CYNNWYS GAIR GAN Y BUGAIL NEWYDDION PÊL DROED MORLAN ER COF CROESO DIGWYDDIADAU'R GRAWYS A'R PASG DAL I GREDU DYDDIADUR GWEDDI DYDDIADUR MAWRTH 2004 SWYDDOGAETHAU MAWRTH 2004

GAIR GAN Y BUGAIL "Lle na cheir gweledigaeth bydd y bobl ar chwâl" Diarhebion 29.18 Pregeth y Bugail bore Sul, 15 Chwefror, 2004, ar achlysur dechrau'r gwaith ar Ganolfan Morlan Ymhlith y sefydliadau sy'n paratoi adroddiadau, ystadegau ac arolygiadau o bob math y dyddiau hyn y mae Christian Research Association. Maent yn cynnig deunydd allweddol i'r eglwys i ddeall ei hamgylchiadau yn well ac i fod yn effro wrth ddarllen 'arwyddion yr amserau'. Mae 'bod yn effro' yn anogaeth gyson yn y Testament Newydd. Dyma un o'r ystadegau: yn ystod y 90au ym Mhrydain yr oedd un eglwys o bob pump yn TYFU. Fe aethpwyd ati wedyn i wneud ymchwil pellach ymhlith 8,700 o eglwysi i geisio darganfod pam yr oeddynt yn tyfu. Ni wnawn ddechrau trafod beth yw ystyr `tyfu'. Am y tro fe'i dehonglwn yn yr ystyr arferol (os camarweiniol) o dyfu mewn gweithgarwch a nifer. Fe gafwyd nifer o resymau i esbonio'r twf. Mae'r adroddiad yn cymryd yn ganiataol fod unrhyw dwf yn golygu tyfu a dyfnhau addoli a gweddi yn yr eglwys. Yr eglwys sy'n tyfu yw'r eglwys sy'n gweddïo. Beth yw'r rhesymau eraill? Fe soniwn am bedwar rheswm, yn ôl trefn y pwysigrwydd a roddir iddynt gan yr eglwysi eu hunain. Croeso Y rheswm pwysicaf yw croeso'r eglwys: y cynhesrwydd a'r cyfeillgarwch. Mae Paul, yn ei lythyrau, yn rhoi pwyslais mawr ar hyn. Fe all rhywun ddod i wasanaeth am y tro cyntaf a chael ychydig iawn o faeth ysbrydol yn y gwasanaeth ac eto … os yw'r croeso yn gynnes y mae'n debygol y byddai'r person hwnnw neu honno yn dychwelyd yr eilwaith. Byddai hynny'n llai tebygol o ddigwydd petai'r canu'n wych a'r bregeth yn rymus, ond bod y croeso yn oeraidd ac yn amhersonol! Mae hyn yn gysur mawr i ni, oherwydd y mae'n golygu y gall pob aelod gyfrannu yn gadarnhaol tuag at dyfiant eglwys. Mewn eglwys sy'n tyfu mae pob aelod yn `Aelod y tair C' - Croesawus, Cynnes, Cyfeillgar. Wyddoch chi fod rhai eglwysi sydd wedi gweld cynnydd mawr yn hyfforddi eu haelodau ar sut i fod yn groesawus? Gweinidogaeth gyfan yr eglwys Dyma'r ail reswm. Wrth sôn am effeithiolrwydd gweinidogaeth gyfan yr eglwys, nid yw'r adroddiad yn meddwl am `weinidog' ond yn hytrach am `dîm y weinidogaeth'. Dyma ffactor allweddol arall arall mewn eglwys fyw. Mae gennym yng Nghapel y Morfa - fel llawer o eglwysi eraill - dîm mewn egwyddor, oherwydd dyma yw'r blaenoriaid, athrawon ysgol Sul, ac yn y blaen. Ond mae'n dîm rhy fawr ac oherwydd hynny yn llai effeithiol na'r syniad o dîm a welir mewn eglwysi sy'n tyfu. Mae'n rhaid bod yn fwy penodol ac y mae'n rhaid cydnabod a neilltuo rhai gyda doniau a chyfraniad arbennig i fod yn weinidogaeth tîm. Nid oherwydd fod gweinidogion yn brin ond am na all un gweinidog ac na ddylai un gweinidog gynnal yr eglwys - y mae dyddiau `gweinidogaeth un dyn/ddynes' ar ben. A hynny er gwell. Pan oedd Paul yn sôn (1 Cor.12) am rai yn athrawon, rhai yn fugeiliaid, rhai yn proffwydo, ac ati, yr oedd yn sôn, nid yn unig am yr `eglwys' yn gyffredinol, ond am yr eglwys leol hefyd. A ddaeth yn amser i ni weithredu hynny yng Nghapel y Morfa? Rhaglen plant ac ieuenctid Dyma'r trydydd rheswm a roddwyd am lwyddiant eglwys. O gofio fod Capel y Morfa yn rhoi sylw arbennig i waith plant ac ieuenctid (ac y mae twf mewn nifer), fe hoffwn ddweud dau beth. Nid oes gennym ddigon o le i ddatblygu'r gwaith. Dyna paham ei bod yn braf y bore 'ma cael dweud fod y gwaith ar y Morlan wedi dechrau, a phetai'r Morlan yn gwneud dim mwy na chreu gwell adnoddau i ni, yna fe fuasai hynny ynddo'i hun yn rheswm dros ddathlu. Ond - a dyma'r ail bwynt - rhaid rhybuddio. Mewn dwy flynedd fe fydd 2 allan o bob 3 o blant 10 oed wedi gadael yr eglwys. Nid yw'r eglwys yn cadw ei phlant - yr eglwysi sy'n tyfu yw'r rhai sy'n llwyddo i wneud hynny. Nid yw'r rights of passage (e.e. dod yn aelod `cyflawn') yn ymddangos erbyn hyn mor bwysig â phrawf gyrru. Gyda llaw, rhaid peidio â disgwyl i bobl ifanc rhwng 15-17 oed fod yn glir eu meddyliau yngly^n â'u cred (er bod amryw yn yr oed hwnnw yn medru bod yn gwbl bendant) - eu cynnwys a'u croesawu o fewn `teulu'r tyfu yn y ffydd' y mae eu derbyn yn gyflawn aelodau, a'u cadw rhag gwneud cam â'r Gwaredwr yn anaeddfedrwydd ac anwybodaeth glas-lencyndod. Pobl yn symud i fyw i'r ardal Y mae rhoi hwn yn bedwerydd rheswm i egluro twf eglwysig yn ei gydio wrth y rheswm cyntaf a roddwyd, sef y croeso. Mewn cyfnod mor symudol ac ansefydlog, pan fo cymaint o fynd a dod i dref fel Aberystwyth a'r cylch, pwy sydd yn mynd i groesawu pobl newydd i ardal neu i stryd neu i stad o dai? Pwy - os na wnawn ni? Mae'n gyfrifoldeb arnom fel `cymdogion' ac fel aelodau o'r eglwys. Y mae `peidio gwthio ein crefydd ar neb' fel petai wedi mynd yn rinwedd WG (wleidyddol gywir) erbyn hyn, ond rhywbeth gwahanol iawn yw bod croeso'r ffydd yn rhan naturiol ohonom. Yn ôl yr eglwysi sy'n tyfu, y mae cyfeillgarwch a chymdogion da yn gwbl allweddol yn eu tyfiant - y mae'n arwain i berthyn, ac o'r perthyn y tyf cred. Dyna'r pedwar brif reswm fod 1 o bob 5 o eglwysi Prydain yn tyfu. I ba raddau yr ydym fel eglwys yn llwyddo i'w cyflawni? Fe gewch chi benderfynu hynny. Nod a chyfeiriad Ond y mae rhywbeth arall holl bwysig i'w ddweud - rhywbeth sylfaenol sydd yng nghanol pob tyfiant. Yng ngeiriau'r adnod: "Lle na cheir gweledigaeth bydd y bobl ar chwâl". Mae'r eglwys fyw sy'n tyfu yn glir ar ei nod a'i chyfeiriad. I ddefnyddio'r jargon - mae ganddi a plan and a vision. Ac y mae'n effro iawn i ofalu ei bod yn cyrraedd y nod ac yn gwireddu'r weledigaeth. Nid eglwys sydd yn aros yn ei hunfan ydyw. Marw a wna eglwys felly. Y mae gennym, fel eglwys Capel y Morfa, nod ac y mae'r nod hwnnw wedi ei gynnwys yn yr Adroddiad Blynyddol tan y llynedd (pedair tudalen a fewnosodwyd dan y teitl `Ein Stiwardiaeth'). Atgoffwch eich hun o'r nod hwnnw. Erbyn hyn, yn ogystal â'r nod, y mae gennym raglen sydd yn ein cynorthwyo i ddatblygu gweledigaeth. (Os yw'r gair `gweledigaeth' yn swnio'n ymhonnus neu'n uchelgeisiol, y mae'n rhaid cofio mai `gweledigaeth o'r deyrnas' ydyw, nid unrhyw honiad ar ein rhan ni.) Y mae'r gwaith wedi dechrau ar y Morlan. Nid yw pawb yn rhannu'r weledigaeth, wrth gwrs - ond y mae llawer iawn yn gwneud, ac wedi gweithio'n galed oherwydd hynny. Nid pawb sydd am roi lle i weddi ac astudio'r Gair yn yr eglwys ychwaith, ond y mae rhai yn gwneud hynny, ac o'r herwydd yn cadw gweddi a'r Gair yn rhan ganolog o fywyd yr eglwys. Trwy weithgarwch y Morlan fe fydd yr eglwys yn adeiladu ar ei chroeso - fe fydd yno ddrws agored i bawb; fe fydd yno adeiladu ar ei thystiolaeth - fe fydd y ffydd yn cael ei chyflwyno, ei rhannu, ei thrafod a'i hamddiffyn; fe fydd yno gydweithio eang gydag eraill sydd am ddarganfod a hybu egwyddorion mawr y deyrnas; fe fydd gwrando a dysgu, darganfod a deialog; fe fydd doniau yn cael eu defnyddio i greu ac i gyflawni galwad Duw ar inni fod yn gyd-adeiladawyr a chreawdwyr yng ngweithdy'r Creawdwr ei hun. A thrwy'r cyfan fe fydd y Morlan yn ceisio codi pont rhwng yr Efengyl a'r bwlch, os nad y rhwyg, sydd wedi datblygu rhyngddi a'r diwylliant cyfoes sydd yn amgylchynu'r eglwys. Rhywbeth bychan iawn fydd y cyfan - rhan fechan iawn o waith mawr yr Ysbryd - ac y mae hynny yn gweddu i ni. Ond fe fydd yn dangos ein bod o ddifrif ac yn barod i fentro, rhag inni fod yn belican eglwysig yn ein dydd. Os na wnaiff anghydffurfiaeth - radical yn ei gwreiddiau - fentro patrymau newydd i'r eglwys, yna, pwy a wnaiff? Ni fydd unrhyw fethiant yn y gwaith - fe fydd siom, mae'n siw^r (fel y gwyddom eisoes!) - ac fe fyddwn yn siw^r o ddysgu mwy am `amser Duw' yn hytrach na'n hamser ni. Ond nid methiant fydd mentro dweud fod gennym `nod a gweledigaeth'. Pelican Mae'r diwinydd Robin Gill (awdur y gyfrol enwog The myth of the empty pew) wedi sôn am weld pelicans mewn parc bywyd gwyllt yn Awstralia. Wrth i un o weithwyr y parc a'r plant fwydo'r pelicans gyda physgod, yr oedd yr adar yn dal y pysgod â'u pig ac yn eu gollwng yn ôl i'r dw^r. Er nad oeddynt yn llwglyd yr oeddynt yn dal i fegeran am bysgod ac yn dal i'w gollwng i'r dw^r. Y mae'n ymddangos fod pelicans sydd wedi gorfwyta yn edrych yn llwglyd o hyd. Aderyn od iawn, heglog, onglog, â cheg anferth ond ymennydd bychan - a diog yw'r pelican. I'r eglwys mae rhywbeth yn gyfforddus iawn mewn bod yn belican. (Salm 102.6 Tebyg wyf i belican yr anialwch: ydwyf fel tylluan y diffeithwch, ond cyfieithiad 1988: Yr wyf fel brân mewn anialwch ac fel tylluan mewn adfeilion.) Nid yw pelican yn debygol o newid y byd chwaith, oherwydd nid yw'n disgwyl gwneud hynny. Heb weledigaeth fe all yr eglwys fod yn union yr un fath. Ymlaen Y mae rhan o weledigaeth fawr o'n blaen heddiw. Fe fydd y rhan arall o'r weledigaeth - addoli Duw, meithrin plant, adeiladu'r eglwys - yn parhau fel erioed, a diolch i Dduw am hynny. Fe fydd y rhan yr ydym wedi ei hadnabod fel Morlan ers rhai blynyddoedd bellach yn gyfle ac yn wahoddiad i ni fel nod mentrus a chyffrous i'r dyfodol. Fe fydd gweddi a chefnogaeth a brwdfrydedd yr eglwys gyfan yn gwbl allweddol i'r fendith a'r arweiniad a'r nerth yr ydym ei angen. Gweddïwch dros y gwaith. Gwaith Duw ydyw. Hynny yw amod a sylfaen pob twf a chynnydd. Pryderi

Y plant lleiaf yn canu yng Ngwasanaeth Gw^yl Ddewi, 29 Chwefror

Mr Alun Creunant Davies yn sôn am lansio'r Beibl newydd, Chwefror 2004

NEWYDDION

Llongyfarchiadau

• i dîm pêl-rwyd a thîm pêl-droed Hwyl Hwyr a fu'n cymryd rhan yng ngêmau'r Cyngor Ysgolion Sul yng Nghastell Newydd Emlyn yn ddiweddar. Dim llwyddiant mawr eleni, ond cafwyd tipyn o hwyl.

Croeso

• i Wyn a Glenys Thomas a Karen Jones, Loveden Cottage, Comins Coch sydd wedi ymaelodi â ni fel eglwys trwy Ebeneser, Penparcau. Croeso cynnes iawn i'r tri ac y mae llawer ohonom yn eu hadnabod yn iawn ac y maent wedi hen setlo yn Ebeneser erbyn hyn

Ein cofion ...

• at Gladys Adams, Linda Parry Williams, Bob Davies, Ann Williams, Margaret Williams, Dafydd Llewelyn ac Enoch Davies sydd wedi bod yn yr ysbyty yn ddiweddar. Ein cofion hefyd at Morfydd Moelwyn Hughes sydd yn yr ysbyty ers dros flwyddyn erbyn hyn

Diolch

• Dymuna Jean a Merfyn ddiolch o galon i aelodau a ffrindiau am eu dymuniadau da drwy gardiau, blodau a galwadau ffôn a gawsant yn ystod yr amser pryderus tra bu Jean yn yr ysbyty yn ddiweddar. Diolch yn fawr iawn

Pob hwyl ...

• i'r plant a'r bobl ifanc a fydd yn cymryd rhan yn Chwaraeon y Cyngor Ysgolion Sul yn ystod gwyliau hanner tymor..

PÊL DROED

Teithiodd tîm pêl-droed pump bob ochr Hwyl Hwyr i Gastell Newydd Emlyn i chwarae yng nghystadleuaeth Ysgolion Sul Rhanbarth y De Orllewin, ar ddydd Iau, 19 Chwefror. Aelodau'r tîm oedd Matthew, Aled, Dafydd, Tomos, Huw a Rhydian Siôn. Cafwyd buddugoliaeth o 2-0 yn y gêm gyntaf yn erbyn Penuel Caerfyrddin gyda Dafydd a Tomos yn sgorio'r goliau.

Yn y rownd go-gynderfynol cafwydd gêm arbennig o dda a chlòs yn erbyn Capel Peniel, ac roedd pawb yn chwarae ei orau glas. Ar ôl gêm gyfartal 1-1 ar ôl amser ychwanegol, setlwyd y gêm gan giciau o'r smotyn. Arbedodd Matthew yn wych yn y gôl ac fe sgoriodd Huw a Matthew i sicrhau gêm yn y rownd gynderfynol. Er i Huw sgorio gôl wych o bellter yr oedd tîm Hendy-gwyn yn rhy gryf ac fe gollodd Hwyl Hwyr o 3-1. Roedd pawb wedi chwarae ei orau ac wedi mwynhau'r gystadleuaeth yn fawr.

Laurie Wright yn trafod camerâu digidol a gwefan y Morfa gyda'r chwiorydd ym mis Mawrth

CROESO Mae dwy neges gennyf: Yn achlysurol bob mis cawn y pleser o groesawu gweinidogion ac eraill o ffwrdd i arwain ein gwasanaethau ar y Sul. Un o gyfrifoldebau Blaenor y Mis yw gofalu ein bod yn rhoi y croeso dyladwy i'n hymwelwyr. Weithiau, am wahanol resymau, nid yw'n gyfleus neu'n bosibl i'r blaenor wneud hynny ar ei haelwyd neu aelwyd. Yn gyffredinol, nid yw hyn yn creu problem gan fod digon o wirfoddolwyr; ond byddai'n help cael gwybod am eraill ymysg ein haelodau a fyddai'n hoffi rhoi croeso yn y ffordd yma. Efallai, er enghraifft, eich bod yn adnabod un o'r rhai a ddisgwyliwn eleni - fe welwch y rhestr yn y Llawlyfr. Os hoffech helpu, byddaf yn falch o glywed gennych. Bob nos Sul ar ôl y gwasanaeth, darperir paned o de yn y Festri. Beth am ymuno am sgwrs. Nid ydym yn aros yn hir, ond mae'n gyfle da i ddod i adnabod ein gilydd yn well. Mae'n gyfle hefyd i ymateb i'r gwasanaethau yn ystod y dydd - hyd yn oed, yn gyfle i godi cwesiwn neu drafod. Ond ar y cyfan, cyfle i roi'r byd yn ei le ymysg ffrindiau. Felly, edrychwn ymlaen i'ch croesawu. Alun Morris.

Anest, Lucy, Sioned ac Elain yn canu yng Ngwasanaeth Gw^yl Ddewi

MORLAN

Y mae pregeth y Bugail yn y rhifyn hwn yn nodi fod y gwaith ar y Morlan wedi dechrau erbyn hyn. Fe fydd y gwaith wedi ei gwblhau erbyn dechrau Medi. Y mae hynny yn golygu ein bod wedi dechrau ar gyfnod o brysurdeb a pharatoi mawr a manwl ac er bod y cynllun rhywfaint yn llai na'r cynlluniau gwreiddiol yr un fydd yr angen am weithredu manwl a gofalus. Yr ydym yn hyderus fod trafodaethau gyda'r pensaer Bleddyn Davies (Enviromenta) a'r cwmni a ddewiswyd i wneud y gwaith (L&R, Aberystwyth) wedi diogelu fod y cyfan o fewn cyllid y Morlan.

Fe hoffem nodi un neu ddau o bethau.

1. Cofiwch fod y cynlluniau i'w gweld yn y festri. Yn y bwriad o gysylltu'r neuadd a thy^ Beth-seilun ac i wneud y llawr gwaelod yn rhan o'r Morlan, y mae'r Bwrdd Rheoli a'r Blaenoriaid yn ymwybodol iawn o'r cyfrifoldeb i ddiogelu preifatrwydd Eirwen a Pryderi tra bydd y gwaith yn mynd yn ei flaen. Yn ystod yr wythnosau nesaf (o leiaf tan y Pasg) nid oes unrhyw reswm dros beidio â pharhau i ddefnyddio lolfa Beth-seilun. Nid oes raid dweud, ond ni all neb fynd ar y safle heb ganiatâd oherwydd rhesymau diogelwch ac yn y blaen.
2. Yr ydym fel Bwrdd Rheoli yn gwerthfawrogi yn fawr y gwaith sydd wedi cael ei wneud ac yn cael ei wneud gan dri phwyllgor yn ystod y cyfnod hwn: Pwyllgor yr Adeilad (Swyddogion: Merfyn Davies ac Alun Morris); Pwyllgor Ariannol (Ray Walters ac Arwyn Roderick); Pwyllgor Rhaglen (Ann Davies a Menai Lloyd Williams). Yr ydym yn ddiolchgar iddynt i gyd am roi cymaint o'u hamser i'r gwaith.
3. Y mae'r Bwrdd Rheoli yn gwerthfawrogi hefyd y gefnogaeth a'r ymddiriedaeth a ddangosir i'r Bwrdd gan Flaenoriaid Capel y Morfa. Yn yr un ffordd y mae'r Blaenoriaid yn ddiolchgar iawn i'r Bwrdd Rheoli am ei waith manwl a thrylwyr. Fe fydd adroddiadau cyson yn cael eu cyflwyno i'r Blaenoriaid, wrth gwrs.
4. Y mae'r cytundeb gyda'r adeiladwyr yn nodi y bydd y gwaith wedi ei orffen ddechrau Medi. Gyda'r dyddiad yna mewn golwg y mae'r Pwyllgor Rhaglen wedi dechrau cynllunio (ers rhai wythnosau) y rhaglen ar gyfer 2-3 blynedd gyntaf y ganolfan. Y mae trafodaethau eisoes wedi dechrau gyda mudiadau a sefydliadau a fydd yn awyddus i logi'r cyfleusterau. Y mae'r gair ar led a nifer o ymholiadau wedi eu derbyn eisoes cyn i ni ddechrau ar y cyhoeddusrwydd.
5. Y mae nifer fawr o aelodau Capel y Morfa eisoes wedi cyfrannu'n hael i'r Morlan. Y mae'r broses o gael cefnogaeth gan wahanol elusennau neu gronfeydd yn parhau drwy'r Pwyllgor Ariannol wrth gwrs (ac fe fydd yn broses barhaus). Fe fydd cyfle i eraill gyfrannu eto tuag at y genhadaeth arbennig hon a thrwy sefydlu Cyfeillion y Morlan fe fyddwn yn creu rhwydwaith o gefnogwyr a fydd am wybod beth sy'n digwydd yn y Morlan ac am gyfrannu'n ariannol. Y mae'r gwaith o sefydlu'r Cyfeillion eisoes wedi dechrau.

Os ydych am gael unrhyw wybodaeth bellach yngly^n ag unrhyw agwedd o'r gwaith a'r datblygiad, yna cofiwch holi naill ai Alun Morris neu unrhyw un o swyddogion y Bwrdd Rheoli.

Gwerfyl Pierce Jones (Cadeirydd) Pryderi Llwyd Jones (Ysg.)

ER COF

Bu farw Blodwen Bufton yn yr ysbyty yn Abertawe ar 29 Ionawr, a bu'r angladd ym Moreia, Brynaman ddydd Gwener, 6 Chwefror. Er ei bod yn 91 oed a'r cof yn pallu, ac er i amgylchiadau ei gorfodi i fynd i gartref preswyl yn Abertawe, ni chollodd Blodwen yr ysbryd bywiog ac ifanc a oedd yn perthyn iddi. Fe gafodd flas ar fyw: ei magwrfa ym Mrynaman, ei phriodas â Dic a chadw gwesty yn Llundain ac yna'r ymddeol i Aberystwyth. Mwynhaodd ei bywyd teuluol a chymdeithasol, gwerthfawrogodd y cyfeillgarwch a brofodd tros y blynyddoedd, ac yn fwy na dim cafodd flas ar fywyd yr eglwys fel organyddes, aelod o'r Ysgol Sul ac fel un a oedd yn ffyddlon i holl weithgarwch ac addoli yr eglwys - ym Moreia, yn Shirland Road, yn Salem ac yng Nghapel y Morfa. Yr oedd ei hymateb llawen, llawn diolch i addoli'r eglwys yn cyfoethogi'r gynulleidfa a phan symudodd i Abertawe am yr ail waith, yr oedd yn golled fawr i ni fel eglwys. Byr iawn fu ei thymor yn Abertawe pan aeth y tro cyntaf - yr oedd ganddi ormod o hiraeth am ei ffrindiau ac am y capel. Yr oedd colli ei phriod yn 69 oed yn golled fawr iddi, ond ni chollodd ei hysbryd cadarnhaol a gobeithiol at fywyd. Cyfnod byr iawn fu ei phriodas â'r Parchedig Ken Bufton ac ar ôl ei golli ef a phan ddaeth ansefydlogrwydd i'w bywyd y dechreuodd y cof ballu. Daeth cynulleidfa dda i'r angladd ym Mrynaman, o Lundain, Abertawe, Aberystwyth. Yn y gynulleidfa yr oedd Beti, ffrind bore oes a oedd yn forwyn briodas i Blodwen. Yr ydym yn cydymdeimlo yn fawr â Delyth, ei merch, a channwyll ei llygaid, John, ei phriod a'r wyrion, Richard a Christopher, ac yn anfon ein cofion atynt yn eu colled.

Digwyddiadau'r Grawys a'r Pasg

Sul cyntaf y Grawys: 29 Chwefror
Bore
Gwasanaeth Gw^yl Ddewi yng nghwmni'r plant a
Ceri James a Mair Owen o Eglwys Santes Fair
Hwyr
Llythyr y Grawys: Llythyr at yr Hebreaid
Wyneb yn wyneb: Auriel Fenton
(Bydd cyfres o gyfweliadau gyda gwahanol bobl yn ystod y Grawys)

Ail Sul y Grawys: 7 Mawrth
Bore
Man cyfarfod y Grawys: anialwch
Hwyr
Cwmni'r Grawys: Job
Wyneb yn wyneb: Iwan Morus, Belffast
(Fe fydd Iwan yn traddodi darlith yn y Brifysgol, nos Fercher, 10 Mawrth)

Trydydd Sul y Grawys: 14 Mawrth
Bore
Y gwragedd drwy ffydd sy'n llunio'r dyfodol
Gwasanaeth dan arweiniad y chwiorydd fydd yn rhannu neges Dydd Gweddi Chwiorydd y byd.
Hwyr
Proffwyd y Grawys: Jeremeia
Gwasanaeth dan arweiniad dosbarth Ysgol Sul yr oedolion


Pedwerydd Sul y Grawys: 21 Mawrth
Bore a Hwyr
Gwasnaethau dan arweinad Anna Jane
(Cymorth Cristnogol)
Bore: Wyneb yn wyneb: Parchedig Cherisol Burnet (Haiti)
˜
Pumed Sul y Grawys: 28 Mawrth
Bore
Cwmni'r Grawys: pererinion
Gweinyddir Sacrament o Fedydd
Hwyr
Gweddi'r Grawys: gweddi ufudd-dod
Wyneb yn wyneb : Enid Philips
˜
Chweched Sul y Grawys: 4 Ebrill
Bore
Dinas y Grawys: Jerwsalem
Hwyr
Gw^yl y Grawys: Gw^yl y Pasg
Wyneb yn wyneb: Carys Lloyd

Nos Iau Ebrill 9ed am 7.00 ym Methel
Oedfa Gymun

Gwener y Groglith, am 10.00, Capel y Morfa
Oedfa Deuluol i'r eglwysi Cymraeg

11.15 Gorymdaith drwy'r dref

Nosweithiau Iau yn y Grawys

Gweddi'r Arglwydd
Cyfres o fyfyrdodau/astudiaethau Beiblaidd
ar Weddi'r Arglwydd dan arweiniad
aelodau o eglwysi Cymraeg y dref
Fe'i cynhelir yn Sant Paul
26 Chwefror, 4, 11, 18, 25 Mawrth
Croeso cynnes i bawb.

Nos Lun, 8 Mawrth, 7.30 yn Festri'r Morfa

Byw gyda'r Palestiniaid yn Nablus: Noson yng nghwmni Anne Gwynne
(a welwyd ar y rhaglen Y Byd ar Bedwar yn ddiweddar
cyn iddi ddychwelyd i Balesteina)

Bydd casgliad tuag at project MAMA ym Mhalesteina.

DAL I GREDU

Cynhelir cyfres arall o 4 cyfarfod
yn ystod mis Mawrth,
ar nosweithiau Mawrth, 2, 9, 16 a 23
ym Meth-Seilun am 7.30.
Y Bugail fydd yn arwain y gyfres hon.

Bu Noson Grempog yr Ysgol Sul yn noson lwyddiannus iawn: crempogau blasus, cerddoriaeth (eitemau offerynnol gan rai o blant yr Ysgol Sul) a chwmnïaeth dda.

DYDDIADUR

24 Chwefror: 6 o'r gloch yn y Festri. Noson Grempog yr Ysgol Sul, Gwledd o grempogau, ac eitemau offerynnol gan rai o blant yr Ysgol Sul. Coeso i chi i gyd!

2 Mawrth: Cyfres newydd o Dal i Gredu, yn y Festri. Croeso i bawb.

5 Mawrth: Chwiorydd y Byd: Cynhelir Cyfarfod Gweddi Chwiorydd y Byd ar brynhawn Gwener, 5 Mawrth, ym Methel

9 Mawrth: Dal i Gredu, yn y Festri. Croeso i bawb.

16 Mawrth:  Dal i Gredu, yn y Festri. Croeso i bawb.

23 Mawrth: Dal i Gredu, yn y Festri. Croeso i bawb.

GWEDDI

Ein Tad, gofynnwn dy fendith ar ein dyfod i'th dy^. Dysgwyd inni'n fore gerdded y llwybr hwn, ac nid yw dy gysegr yn lle dieithr inni. Moddion cynefin sydd at ein llaw yma, a diolchwn amdanynt. Ond addefwn i'r cynefindra hwn ddod rhyngom a'th fendith lawer tro. Aethom i ganu emynau cyfarwydd yn ddifeddwl, a cholli'r rhin sydd ynddynt. Clywsom ddarllen y Beibl a'i frawddegau cynefin, heb glywed y Gair ynghanol y geiriau. Gwnaethom ystum gweddi, gan grymu pen yng nghymdeithas dy bobl heb nesáu at orseddfainc dy ras, a'n meddwl ymhell oddi wrthynt.

A mynych y clywsom bregethu'r Efengyl, heb i hynny gyffroi'r galon na thanio'n dychymyg na dwysbigo ein cydwybod.
Ond yr wyt Ti'n gallu gwneud pob peth yn newydd. Rwyt Ti'n gwisgo pob gwawr a machlud beunydd â newydd-deb ac ni heneiddia gwanwyn a haf, hydref a gaeaf.
Mae pob trai a llanw'n newydd.
Ni phalla newydd-deb geni a marw, na rhyfeddod anwyldeb a chariad.
Gwêl yn dda wisgo moddion gras hefyd â newydd-deb y dyddiau hyn.
Tro emynau cyfarwydd yn ffiolau newydd yn llawn o win melys yr Efengyl.
Tro hen Feibl yn air diweddaraf oddi wrthyt Ti atom ni.
Tro weddi inni'n fwy na defod ddiystyr, a phâr inni glywed pregethu'r hen, hen hanes yn
`Newydd mawr a newydd llawen,
Newydd gwir a newydd rhad.'
Er mwyn Iesu Grist. Amen.

Cynnal Oedfa, td. 111

SWYDDOGAETHAU MAWRTH 2004

Blaenor y Mis Dr Noel G Lloyd
Porthorion Mr Terry Adams a Mr David Alun Jones
Mrs Mary Howells a Mrs Gwen Job

Blodau'r Cysegr - Y Morfa
7 Mrs Dilys Evans a Mrs Eira Williams
14 Mrs Mary Fitter a Mrs Peni Edwards
21 Mrs Jên Ebeneser
28 Mrs Beti Roberts

Blodau'r Cysegr - Ebeneser
7 Mrs Blodwen Isaac
14 Mrs Janie Jones
21 Mrs Susan Hughes (er cof)
28 Mrs Susan Hughes (er cof)

Cynorthwywyr Llestri Cymun
7 Mrs Beryl Davies, Mrs M Creunant Davies,

Mrs Mary Fitter a Mrs Ann Williams

Cynorthwywyr Ariannol
7 Mr a Mrs T L Thomas
14 Mr J G L Evans a Mr Gwynfor Jones
21 Mr Hywel Lloyd a Mrs Glenys James
28 Mr a Mrs Terry Adams

Tregerddan
28 Dan ofal Ms Gwenan Creunant a Mrs Ann Davies