Edrychwch a Gwyliwch ...   

CYNNWYS GAIR GAN Y BUGAIL NEWYDDION DIOLCH I  MERFYN A JEAN ER COF MORLAN CYHOEDDI DWY GYFROL GWEDDI DYDDIADUR TACHWEDD 2005 SWYDDOGAETHAU TACHWEDD  2005

                            

GAIR GAN Y BUGAIL Dwy ddrama mewn un wythnos. Un cwmni bach (Cwmni Riding Lights yn y Morlan, Saesneg). Un cwmni mawr (Theatr Genedlaethol Cymru yn Theatr y Werin, Cymraeg) Cynulleidfa fawr yn Theatr y Werin - a diolch am hynny. Nid mor fawr yn y Morlan. Dwy ddrama hanesyddol hefyd a dwy awdures: Bridget Foreman awdur y ddrama Remember, remember (yn cofio cynllwyn Guto Ffowc bedwar can mlynedd yn ôl) a Valmai Jones (awdur Hen Rebel i gofio Diwygiad 1904). Ystrydebol a diddychymyg iawn oedd Hen Rebel a dim ond ambell i fflach o egni byw. Arwynebol efallai yw'r gair: canu swynol, disgybledig (a gwahanol iawn i'r diwygiad) a phrif gymeriad na lwyddodd i'n hargyhoeddi o'i orfoledd na'i wewyr. Efallai fod Valmai Jones yn ymwneud â phwnc nad oedd yn ei chyffroi na'i hysbrydoli ac yn bwnc nad oedd wedi ei ddeall. Wnaeth hi ddim gwahanol na newydd, ond ailadrodd hen stori orgyfarwydd bellach. Dim ond un neu ddau o'r cymeriadau a ddaeth yn fyw. Fe wn nad oes dim newydd i'w ddweud, ond ei ddweud mewn ffordd newydd yw tasg theatr. Testun am gynllwyn na ddigwyddodd oedd drama Bridget Foreman, ond fe gydiodd yn ei phwnc gan wybod o'r dechrau nad ymwneud â hen bethau ydoedd ond yn ymwneud â phrofiadau, argyhoeddiadau ac emosiynau sydd mor gyfoes ag erioed. Roedd argyhoeddiad yn y sgript. Aeth y cast o bump ati gydag egni a doniau rhyfeddol i godi cwestiynau, i herio confensiynau ac i wneud ffydd a chred yn llawer iawn mwy nag ail adrodd hen ystrydebau. Gyda dychymyg a dyfeisgarwch daeth ddoe a'i fethiannau a heddiw a'i ofnau yn fyw mewn theatr. Terfysgaeth oedd y ddrama, credu oedd y pwnc a'r dylanwadau sy'n gallu creu ofnau yn ogystal a rhagfarnau. Nid nad oedd i'r ddrama ei gwendidau. Ond yr oedd yn fyw. Fe all ein Cristnogaeth fod yn union fel y ddwy ddrama. Fe all fod yn ddiogel, gonfensiynol, di-liw a diddychymyg. Neu yn gyffrous ac yn fentrus, yn barod i ddarganfod y newydd ac i fod yn egni byw yn llifo trwy ein bywyd. Pryderi. Cynhyrchiad Cwmni Riding Lights o Remember Remember

Gwasanaeth Diolchgarwch

NEWYDDION

Cofion

• at Joan Jones, 32 Maesceinion a fu yn yr ysbyty yn ystod mis Hydref ac at Margaret Jenkins, Buarth Lodge, sydd wedi derbyn triniaeth yn ysbyty Bronglais. Yn parhau yn yr ysbyty hefyd y mae Alun Creunant Davies ac yr ydym yn anfon ein cofion cynhesaf ato.

Ein cydymdeimlad dwys …

• â Gwenan a Deian Creunant a'u teuluoedd ar golli tad a thad-cu  Alun Creunant Davies ers i'r rhifyn hwn o Perthyn fynd i'r Wasg.

Llongyfarchiadau …

• i Tom a Mair Jones, 11 Penmorfa ar ddathlu eu priodas aur yn ddiweddar ac i Elfed a Phyllis Parry, Elysian Grove ar ddathlu priodas ruddem.
• i Stephen a Nerys Jones, Penrhyn-coch ar enedigaeth eu cyntaf-anedig, Lowri Mair ar 1 Hydref - y wyres gyntaf i Mary ac wyres arall i Alun.

Pob dymuniad da a phen blwydd hapus i …

• Miss Lilian Charles sydd mewn cartref gofal yn Abertawe ac yn edrych ymlaen bob mis at dderbyn Perthyn ac at ei ddarllen o glawr i glawr. Anfonwn ein cofion ati gan ddymuno pen blwydd hapus iddi ar ddechrau Rhagfyr.

Diolch …

• Dymuna'r Ysgol Sul ddiolch i bawb am eu cefnogaeth i'r bore coffi. Gwnaeth elw o £367!
• Cynhaliwyd Bore Coffi yn y Morlan ar y dydd Gwener olaf o Fedi i godi arian tuag at Cronfa Macmillan. Yr oedd hyn yn rhan o gynllun Bore Coffi Mwya'r Byd. Diolch o galon i'r rhai a drefnodd, a gynorthwyodd ac a gefnogodd. Llwyddwyd i godi £400.
• Dymuna Eira Williams ddiolch yn fawr iawn ar ran ei mam, Dilys Evans gynt o Denstone, Stryd Faenor, ac yn awr o Gartref Tregerddan, am bob ymwelaid a dymuniad da mae wedi eu derbyn yn ddiweddar wedi treulio dau gyfnod yn Ysbyty Bronglais a hefyd Ysbyty Tregaron. Mae ei diolch yn ddiffuant i ffrindiau ac aelodau ffyddlon Capel y Morfa. Diolch o galon.

Dau fedydd …

Yn ystod mis Hydref bedyddiwyd dau o aelodau ieuengaf y Capel: Elen Madrun, merch Sera Llewelyn ac Andrew Evans, a chwaer fach Dafydd a Rhodri …

… a Gruffudd Ynyr, mab Rhys a Jenny Jones, a brawd bach Glesni

DIOLCH I MERFYN A JEAN

Ar ôl rhai blynyddoedd y mae Merfyn a Jean yn ymddeol fel gofalwyr y capel. Nid oes raid dweud y bydd hyn yn golled fawr iawn i ni. Yr ydym wedi bod yn ffodus o gael gofalwyr mor ofalus a chydwybodol - mae gofalwyr o'u bath yn brin. Yr ydym yn falch iawn fod Jean, ar ôl cyfnod anodd, bellach yn ôl yng nghanol holl weithgarwch yr Eglwys. Llawer o ddiolch i'r ddau ohonoch am fod mor gymwynasgar, ac am fod ar gael mor gyson. Mae llawer o gapeli ac eglwysi yn lleisio yr un gºyn y dyddiau yma, sef mor anodd yw cael gofalwyr. Y mae gennym, fodd bynnag, awgrym arall a gwahanol …

Amser i Dduw ...?

Tybed a fyddai gennym ddigon o barau priod a fyddai yn barod i roi un mis y flwyddyn i fod yn ofalwyr i Gapel y Morfa? Tybed a oes ymysg y rhai sydd wedi ymddeol rywrai a fyddai yn barod i ystyried rhoi amser yn ystod un mis i hybu bywyd a thystiolaeth yr Eglwys trwy fod yn ofalwyr i hyrwyddo a hybu'r gwaith. Efallai ei fod yn ffordd ymarferol i gyfrannu tuag at waith yr Eglwys trwy ofyn: a wyf yn barod i neilltuo oriau arbennig i waith Duw drwy wasanaethu'r Eglwys? Amser i Dduw. Y mae'n swydd ac yn gyfraniad eithriadol o bwysig i greu awyrgylch hapus a chydweithio braf.

ER COF Bu farw Gwyn Jones yn yr ysbyty ar 23 Medi, a bu angladd preifat yn y fynwent yn Llangwyryfon - teulu Ffynnon Wen, Llangwyryfon oedd teulu Gwyn. Nid oedd `preifat' yn annisgwyl (er bod 'teuluol' yn well gair) oherwydd un tawel ac annibynnol iawn ydoedd. Llithro yn dawel i'r capel a wnâi - a diflannu yn sydyn; cerdded ar ben ei hun o gwmpas y dref a wnâi a chyfarch yn gwrtais, gyda gwên; `cadw iddo fo'i hun' a wnâi, ond bob amser yn llawn cydymdeimlad ag eraill. Oherwydd gwendid corff aeth Gwyn i fethu edrych ar ei ôl ei hun a bu raid iddo fynd i'r Deva a'r syndod oedd iddo fod yn ddigon bodlon ei fyd yno - hen lanc ymhlith `merched y Deva'! Ond gwenu a wnâi yno hefyd, eistedd yn dawel, edrych ar y môr a `gadael i'r merched siarad'! Er mor anodd ar adegau yw helpu rhywun mor annibynnol â Gwyn, fe gafodd ofal cynnes a gofalus gan ei nithoedd a'i deulu ac yr oedd yntau yn gwerthfawrogi hynny. Efallai nad oedd Gwyn yn un o ffyddloniaid y capel ac ychydig o aelodau'r capel oedd yn ei adnabod ond yr oedd ymysg y rhai hynny y mae ei ffydd a'r Eglwys wedi bod yn gadernid tawel iddo ar hyd ei oes: `Sut mae pethau yn y capel?' oedd ei gwestiwn pob amser. Yn y cwestiwn yr oedd ymdeimlad o werthoedd a gwreiddiau a pherthyn a pharhad. Diolch i Dduw am gael adnabod un o'i blant tawel nad oedd na malais na chenfigen na chasineb yn perthyn iddo.

CYHOEDDI DWY GYFROL

Ar 24 Tachwedd (nos Iau am 6.00) fe fydd lansiad y gyfrol Capeli Cymru gan Huw Owen - ein Huw Owen ni. Y mae Huw wedi bod yn paratoi'r gyfrol ers peth amser ac mewn cyfnod o newid mawr yn nhirlun capeli Cymru, fe fydd y gyfrol yn un bwysig a hanesyddol. Mae taflen gan Y Lolfa yn hysbysebu'r gyfrol gyda'r rhifyn hwn. Fe fydd y gyfrol ar gael ar noson y lansiad, yn Inc neu Siop y Pethe, neu, wrth gwrs, gan y Lolfa ei hun yn Nhal-y-bont.

Mae un arall o'n haelodau newydd gyhoeddi cyfrol hefyd. Ychydig ddyddiau yn ôl daeth Cofiant Gwynfor Evans o'r wasg. Yr awdur yw Rhys Evans, Cefn Esgair, sydd, wrth gwrs, yn gweithio gyda'r BBC yng Nghaerdydd. Edrychwn ymlaen at ddarllen cyfrol sydd eisoes wedi bod yn destun siarad a chanmoliaeth mawr.

MORLAN

Rhaglen Tachwedd Nos Fercher, 9 Tachwedd am 7.30 Cwmni'r Morlan yn cyflwyno DAG Cyflwyniad llwyfan i gofio canmlwyddiant geni Dag Hammarskjold a thrigain mlynedd sefydlu'r Cenhedloedd Unedig Rhaglen (wrth y drws) £3.00 Nos Fercher, 16 Tachwedd am 7.30 Crist a Chenedlaetholdeb Sgwrs a thrafodaeth gydag Arfon Jones, Caerdydd Trefnwyd gan Undeb Cristnogol y Myfyrwyr a'r Morlan Dydd Sadwrn, 19 Tachwedd 11.00 - 4.00 Ffair Grefftau ac Anrhegion Cerddoriaeth … lluniaeth ysgafn, tuag at Ffagl Gobaith Nos Iau, 24 Tachwedd am 6.00 Lansio cyfrol newydd Capeli Cymru gan Huw Owen, Aberystwyth Nos Iau, 1 Rhagfyr am 7.30 Diwrnod Byd Eang Aids Côr ABC yn ymuno â chorau eraill ledled y byd i ganu Requiem Faure gyda'r nod o godi £100,000 tuag at Brosiect Aids yn Malawi. Bydd Arddangosfa Aids yn y Morlan. Nos Wener, 2 Rhagfyr am 7.00 Croeso Cymraeg a Chymreig i fyfyrwyr tramor i Aberystwyth. Eitemau o bob math - a bwyd! Croeso i bawb! Cofiwch am yr Ystafell Dawel dydd Mawrth (11.00), dydd Mercher (12.00), dydd Iau (1.00) Am wybodaeth bellach am Morlan a'r cyfleusterau sydd ar gael yno, cofiwch ymweld â'r wefan: Morlan.org.uk ac os oes gennych ymholiad, gallwch yrru e-bost drwy'r wefan, neu drwy ddefnyddio'r cyfeiriad ymholiadau@morlan.org.uk

Cafwyd noson hwyliog iawn yn y Morlan i ddathlu lansio CD Merêd, ddechrau Hydref

GWEDDI

Agor iddo O Dduw ein Tad, yr wyt ti yn ceisio lle yn ein calonnau ac yn sefyll wrth y drws ac yn curo, cynorthwya ni i glywed dy lais ac i agor pob rhan o'n bywyd i ti: cymorth ni i agor ein llygaid i weld gwaith dy ddwylo yn harddwch y byd o'n cwmpas ac yn y gofal a'r cadw a fu arnom; cymorth ni i agor ein clustiau i wrando dy lais yn llefaru wrthym yn dy Air ac yn nhawelwch ein gweddïau; cymorth ni i agor ein meddyliau i fyfyrio yn dy wirionedd ac i dderbyn pob gwybodaeth a gweledigaeth newydd yr wyt ti am eu cyfrannu inni; cymorth ni i agor ein heneidiau i oleuni dy bresenoldeb ac i rin a llawenydd cymundeb â thi; cymorth ni i agor ein calonnau i ti gael dod i mewn i deyrnas ynom ac i'n gwneud yn eiddo llwyr i ti dy hun

SWYDDOGAETHAU TACHWEDD 2005 Blaenor y Mis Mr Ifan Moelwyn Hughes Porthorion Dr W. J. Cynfab Roberts, Mr Hywel Lloyd, Mrs Ann Davies, Mr David Edwards Blodau'r Cysegr - Y Morfa 6 Mrs Mary C Howells 13 Mrs Margaret Morgan 20 Mrs Maggie Edwards 27 Mrs Iona Jones a Mrs Mary Jones Morris Blodau'r Cysegr - Ebeneser 6 Misses Llinos a Rhiannon Hughes 13 Mrs Laura Rumsey Williams 20 Mrs Susan Hughes 27 Mrs Betty Davies Cynorthwywyr Llestri Cymun 6 Mrs Valmai Davies, Mrs Gwyneth Clwyd Haydn-Jones, Mrs Gwen Job, Mrs Rhiannon Roberts Cynorthwywyr Ariannol 6 Mrs Glenys James a Mrs Miriam Garratt 13 Mr a Mrs Merfyn Davies 20 Mr D. Meirion Jones a Mrs Beti Roberts 27 Mr Rhys Jones a Mrs Mary Fitter Tregerddan 27 Dan ofal Dr Bryn Roberts a'i ddosbarth