CYNNWYS GAIR GAN Y BUGAIL NEWYDDION YSGOL SUL YR OEDOLION ER COF MORLAN GWEDDI DYDDIADUR MORLAN DYDDIADUR EBRILL 2005 SWYDDOGAETHAU EBRILL  2005

                                  

GAIR GAN Y BUGAIL Fe fydd y rhifyn hwn yn ymddangos ar Sul y Pasg ac ar ddechrau'r mis pan fydd Morlan yn agor yn swyddogol. Y mae digon yn y rhifyn hwn yn dathlu'r achlysur hwnnw a'r cyfan yr hoffwn ei ddweud yn y nodiadau hyn yw fod yna gysylltiad agos iawn rhwng y Pasg a Morlan. Ar draws y byd ym mhob man mae yna rywbeth newydd yn dod i'r golwg ac mae yna arwyddion bychan o fywyd i'w gweld yn cyniwair. Y mae yna ddigon o bobl yn barod i alarnadu ac i fod y gwbl negyddol am ddyfodol yr eglwys. Nid ydym yn brin o broffwydi gwae. Ond mae neges y Pasg yn dathlu bywyd newydd yng Nghrist ac y mae'r eglwys wedi byw ar hynny. Rhywbeth bychan iawn, iawn yw Morlan ond i'r rhai sy'n credu yn yr Atgyfodiad y mae'n ganlyniad uniongyrchol i'r egni a ffrwydrodd o'r bedd - a'r Iesu byw yw hwnnw. Y mae Ef yn gwneud pethau newydd a thrwy ras a gwyleiddra, gweddi a gwaith, mentr a dyfalbarhad, fe fydd y Morlan a Chapel y Morfa yn rhan o newydd-deb y bywyd yng Nghrist. Ar y Sul cyntaf o Fawrth fe fu yn rhaid i mi - ar ôl siarad gydag amryw o bobl - wneud apel daer am gysondeb yn ein plith i fywyd yr eglwys. Agwedd ar ffyddlondeb yw cysondeb. Y mae wedi dod i'r golwg yn arbennig yn anghysondeb cymaint o'r plant a'u rhieni a nifer y rhai sydd yn yr Ysgol Sul, ar adegau, yn anhygoel o isel. Ond y mae nifer fawr o aelodau hefyd sydd yn addolwyr achlysurol ac oherwydd hynny mae yna ddiethrwch yn digwydd ac y maent ar gyrion yr eglwys yn lle yng nghanol y gymdeithas a'r addoli. Mae effaith hyn ar fywyd yr eglwys yn fwy o lawer nag yr ydych yn sylweddoli. Mewn oes mor brysur a bywydau mor llawn yr ydym yn gorfod gwneud dewisiadau a gosod blaenoriaethau. Mae'n wir am ein bywyd yn gyffredinol, yn deulu, gwaith a gorffwys. Mae neges y Pasg yn dweud na allwn wneud llai na hynny gyda'r eglwys a'r Efengyl hefyd. Mesur ein cysondeb yw mesur ein ffyddlondeb a mesur ein ffyddlondeb yw mesur ein hymrwymiad i fywyd ei eglwys Ef - oherwydd dyna yw Capel y Morfa. Pasg ac Ebrill llawen iawn i bawb ohonoch a gweddïwn a dymunwn bob bendith i'n cenhadaeth drwy Morlan! Pryderi.

NEWYDDION

Bedydd

• Ar fore Sul y Blodau bedyddiwyd Mared Llwyd, merch Marc a Non (Llanrug) a chwaer i Beca ac Owain ac wyres i William a Beryl, Eirwen a Pryderi. Dymuniadau gorau iddynt fel teulu.

Ein cofion …

• at Eluned Powys Roberts, Elsie Evans, Kathleen Howells ac Alun Creunant Davies yn Ysbyty Bronglais, Madge Richards a Greta Jones yn Nhregaron ac at Joan Jones (Maesceinion) sydd wedi bod yn yr ysbyty ond bellach yn ôl yn ei chartref. Anfonwn ein cofion hefyd at David Reeves sydd bellach yng Nghysgod y Coed, Llanilar. Yr ydym yn falch fod Bet Evans yn gwella ar ôl ei thriniaeth.

Gwerthfawrogwyd yn fawr barodrwydd y rhai fu'n gwneud trefniadau ar gyfer yr angladd yn y Morfa ac yn arbennig gwasanaeth chwiorydd Morfa ac Ebeneser yn paratoi lluniaeth yn y festri i aros i ni ddychwelyd o'r Amlosgfa. Bu'r cyfan yn gymorth mawr i ni fel teulu.

ER COF Megan Creuant Davies. Roedd capel gorlawn a festri lawn ar 25 Chwefror yn dystiolaeth ynddo'i hun i'r cariad yn ein plith tuag at Megan a'r golled aruthrol ar ei hôl. Fel athrawes, fel athrawes Ysgol Sul, fel gwraig weithgar y pethe, fe fu'n calonogi ac yn gwasanaethu eraill ar hyd ei hoes. Ac fel Megan Alun, fel mam Gwenan a Deian, fel mam-gu Marged a Tomos, chwaer Roy a mam yng nghyfraith i Iwan a Sian, fe fu yn bopeth i'w theulu yn ei gofal a'i chroeso, yn ei chariad ac yn ei hegwyddorion. Yn achos Megan nid oes modd iddi fynd ar goll yn yr `Alun a Megan Creunant' oherwydd fod ei chyfraniad ei hun mor gyfoethog ac eto fe fu'n gefn ac yn gymorth mawr i Alun yn ei waith a'i fywyd prysur. Er i ni golli ei gweithgarwch yn Ebeneser a Chapel y Morfa ers pedair blynedd bron, y mae'n golled fawr i ni fel eglwys. Wedi'r cyfan yr oedd addoli yn ganolog yn ei bywyd, cymdeithas yr eglwys yn fwy gwerthfawr na dim iddi, a'i phwyslais parhaol am i ni gydweithio fel aelodau ac fel Cristnogion o wahanol eglwysi yn bwyslais cyson yn ei sgwrsio. Gwyn fyd yr eglwys a gafodd Megan yn aelod; gwyn fyd y gymuned a gafodd Megan yn byw ynddi; a gwyn fyd y teulu, yn ei alar, sydd gyda chymaint o atgofion a diolch. Yr ydym yn diolch i Dduw amdani ac am iddi gyfoethogi bywyd cymaint o bobl wrth wasanethu ei Gwaredwr. Yr ydym yn yn anfon ein cofion at Alun, sydd yn yr ysbyty, gan weddïo y bydd ef, Gwenan a Deian, yn cael nerth mewn cyfnod mor anodd. Bu farw Eirian Hayes yn dawel fore Llun 14 Mawrth. Nid yn aml y byddwn yn defnyddio'r geiriau `marwolaeth dda', ond felly y bu i Eirian yn 90 oed - yn dawel fel cwsg yng nghlydwch a diogelwch ei hystafell ym Modlondeb a'i merch Geraldine wedi bod yn gwylio wrth ei gwely am ddyddiau lawer a'r staff ym Modlondeb yn gweini'n ffyddlon. Gwraig dawel iawn oedd Eirian ond ei gwên yn gynnes ac yn groesawus pob amser. Yr oedd yn un o deulu clos Tyn Pwll yng Ngoginan ac er iddi fyw am gyfnod yn Llundain a phriodi yno ag Albert, yn ôl i Geredigion y daeth hi a'i theulu. Fe gafodd hi a'i chwaer, Enid (sef ein Henid (MB) Roberts ni) briodas ddwbwl yng Nghapel Bath Street Aberystwyth. Yn 1978 lladdwyd ei mab Robert mewn damwain ffordd ym Mhenrhyn-coch ac fe adawodd hynny graith fawr ar fywyd Eirian. Pedair blynedd cyn hynny yr oedd wedi colli Albert. Ni fu bywyd yr un fath ar ol dwy brofedigaeth mor fawr ac er iddi gael gofal ffyddlon gan Geraldine a chyfeillgarwch mawr gan Enid ac MB, bu cyfnodau pan oedd bywyd yn anodd iawn iddi. Ond yr oedd ganddi ddigon o hiwmor direudus. Nid un i feirniadu neb oedd Eirian ac yr oedd ei synnwyr cyffredin yn rhoi iddi gydymdeimlad dwfn â phobl o bob math. Bu'n dawel-ffyddlon i'r eglwys ac o Goginan i Jewin a Chapel y Morfa cafodd gadernid a thangnefedd er gwaethaf yr amgylchiadau anodd. Yr ydym yn cydymdeimlo yn fawr iawn a'i merch Geraldine a'i phriod Bernard ac a'i wyrion, Stephen a Kathleen ac ag Enid a'r chwaer Rosie yn Llundain.

MORLAN

Datganiad cenhadol Morlan

Credwn fod Arglwyddiaeth Iesu Crist ar fyd a bywyd yn ein galluogi ac yn ein cymell i ymwneud â phob agwedd o fywyd ein cymdeithas, ein cenedl a'n byd. Credwn na allwn gyfyngu ei Arglwyddiaeth i eglwys na thraddodiad a'i fod Ef yn ein gwahodd i'w ddarganfod ar waith yng nghanol ein diwylliant cyfoes - yn ein wynebu a her ei Efengyl, yn ein bendithio yn ein tystiolaeth, ac yn ein galluogi i ddefnyddio ein doniau creadigol.

Dymuniadau gorau

Ar ran swyddogion ac aelodau Capel y Morfa carwn fanteisio ar y cyfle hwn drwy Perthyn i ddymuno'n dda i Morlan ar achlysur ei agoriad swyddogol. Mae'r daith hyd yma wedi bod yn hir a llafurus, ond mae gweld yr adeilad ar fin ei orffen yn hwb i bawb, ac mae'r gweithgareddau sydd wedi eu cynnal o dan faner Morlan wedi profi yn llwyddiant mawr.

Mae ein dyled yn fawr i holl bwyllgorau Morlan, ac mae pawb sydd wedi bod yn gysylltiedig â'r fenter yn haeddu pob clod a dymuniadau da.

Dai Alun Jones, Ysgrifennydd (ar ran y Blaenoriaid)

Gair gan Gadeirydd Bwrdd Rheoli Morlan

O'r diwedd, mae adeilad Morlan wedi'i gwblhau a'r drysau ar fin cael eu hagor.

Nid ar chwarae bach y mae cychwyn ar fenter mor uchelgeisiol â hon ac mae'r ffaith ein bod wedi llwyddo i godi'r adeilad a thalu amdano yn dyst i frwdfrydedd a dyfalbarhad nifer o unigolion a fu'n benderfynol o droi'r freuddwyd yn ffaith.

Pan ddechreuwyd ar y gwaith cynllunio, ni feddyliodd yr un ohonom y byddai'n cymryd cymaint o amser i gwblhau'r gwaith, ond mae hynny'n hen hanes bellach a gallwn yn awr edrych ymlaen yn hyderus at y bennod nesaf yn hanes datblygiad Morlan.

Ar ran y Bwrdd Rheoli, hoffwn ddiolch i bawb sydd wedi cyfrannu ym mhob ffordd, yn enwedig y rhai sydd wedi gwasanaethu ar bwyllgorau a phanelau a rhoi mor hael o'u hamser a'u harbenigedd. Rydym hefyd yn ddiolchgar iawn am y cyfraniadau ariannol gwerthfawr oddi wrth aelodau'r Morfa a chyfeillion eraill. Mae'n wir inni dderbyn grantiau hael oddi wrth CWM (Council for World Mission), Ymddiriedolaeth James Pantyfedwen, Awdurdod Datblygu Cymru ac eraill. Ond y gwir amdani yw mai cyfraniadau gan unigolion oedd yr allwedd i ddenu cyfraniadau o'r sector cyhoeddus a'r sector preifat a hynny am eu bod yn ernes o'r gefnogaeth gref sydd i'r fenter o fewn y capel a thu hwnt. Mawr werthfawrogir y gefnogaeth honno.

Edrychwn ymlaen at eich cwmni yn y cyfarfodydd cychwynnol. Dewch yn llu!

Gwerfyl.

Am wybodaeth bellach am Morlan a'r cyfleusterau sydd ar gael yno, cofiwch ymweld â'r wefan:

Morlan.org.uk

ac os oes gennych ymholiad, gallwch yrru e-bost drwy'r wefan, neu drwy ddefnyddio'r cyfeiriad

ymholiadau@morlan.org.uk

Diolch

Yr ydym yn ddiolchgar iawn i bawb sydd wedi cyfrannu tuag at Morlan yn ystod yr wythnosau diwethaf - nifer nad oedd wedi cael y cyfle i gyfrannu o'r blaen a nifer wedi dangos awydd i gyflwyno rhodd arbennig i Morlan. Fel y mae Cadeirydd y Bwrdd Rheoli yn dweud yn ei chyfarchion y mae cyfraniadau gwirfoddol o'r fath wedi bod yn allweddol o'r dechrau. Llawer o ddiolch.

Os oes rhywun a hoffai gyfrannu yn ariannol tuag at ddatblygu gwaith y Morlan, yna fe fuasem yn falch iawn o glywed gennych. Pan lansiwyd apêl ariannol flynyddoedd yn ôl bu cyfrannu hael, bu cyfamodi a chyfrannodd aelodau Capel y Morfa (yn rhoddion unigol ac yn ddigwyddiadau i godi arian) dros £90,000. Yr oedd yn haelioni ac yn ymrwymiad mawr. Efallai fod yna rai aelodau nad ydynt wedi cael cyfle i gyfrannu neu nad oeddynt am gyfrannu ar y pryd. Neu, efallai yr hoffai rhai wneud cyfraniad pellach. Dyma'r cyfle i wneud hynny. Yr ydym, yn ystod yr wythnosau diwethaf, wedi derbyn rhoddion hael gan deuluoedd sy'n gysylltiedig â'r eglwys ac yr ydym yn ddiolchgar iawn am hynny. Os hoffai unrhyw un gyflwyno rhodd i ddiolch neu er cof am aelodau o'r teulu yna y mae gennym restr o nifer o bethau fydd eu hangen ar gyfer y Morlan ac fe fuasem yn barod iawn i drafod hynny gydag unrhyw un. I gyflwyno rhodd ariannol neu i holi am roddion penodol fe allwch gysylltu ag unrhyw un o Aelodau Bwrdd Rheoli'r Morlan, y Blaenoriaid neu'r Bugail.

YSGOL SUL YR OEDOLION

Yr ydym yn dechrau gweld yr Eglwys Fore fel y mae'n cael ei dangos ym mhenodau cyntaf Llyfr yr Actau yn od o debyg i'r eglwys heddiw, yn yr her sy'n ei hwynebu, yn ei gwendidau ac, fe obeithiwn, yn ei chryfderau. Buom yn ystyried:

1. Sut mae'r Ysbryd Glân yn gweithio yn yr eglwys heddiw? A ydym yn gallu adnabod ei waith?

2. Ai ym mhregethu'r eglwys, ai yn ei gweithredoedd y mae ei thystiolaeth gryfaf? Beth yw arwyddocâd dweud, 'Yn enw Iesu Grist o Nasareth, cod a cherdda', wrth i'r eglwys estyn cymorth?

3. Pa fath o gymdeithas yw'r eglwys? Sut mae'r aelodau'n cynnal ei gilydd? A yw cael popeth yn gyffredin yn golygu nid meddiannau aelodau ond eu bywydau?

4. Yr oedd yn ysgytwad darllen hanes marwolaeth sydyn Ananias a gweld mai'r hyn a'i lladdodd oedd iddo sylweddoli fod ceisio twyllo cyd-aelodau yn golygu ceisio twyllo Duw. Beth, tybed, yw natur eglwys a gwerth/braint bod yn aelod?

5. Yr oedd gwahaniaethau ieithyddol a diwyllianniol yn yr Eglwys Fore yn Jerwsalem, a'r rhain yn arwain at ragfarn ac ymgecru. Sut mae diogelu'r gwahaniaethau hyn heb beryglu undod yr eglwys yn lleol ac yn genedlaethol?

6. Bu rhaid i'r Eglwys Fore ddatblygu patrymau newydd o weinidogaethu i'w haelodau. A yw amgylchiadau heddiw yn galw am batrymau newydd?

Dosbarth Ysgol Sul yr Oedolion yng Ngwesty'r Richmond

Bryn Roberts yn cyflwyno blodau i Ann Davies a Pryderi yng Ngwesty'r Richmond ...

GWEDDI

Y Crist Byw Arglwydd Iesu Grist, trwy dy atgyfodiad nerthol gorchfygaist bechod ac angau a gwnaethost bob peth yn newydd. Tyrd atom i'n llenwi â'th fywyd atgyfodedig dy hun, i'n rhyddhau ni o bob digalondid ac i'n tanio â gobaith a gorfoledd y Pasg. Fel y daethost at Mair yn yr ardd a throi ei dagrau yn llawenydd, tyrd at bob un sydd mewn trallod, profedigaeth ac unigrwydd, a chofleidia hwy yn dy gariad. Fel y daethost at dy ddisgyblion ar lan y môr, a throi eu hofn yn hyder newydd, tyrd at dy Eglwys ac at dy bobl heddiw a gwna ni'n frwd a gwrol yn ein cenhadaeth. Fel y daethost at Thomas, yr amheuwr, a throi ei amheuaeth yn argyhoeddiad sicr, tyrd at y rhai sy'n teimlo'u ffydd yn wan a'r rhai sy'n cael anhawster i gredu, a rho iddynt sicrwydd llawen ynot ti. Fel y daethost at y ddau ar ffordd Emaus a throi eu hanobaith yn orfoledd, tyrd at y rhai sy'n teimlo'u bywyd yn ddibwrpas a bydd yn gwmni iddynt ar eu taith. Tyrd atom bob un a thrwy rym dy fywyd atgyfodedig cod ni o'n gwendid a'n methiant a rho i ni hyder yn ein ffydd a gorfoledd yn dy waith.

DIGWYDDIADAU MORLAN

Mae'r digwyddiadau isod yn agored i bawb ac yr ydym yn estyn gwahoddiad cynnes iawn i holl aelodau Capel y Morfa er mwyn i ni gael cyfrannu yn y llawenydd a'r cyffro o ymestyn ein gwaith a'n cenhadaeth - ac er mwyn dangos cefnogaeth mewn gair, gweddi a gweithred i'r fenter. ˜ Nos Fawrth, 12 Ebrill, 7pm Pwy biau'r Newyddion? Noson o drafodaeth ar le a chyfrifoldeb newyddiadurwyr yn y wasg a'r cyfryngau, gyda Dylan Iorweth (Rheolwr Gyfarwyddr Golwg) Chris Sunderland (Sylfaenydd gwefan AGORA sy'n ysgogi trafodaeth ar faterion cyhoeddus a gwefan sy'n derbyn nawdd gan Gymdeithas y Beibl). Bydd y noson yn dechrau gyda bwffe am 7pm. Er hwylustod y trefnu rhowch wybod os ydych am ddod drwy ffonio 617996 neu drwy yrru e-bost i ymholiadau@morlan.org.uk neu fe allwch roi eich enw ar daflen yng nghyntedd y capel. ˜ Nos Wener, 22 Ebrill, 7.30pm Gorwelion Arddangosfa o waith Marian Delyth gyda darlleniadau o gerddi newydd ar gyfer yr achlysur gan feirdd lleol. Tocyn £5.00 (yn cynnwys lluniaeth ysgafn). Bydd tocynnau ar werth yng nghyntedd y capel ar ddydd Sul Ebrill 10 ac 17. Bydd cyflwyniad arall nos Sadwrn, 23 Ebrill. Dim ond 70 tocyn sydd ar werth ar gyfer pob noson. ˜ Dydd Sadwrn, 23 Ebrill, 11am. Morlan - Pam? Seiat Holi arbennig fydd yn cael ei darlledu ar Radio Cymru ar y Sul dilynol Panel: Elin Royles (Morlan), Arfon Jones (Cyn-ysgrifennydd y Gyngrair Efengylaidd yng Nghymru a chreawdwr Beibl.net), Aled Jones Williams (Offeiriad a dramodydd) a Hywel Teifi Edwards Cadeirydd: John Roberts. … yna, am 12.00 o'r gloch Agoriad swyddogol Morlan ˜ Dydd Sul, 24 Ebrill Diolch, dathlu a gweddi yng nghwmni Dafydd Andrew Jones (Caerdydd) Andrew Johnson (CWM) a nifer o wahoddedigion eraill. 10.00 Gwasanaeth yng Nghapel y Morfa. 6.00 Gwasanaeth arbennig yn y Morlan. ˜ Yn ystod yr wythnos sy'n arwain at yr agoriad mae nifer o ddigwyddiadau eraill - gan gynnwys gweithgarwch i'r plant a'r ieuenctid a noson i gyfarfod â myfyrwyr o leiafrifoedd ethnig ac o wledydd tramor. Byddwn hefyd yn dechrau ar batrwm o gylch gweddi ac amser tawel dair gwaith yr wythnos: bore Mawrth, 11.00 (Cenhadaeth yr eglwys) bore Mercher, 12.00 (Ein cymuned) prynhawn Iau, 1.00 (Cyfiawnder a Heddwch) Mae gwahoddiad cynnes i unrhyw un alw i mewn.

EBRILL 2005 Blaenor y Mis Mr Merfyn Davies Porthorion Miss Gwerfyl Pierce Jones, Mr John Evans, Mr L. John Roberts, Mr Hefin Jones Blodau'r Cysegr - Y Morfa 3 Mrs Mair Davies a Mrs Nesta Jones 10 Mrs Mair Griffiths 17 Mr a Mrs Moelwyn Hughes 24 Mrs M Roderick a Mrs Eluned Morris Blodau'r Cysegr - Ebeneser 3 Mrs Lilian Jenkins 10 Misses Llinos a Rhiannon Hughes 17 Mrs Sian Powell 24 Mrs Betty Davies Cynorthwywyr Llestri Cymun 10 Mrs Jean Davies, Mrs Ethel Williams, Mrs Mair Hughes, Mrs Mary Jones Morris Cynorthwywyr Ariannol 3 Mr a Mrs Alun Morris 10 Mr E. Meirion Morgan a Mr David Harries 17 Mr D. Brian Thomas a Mr David M Evans 24 Mrs Glenys James a Mrs Miriam Garratt Tregerddan 24 Dan ofal Miss Eleri Davies