CYNNWYS GAIR GAN Y BUGAIL OPERATION CHRISTMAS CHILD NEWYDDION CLWB HWYL HWYR ER COF NODION EBENESER DAL I GREDU ADFENT 2003 DAL I GREDU GWYLNOS GALILEA DAU WASANAETH ARBENNIG GWEDDI, DIOLCHGARWCH 2004 DYDDIADUR TACHWEDD 2003 SWYDDOGAETHAU TACHWEDD 2003

GAIR GAN Y BUGAIL Teimlais eleni ein bod wedi cael Gw^yl Ddiolchgarwch a ddaeth â boddhad a bendith arbennig i mi, oherwydd yr oedd yn ddarlun o'r hyn ddylai Eglwys fod. Ar y Sul cawsom amrywiaeth o batrymau addoli. Yr oedd Oedfa'r Ysgol Sul yn aflonydd fel dw^r rhedegog (dw^r oedd yn thema eleni - ac nid dw^r llonydd, marw) a digon o liw a llefaru. Cawsom ddawns a chân, gweddi a gwybodaeth. Cawsom gyfle i roi rhoddi gronfa Bara i'r Byd ac fe gawsom dderbyn rhodd gan Gymorth Cristnogol. Yn yr hwyr cawsom gyfraniadau ystyrlon a chreadigol gan Grw^p y Morlan, sef y rhai sy'n ffurfio'r Pwyllgor Rhaglen y Morlan. A rhai ifanc, llawn egni. Bore Mawrth a phrynhawn Mercher cawsom Gyfarfodydd Gweddi Diolchgarwch. Unwaith eto bu ein cyd-aelodau yn ein harwain a'n bugeilio a'r cyfan yn dangos paratoi manwl ac ymdrech amlwg i roi y gorau i'r Gorau. Yr oedd yn arwydd o ddyfnder ysbrydolrwydd yr Eglwys. Yna, nos Iau, Swper Cynhaeaf a Chymun. Aeth nifer i drafferth i baratoi y swper blasus (Wyn Hughes a drefnodd) a chafwyd gwledd. Cafwyd cyfraniadau o ddiolch gan bob bwrdd. Ac yna fe rannwyd y Bara a'r Gwin - un dorth, un cwpan. Gweithred fawr o ddiolch yw'r Cymun ac yr oedd cael rhannu yn naturiol a llythrennol o gwpan y bwrdd yn gyson ar ein diolch. Cymdeithas o addolwyr yn gweini ar ei gilydd - dyna yw eglwys. Addoli naturiol, amrywiol yn bod ac yn gweddïo ym mywyd y rhai sy'n olrhain ac yn rhannu - dyna yw Eglwys. Yr Ysbryd yn creu Cymdeithas lawen a chynnes - dyna yw eglwys. Bod yn effro i amgylchiadau'r byd tu allan i'n cymdeithas fechan ni a chwalu'r muriau - dyna yw eglwys. Rhoi lle i Grist yng nghanol ein bywyd a'n Cymdeithas - Ei air, Ei aberth, Ei gariad, a'r diolch sy'n tarddu o hynny - dyna yw Eglwys. Dyna pam yr oedd yn W^yl mor arbennig eleni! Pryderi OPERATION CHRISTMAS CHILD Mae cyfle i ni fel aelodau'r eglwys i ymuno yn ymgyrch Cymdeithas y Chwiorydd ac Ysgol Sul y plant i gefnogi cynllun Operation Christmas Child eleni. Mae angen llenwi bocsys esgidiau (12" o hyd; 7" o led a 5" dwfn) gyda nwyddau addas penodol fel: Tegan meddal, brws dannedd a phâst, sebon, llyfr ysgrifennu, llyfr lliwio, pensiliau a pens ffelt, crayons a beiros, het, cap, menig, sgarff, pêl fechan neu bell dennis, jig-so, tegan ar gyfer bachgen neu ferch, losin. Rhaid i'r nwyddau fod yn newydd neu yn gymharol newydd i gydymffurfio â gofynion deddf mewnforio tramor. Os nad ydych yn teimlo fel llanw bocs eich hunan efallai yr ystyriwch rannu gyda rhywun arall. Hefyd mae angen cyfraniadau ariannol i sicrhau cwrdd costau trafaelu a dosbarthu. Mae'n rhaid i'n cyfraniadau fod yn barod erbyn 7 Tachwedd. Os am ragor o wybodaeth cysylltwch ag Eira Williams 01970 612163. Diolch. Dewch â'r bocsys i'r capel naill ai dydd Sul  2 Tachwedd neu nos Iau 6 Tachwedd rhwng 6 a 7 o'r gloch. Beth sydd yn y bocs, Mathew?

NEWYDDION

Llongyfarchiadau

• i Lewis Jones a Patsy Chan Pui Sze ar eu priodas yng Nghapel y Morfa ddydd Sadwrn 4 Hydref. Fe fyddant yn byw yn Malvern.
• - i Dr Moelwyn Williams fydd yn dathlu ei ben blwydd yn 90 oed ar 22 Tachwedd.

Dymunwn yn dda ...

• i ddau dîm o'r Ysgol Sul a fydd yn cystadlu yn y Cwis Ysgrythurol dan nawdd y Cyngor Ysgolion Sul.
• i bawb o'r Eglwys sydd yngly^n â threfniadau neu yn cystadlu yn yr W^yl Gerdd Dant ar 1 Tachwedd yn Aberystwyth. Bethan Bryn yw Cadeirydd y Pwyllgor Gwaith.

Cofion

• Anfonwn ein cofion at Mair Wynne Griffith (ysbyty), Ann Williams o Rutheta (y ddwy gartref o'r Ysbyty)
• Mae Mrs Mary Evans (gynt o Maes Gogerddan) sy'n 100 oed bellach yn byw ym Mhlas Cwmcynfelin. Anfonwn ein cofion cynnes ati.

Mrs Dilys Evans, Denstone, yn dathlu ei phen blwydd yn 90 oed ar 6 Hydref, gyda'i gorwyr Gethin William.

CLWB HWYL HWYR

Mae Eirwen, Pryderi a Mrs Morris yn cynnal Clwb Hwyl Hwyr gwych bob Dydd Llun yn festri'r Capel i blant o 7 i 11 oed. Mae'r Clwb yn dechrau'n syth ar ôl yr ysgol ac yn gorffen am bump. Pan fyddwn ni'n cyrraedd mae pawb yn rhedeg am y cyntaf at y bwrdd bisgedi a diod oren. Mi fyddwn ni'n chwarae gemau briliant a byddwn ni'n dysgu llawer am Iesu Grist a Duw. Fy ngêm gorau i ydi pan mae rhywun o'ch tîm yn trio disgrifio llun o rywbeth ac rydych chi'n gorfod trio dyfalu beth yw e. Ar ddiwedd pob Clwb mae'r tîm sydd wedi ennill y mwya o bwyntiau yn cael paced o losin i rannu allan. Hefyd bob wythnos mae person sydd wedi gwneud rhywbeth da yn ystod y Clwb yn cael paced o losin i'w hunan ac yn cael gwisgo'r Fedal yr wythnos wedyn. Ges i'r fedel unwaith am fod yn onest - nes i ffeindio arian a'i roi yn syth i Eirwen. Dewch i Hwyl Hwyr Capel y Morfa i gael lot fawr o HWYL!

Sioned Llywelyn

ER COF

Mrs Lilian Evans, Bodlondeb. Bu farw yn dawel ac yn sydyn ddydd Sadwrn, 11 Hydref yn 87 oed. Fe fydd Cartref Bodlondeb a bywyd llawen ohonom yn dlotach o lawer hebddi. Er iddi golli cymaint - ei hiechyd, ei chartref, ei dwy goes a'i phriod - yr oedd yn llawn diolch, addfwynder a llawenydd. Bu'n briod ffyddlon i'w gw^r, y Parchedig E J Evans: syrthio mewn cariad pan ddaeth yn weinidog i Danygroes yna priodi a symud i Cross Inn, yng Nghreunant ac yna, wedi ymddeol, i Aberystwyth. Bu'n gefn ac yn gysur iddo. Cyffredin iawn oedd ei bywyd heb na gwyliau tramor na bywyd moethus. Ond roedd yn fodlon ei byd ac er gwaethaf y bynyddoedd olaf, anodd, fe flodeuodd yn ei gwendid. Os bu rywun erioed yn dystiolaeth i rym y geiriau Digon i ti fy ngorau i yna Lilian oedd honno. Mae un chwaer iddi yn byw yn Brighton ond gan deulu ei phriod y cafodd y gofal mwyaf - Mary Alice (Llangwyryfon), Bessie Richards ac Elsie Evans a'r diweddar Martha Roderick. Diolch i Dduw am y rhai - er yn dawel a di-sôn amdanynt - sydd mor annwyl yn ei olwg. Fe gyfoethogodd Lilian pob gw^yl, gan gynnwys ein Diolchgarwch eleni.

ADFENT 2003 Bydd y Sul, 30 Tachwedd, yn Sul cyntaf yr Adfent. Yn ôl ein harfer fe fyddwn yn golau cannwyll yr Adfent ac eleni hefyd fe fyddwn yn gofyn i wahanol rai ddewis eu hoff ddarn o gerddoriaeth. Mae Eglwys Bresbyteraidd Cymru yn gofyn i ni roi sylw i AIDS yn ystod y Sul a dyna pan fod Morlan wedi paratoi Atodiad arbennig gyda'r rhifyn hwn o Perthyn. Bydd casgliad arbennig yn ystod y Sul. Am 8.00 yr un noson Mae Clwb Rotari Aberystwyth yn cynnal noson o garolau yn y capel. Richard Griffiths, Richmond yw Cadeirydd y Rotari eleni. Dymunwn yn dda iddo yn ystod y flwyddyn. Yn ystod nosweithiau Iau yn Nhymor yr Adfent byddwn yn myfyrio ar 'Geiriau Gobaith yr Adfent.'

Y Parch Cynwil Williams, yng ngwasanaeth y Cymun, Tachwedd 2003.

NODION EBENESER

Cynhaliwyd ein Cyfarfod Diolchgarwch ar Medi 30, 2003, ac eleni gwahoddwyd y Parch Raymond John Jenkins a fu, cyn ymddeol, yn ficer Plwyf Llanfarian, a chafwyd ganddo neges berthnasol ac amserol. Braf oedd cael ein Bugail yn llywyddu a chael croesawu ffrindiau o eglwysi eraill. Diolch i'r chwiorydd am roddion o flodau a ffrwythau. Rhannwyd y rhoddion i'r cleifion a Chartref Bodolondeb.

Cawsom fendith arbennig yng nghwmni'r plant wrth i aelodau o'r Ysgol Sul gymryd rhan mewn Cwrdd Diolchgarwch ar Sul, Hydref 28, 2003. Roedd y rhaglen wedi ei threfnu gan Miss Rhiannon Hughes ac roedd anerchiad ein Gweinidog wedi gafael yn y plant a'r oedolion. Casglwyd tuag at Shelter Cymru.

Mae'n dda cofnodi bod David Richards yn gwneud cynnydd ardderchog wedi'r llawdriniaeth, yn ddigon da i gerdded allan ac i ail gydio yn y gofal o'i briod, sydd yn gaeth i'w chartref. Newyddion calonogol hefyd am Mrs Megan Morris sydd yn raddol wella yn dilyn llawdriniaeth a bellach wedi dychwelyd i'w chartref ym Minyddol. Mae sefyllfa Jac Isaac yn wahanol, wedi ei chymhlethu yn dilyn cwympa tra yn gwella o'r llaw driniaeth gyntaf. Mae bellach yng ngofal Cartref Blaen Dyffryn, Llandysul, a'r bwriad yw iddo ddychwelyd adre wedi i'r newidiadau angenrheidiol i'r t cael eu cwblhau. Derbyniwyd gair oddi wrth Dr John Ashton, Navan, Co Meath Iwerddon, yn mynegi ei ddiolch i'r aelodau am ymweld â'i fam, Mrs Eiriana Ashton sydd yn breswylydd tymor hir yng Ngolygfa, Cartref Bodlondeb. Mae John yn ymweld yn rheolaidd a'i fam pob tair wythnos.

DAL I GREDU

Cofiwch am y gyfres fer o bedwar sesiwn i ystyried sylfeini y Ffydd Gristnogol. Fe fydd cyflwyniad syml gan Dr John Tudno Williams, Megan Williams, Dolgellau, Elwyn Richards, Caernarfon a'r Bugail. Bydd cyfle i holi a thrafod. Cofiwch, nosweithiau Mawrth 4, 11, 18, 25 am 7.30 yn y festri.

GWYLNOS GALILEA

Ar ddechrau wythnos Un Byd yr oedd yn anodd meddwl am ddim mwy perthnasol na chynnal Gwylnos gweddi i gofio am y gwrthdaro rhwng y Palisteiniaid a'r Israeliaid. Cawsom gyfres o fyfyrdodau byr gan Menna Lloyd Williams sydd wedi bod yn cyfrannu yn fisol i'r 'Tyst' - myfyrdodau a oedd yn sôn am yr arwyddion o obaith sy'n codi o'r argyfwng. Daeth y sefyllfa yn fyw iawn i ni pan ddaeth Suzanne Kempe (o Ddwyrain yr Almaen) i'r  wylnos - yn gwbl annisgwyl - ac fe'i gwahoddwyd i sôn am ei phrofiad gyda'r Tîm Heddwch Rhyngwladol ym Mhalestina ym mis Medi.

DAU WASANAETH ARBENNIG

• Nos Sul, 9 Tachwedd, fe fyddwn fel Eglwys yn myfyrio ar fywyd a gwaith Dylan Thomas a fu farw hanner can mlynedd union i'r diwrnod. Fe fydd y gwasanaeth dan arweiniad Rhidian Griffiths a'r Bugail.

• Nos Sul, 16 Tachwedd, fe fyddwn yn ysgrifennu Cardiau Nadolig i garcharorion cydwybod fel rhan o 'Ymgyrch Anfon neges o obaith' a drefnir gan Amnest Rhyngwladol. Dewch a'r cardiau eich hunain ac fe fyddwn fel Eglwys yn talu costau'r post. Mae croeso i unrhyw un gyfrannu tuag at y gost, wrth gwrs.
  6.00-6.30 Addoli.
  6.30 ymlaen - ysgrifennu'r cardiau yn y Festri.

GWEDDI, DIOLCHGARWCH 2004

O Dduw, fel plant ar ddiwedd pryd bwyd ac ar frys gwyllt i adael y bwrdd, trown atat ti heddiw yng nghanol prysurdeb ein bywyd, gan gofio am unwaith bod angen diolch. Diolch am y cyfle, o Dduw - i arafu, i bwyllo, i feddwl. I feddwl amdanat ti, y Duw byw llawn dychymyg a chariad. Ti wedi'r cyfan, yw Duw ein Lluniaeth. Diolchwn, mewn rhyfeddod, am yr amrywiaeth syfrdanol o flas ac ansawdd sydd i'r bwyd a gawn i'w baratoi.

Diolch bod gennym ni fwyd i roi ar blatiau ein plant bob pryd - maeth i'w cryfhau ac i sicrhau prifiant a pharhad.
Mae cywilydd arnom fod rhai yn ein tref, yn ein gwlad, ac mewn cymaint o wledydd eraill y byd sy'n methu diolch yr un fath. Tlodi, rhyfel a difaterwch pobl at bobl sy'n gyfrifol bod platiau'r rhain yn wag, a boliau eu plant yn chwyddo mewn newyn.
Erfyniwn arnat ti i beidio â gadael i ni fod yn ddifater am ein cyd-ddyn.
Gad i ni fod yn weithredol wrth geisio dod â thegwch i'n byd - ar raddfa fyd-eang ond hefyd ar raddfa leol.

Diolch i Ti am gyfoeth naturiol ein gwlad - yn ei dw^r. Am y sicrwydd a gawn o wybod bod y weithred rwydd o droi tap yn mynd i gyflenwi ein hangen ni am ddr glân - a digonedd ohono. Maddau ein gwastraff o'r adnodd gwerthfawr yma. Gad inni gofio bod merched Affrica ac Asia yn cerdded 3.7 milltir ar gyfartaledd bob dydd er mwyn cyflenwi anghenion dwr eu teuluoedd. Gad inni wella'r sefyllfa sy'n caniatáu i saith person farw bob munud o ganlyniad i afiechydon sy'n deillio o ddr budr. Meddyliwn heddiw am y fam-gu yn Ghana sy'n mynd heb fwyd er mwyn i'w hwyrion gael dwr - am fod cwmnïau mawrion yn codi pris anghyfiawn arni hi a'i thebyg am ddr.

Duw byw, Duw llawn dychymyg a chariad Ti yw Duw ein Llawenydd - Ti sy'n dyfrio'n dychymyg, yn rhoi maeth i'r meddwl. Diolch am y traddodiadau rydym wedi'u hetifeddu - traddodiadau diwylliannol ac ysbrydol, celfyddyd a chred, yr amrywiaeth moethus o ddiwylliannau sy'n ffynnu yn ein byd - sy'n bodoli yn ein tref ein hunain.

Dysga ni i barchu pob haenen o ddiwylliant sy'n fyw yn ein cymdeithas - yr hen a'r newydd, y cyfarwydd a'r anghyfarwydd. Boed inni gael yr hyder i gynnal yr hyn sy'n werthfawr i ni, ac i gryfhau'r ddealltwriaeth o syniadau a thraddodiadau eraill. Dod dy gariad i'n hun a'n cryfhau.

Rwyt ti'n ffynnon ddofn o gariad - defnyddia ni yn ffiolau parod i gario dy gariad trwy dy fyd. Mynna bod ein diolch newydd i ti yn troi'n weithred gadarnhaol i greu tegwch, cyd-ddealltwriaeth a goddefgarwch yn dy fyd.
Gwyddom mai dy gariad Di all ein cynnal a'n symud i wneud hynny trwy esiampl dy fab Iesu.

Ac er mwyn ei enw o, atat Ti, Duw ein Lluniaeth a'n Llawenydd, deuwn â'n diolch o'r newydd.

Amen

DAL I GREDU

Nosweithiau Mawrth ym mis Tachwedd, am 7.30. Cynhelir pedwar sesiwn yn edrych ar sylfeini'r ffydd: cyflwyniad a thrafodaeth.

• 4 Tachwedd: 'Credaf yn Nuw Dad, Creadwr.......' Yr Athro John Tudno Williams.
• 11 Tachwedd 'Credaf yn Iesu Grist', y Parch Megan Williams, Dolgellau
• 18 Tachwedd: 'Credaf yn yr Ysbryd Glan', Yr Athro Elwyn Richards
• 25 Tachwedd: 'Credaf yn yr Ysgrythurau Sanctaidd', y Parch Pryderi Llwyd Jones

SWYDDOGAETHAU TACHWEDD 2003

Blaenor y Mis Miss Gwerfyl Pierce Jones
Porthorion MrTrefor Evans a Dr Alun O Morris
Mr Eifion Lewis a Mrs Mary Jones Morris

Blodau'r Cysegr - Y Morfa
2  Mrs Jean L Davies a Mrs Marlene Gealy
9  Mrs Mary C Howells
16 Mrs Iona Jones a Mrs Mary Jones Morris
23 Mrs Carrie Harries
30 Miss Gwerfyl P Jones a Mrs Rhiannon Roberts

Blodau'r Cysegr - Ebeneser
2  Llinos a Rhiannon Hughes
9  Mrs Laura Rumsey Williams
16 Mrs Susan Hughes
23 Mrs Anne Jones
30 Mrs Marie Griffiths

Cynorthwywyr Llestri Cymun
12 Mrs Valmai Davies a Mrs Gwyneth Clwyd Haydn-Jones,
Mrs Gwen Job a Mrs Rhiannon Roberts

Cynorthwywyr Ariannol
2  Mr E Meirion Morgan a Mr David Harries
9  Mr D Brian Thomas a Mr David M Evans
16 Mr Alun Morris a Mrs Eileen Jones
23 Mr a Mrs Merfyn Davies
30 Mr D Meirion Jones a Mrs Beti Roberts

Tregerddan
26 Dan ofal Dr Brynley Roberts a'i ddosbarth