yn dir sanctaidd. Mae'r Aifft yn ein bywydau yn mynnu ein bod yn gweld perth yn llosgi o'n cwmpas ym mhob man. Cyfieithiad o waith Monica Wiederhehr

FFAGL GOBAITH

Wrth gerdded ar hyd Stryd y Popty i gyfeiriad y Stryd Fawr, jest cyn cyrraedd Capel Seion, allwch chi ddim methu ty^ trwsiadus yr olwg ac arno'r arwydd Ffagl Gobaith. Rwyf wedi sylwi arno droeon, ond nes i mi ddarllen eu pamffled yn ddiweddar, doedd gen i fawr o syniad beth oedd Ffagl Gobaith.

Dyma sut maen nhw'n eu disgrifio eu hunain: `Elusen gofrestredig ydym ni. Rydym yn darparu cysur, cydymdeimlad a chefnogaeth ymarferol o fewn ein hadnoddau, i unigolion ac arnynt afiechyd marwol neu ar ôl cael gwybod am salwch difrifol, ac i'w teuluoedd a'u gofalwyr.'

Elfen bwysig yn eu gwaith yw cysylltu ar ran unigolion â phobl broffesiynol (nyrsys, nyrsys Macmillan, meddygon teulu, ac ati), a rhoi cymorth ymarferol drwy ddarparu gwybodaeth am fudd-daliadau a helpu gyda dymuniadau. Er enghraifft yn ddiweddar rhoddwyd cymorth ariannol i wraig fynd ar wyliau gyda'i theulu. Bu hi farw yn fuan ar ôl y gwyliau, ond roedd yr amser a dreuliodd i ffwrdd gyda'i theulu yn amhrisiadwy iddi hi ac iddynt hwythau.

Gwasanaeth arall pwysig a gynigiant yw'r gwasanaeth gwarchod ar gyfer gofalwyr sydd yn gofalu am aelodau o'u teulu sy'n ddifrifol sâl. Y syniad yw fod un o'u gwirfoddolwyr yn mynd i'r cartref, yn ystod y nos neu am amser penodedig yn ystod y dydd, er mwyn i'r gofalwr arferol gael seibiant. Pwysleisir mai cymryd lle'r gofalwr anffuriol arferol a wna'r gofalwyr, ac nid y gweithwyr gofal proffesiynol.

Mae Ffagl Gobaith yn gobeithio agor swyddfa newydd yn Aberteifi cyn diwedd yr haf, a'u gobaith tymor hir yw codi hosbis yn yr ardal hon.

Os hoffech wybod mwy am Ffagl Gobaith, neu os oes gennych ddiddordeb mewn gwirfoddoli, gallwch gysylltu ag Ursula Byrne, sy'n gyfrifol am y gwasanaeth gwarchod, ar 01970 615593. Am wybodaeth bellach am y gwasanaeth cysur, gallwch ffonio 01970 611957.

TE'R PENTECOST

Y MORLAN

Efallai fod Morlan fel cysyniad brics a morter wedi gorfod cymryd cam am yn ôl ond mae'r weledigaeth a'r gweithgarwch yn fyw ac yn iach. Dyma flas o'r gweithgaredd …

Yr hyn a fu …

28 Ebrill - Fforwm Ymgeiswyr

Digwyddiad llwyddiannus a drefnwyd ar y cyd rhwng Sefydliad Gwleidyddiaeth Cymru a'r Morlan, noson hwyliog o holi a stilio'r ymgeiswyr fu'n brwydro dros Geredigion yn Etholiadau'r Cynulliad.

29 Ebrill - Yr Hil-laddiad yn Armenia

Digwyddiad llwyddiannus arall yn yr Hen Goleg a drefnwyd gan Fforwm Dyngarol Aber, pan ddaeth yr Athro Armen Aviazian i roi sgwrs ar 'Gwadu Hil-laddiad yr Armeniaid'. Cyfle prin i gael persbectif o Weriniaeth Armenia ar y cwestiwn hwn.

Ac sydd eto i ddod …

25 Mai, nos Sul - AIDS yn Uganda

Cyfle i wrando ar John Roberts y BBC yn trafod ei argraffiadau a'i brofiadau yn dilyn ei daith ddiweddar i Uganda. Mae'r sefyllfa'n argyfyngus yno, lle mae angen cymorth a gwybodaeth ar y trigolion lleol.

13 Mehefin - Cerddi a Miwsig a Marian i mi …

Beth am ymuno â ni yn Arad Goch ar gyfer noson wahanol. Bydd y ffotograffydd enwog Marian Delyth yn arddangos rhai o'i lluniau ac yn sôn am yr hyn fu'n ysbrydoliaeth iddi i'w tynnu. Fel ymateb wedyn, bydd criw o feirdd a cherddorion ifanc lleol yn mynegi drwy eiriau a cherddoriaeth eu hymateb i'r gwaith.

18/19 Gorffennaf - Gw^yl Lyfrau Aberystwyth

Yn ystod mis Gorffennaf bydd Mari Ellis yn dathlu pen blwydd arbennig iawn yn 90 oed. I ddathlu'r achlysur hwn, bwriedir cynnal noson iddi yng Nghanolfan Merched y Wawr ar nos Wener 18 Gorffennaf. Dyma gyfle i glywed Lyn Lewis Dafis yn holi Mari Ellis am ei bywyd a'i gwaith. (Mynediad £3)

Mari Chambers

AILBEINTIO'R CAPEL

Mae'r cyfanswm hyd yn hyn dros £3,600.

Mae pellter i fynd i gyrraedd y nod, ond rydym yn ddiolchgar am bob cyfraniad sydd wedi ei dderbyn, ac i'r rhai sydd wedi llofnodi archeb banc am chwe mis.

Y DARGANFYDDIAD

Tu hwnt i bob cwestiwn mae ateb
 chwestiwn tu hwnt i bob un,
A'r ateb bob tro, i bob cwestiwn,
I'w ganfod, yn rhywle, gan ddyn.

Tu hwnt i dywyllwch y moroedd,
Tu hwnt i bellafoedd ein mêr,
Tu hwnt i du hwnt pob technoleg,
Tu hwnt i oleuni y sêr,

Tu hwnt i grechwenau gwleidyddion,
Tu hwnt i foethusrwydd ein stâd,
Tu hwnt i egwyddor y ddoler,
Tu hwnt i gelanedd y gad,

Tu hwnt i ryfeddod ein cariad,
Tu hwnt i bob gweithred fach wych,
Tu hwnt i ddyfnder pob deigryn,
Tu hwnt i bellteroedd y drych,

Tu hwnt i eithafion y gofod,
Tu hwnt i hanfodion ein byw,
Tu hwnt i bob cwestiwn mae ateb,
A'r tu hwnt i bob ateb mae Duw.

Arwel

BALA, GWASANAETH A BARBECIW

• Bydd Clwb Hwyl Hwyr yn treulio penwythnos yn y Bala fel rhan o'u rhaglen flynyddol. Dymunwn yn dda iawn iddynt dros y Sul, Mehefin 20-22, ac i Eirwen a Mary fydd yn gofalu amdanynt - gyda chymorth rhai o'n pobl ifanc.

• Ar y Sul, 6 Gorffennaf, bydd gwasanaeth arbennig dan arweinaid y plant a byddwn yn cael ymweliad gan rai o Bwyllgor Ysgol Sul yr Henduriaeth fydd yn rhoi adroddiad i'w pwyllgor am waith yr Ysgol Sul yng Nghapel y Morfa.

• Yn dilyn y gwasanaeth bydd barbeciw ar y traeth yn y Borth ac yr ydym yn edrych ymlaen eto eleni am haul, hwyl a bwyd blasus (iawn). Os na fydd y tywydd yn ffarfriol bydd y barbeciw yn cael ei gynnal ar y Sul canlynol (neu ganlynol … neu ganlynol …!)

SWYDDOGAETHAU MEHEFIN  2003 Blaeor y Mis Eleri Davies Porthorion Terry Adams a Dai Alun Jones Mary Howells a Gwen Job Blodau'r Cysegr 1   Glenys James 8    Mattie Jones 15  Auriel Fenton 22  Hefina Davies Wright 29  Lena Williams Ebeneser 1    Mrs Violet Holden 8    Mrs Megan J. Evans 15  Mrs Denise Morgan 22  Mrs Gwladys Adams 29  Mrs Mary Benjamin Cynorthwywyr Llestri Cymun 20  Mrs Jennie Evans, Mrs Mary Howells,       Miss Ann Jones, Mrs Nancy Lovatt Cynorthwywyr Ariannol 1    Tomi a Dilys Thomas 8    John Evans a Gwynfor Jones 15  Glenys James a Hywel Lloyd 22  Terry a Gwladys Adams 29  Beti Roberts a Blodwen Williams Tregerddan 26 Dan ofal Geraint Lewis Jones a Gwerfyl Pierce Jones